Эмъюм

Удмурт Дунне
By Удмурт Дунне 6 октября, 2016 17:21
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Пӧсьсэс жалятэк пиштӥсь шунды тылсиос троллейбусысь омырез ӟырдатӥзы. Усьтэм укноостӥ дырын-дырын ырак пырись тӧл но каньсырам мылкыдэз сазёмытыны уг вормы. Троллейбус гуретэм куара, веттан гур выллем, синъёсме кыньыны турттэ. Пель сьӧрам шуак кылӥськиз пыдлось-пыдлось куара:

— Кулэме потэ, нош Инмар монэ нокызьы дораз уг басьты.

Йырсазьы соку ик сазёмиз. Арлыдзэ валаны турттыса, вӧзам пукись песянай шоры паймыса учки. Ог 60-65 арес, дыр, малпай ас поннам. Чиедгес мугораз лач-лач пуксем пужыё дэремез туж туслы адӟиське. Куректон-кайгу но ымныр тусаз пыӵамын ӧвӧл. Кылзӥсь вань шуыса, ӝыны сюресэз артэ мынытозямы, песянай сюлмаз тымиськем вань пӧсьсэ кисьтӥз. Потон азяз, янгыше усем мурт выллем, пальыштӥз но, матысь адямиезлы сямен, киыныз шоназ.

Песянайлэн верамез быдэс нунал ӵоже сьӧрам ветлӥз.

— Пересьмыса тон нокинлы кулэ ӧвӧл ни, пиналъёсыдлы но. Соослэн асьсэлэн улонзы. Пиелы жингыртӥ, дорад, пӧй, мыныны малпасько. Паймыса юа, мар ке кулэ-а, пе? Туж ӝож потӥз озьы ваземез. Уг, пиосме мон уродэсь уг шуиськы. Кыксы но туж умой дышетскизы, вылӥ образование басьтӥзы. Бадӟымезлэн аслаз предприятиез, пичизэ но вӧзаз ужаны басьтӥз. Уг юо, уг кыско, адямиосын но уг керето. Милемлы но кузпалыным ноку уродэн ваземзы ӧвӧл.

Мыным сизьымдон сизьым арес ни. Кузпалы кык ар талэсь азьло, сюлмыз кутыса, кулӥз. Витьтон кык ар ӵош улӥмы. Табере сотэк улон но кысӥз кадь. Сад-бакчаямы но ӵошен ветлӥмы. Малы меда монэ сьӧраз ӧз басьты, внукенымы улыны огнаме кельтӥз? Табере Сергей коркан кузё. Дас куинь аресысен будэтӥмы ми сое. Анаез, сюрес вылын шудтэм учыре шедьыса, быриз. Пимы кыкетӥзэ кышнояськиз, кык пиналъёссы будо. Бен, таиз доры но вуылӥз… тортъёсын, пирожнойёсын. Уждунмы кыкнамы вылысь тырме вал внукмес пыд йылаз ӝутыны. Ижысь техникая кун университетэз йылпумъяз, армие ветлӥз. Собере оломар луиз соин. Нокытын уг ужа, уй-нунал сямен компьютер азьын пуке. Вылаз ик, юыны яратэ. Кызь тямыс арессэ тырмытӥз ни, нокытын уг ужа. Бубиз нимаз квартира но басьтӥз, уг мыны отчы, дорам улэ. Квартираяз муртъёсты лэзиз, улэмзы понна толэзяз 9 сюрс манет тыро. Коньдонзэ номырлы но уг тырмытъя. 16 сюрс манет тыр пенсие чотын улӥськом. 4 сюрсэз тыриськонъёслы кошке, кылемез кык арнялы но тырме-а, уг-а.

Сиён лэсьтӥсько но, аслым шӧмъяны гинэ кыле на. Ӵукналы шуыса, толон ӝыт ньыль котлет пыжи. Султӥсько но, одӥгез кылем на. Синвуаськыса но мар сии, собере выльысь сиён дасян борды басьтӥськи. Эн лэсьты ай, йыркуръяськоз. Нош сиськыны туж яратэ, мугорын сӥлё-виро. Нунал потэ ке, одӥг сюлмаськонэз: сиськон, юон но компьютерен шудон. Ӵукнаозь но пукоз, кнопка зӥбылыса. Кинэз, маиз экранысь сокем гочатэ, ӧйтӧд. Кӧлыны выдыкуз, мон сайкасько ни. Дышемын 5 часын султыны. Кӧл вал, изён уг лыкты. Кыллисько валес вылам, султыны дӥсьтытэк. Кышкасько, ӧс ӟукыртэмлэсь сайканы шедьтоз но вуӵыртыны кутскоз, соиз, таиз уг яра шуыса. Сад-бакчае нуыны газетъёсты люкай вал пырон-потон ӧс доры. Шузимыса комнатаям пыриз но стаканэн валче пуконэз ӵыжиз. Юон вуэ ымнырам но, борддоре но пальккиськиз.

Кышнояськыны но ӧз вала, табере кинлы со кулэ луоз сыӵе визьтэм сямыныз. Бубиз гинэ но мар карыны уг вала ни соин. Ас дораз уже интыяз вал. Юэменыз мар ке дауртэм. Возьыт ук сыӵе пи понна, уллям. Куректон-кайгу шедиз мыным. Картэ кулэм бере 8 килограммлы восьмиськем. Бордам пыктос висён кырмиськем кожаса, картэным пумиськыны дасяськисько ни вал. Инты но вӧзаз кельтэмын, кулон дӥсь но кемалась дасямын. Кылем арняе больницае ветлӥ, олокыӵе но анализъёс сётыны косӥзы вал. Таза, пе, нокытӥыд уг висьы.

* * *

Песянайлы номырин юрттыны ӧй ке но быгаты, мон солы огдырлы ке но буйгатӥсь эмъюм луи.

Лия Малых

Удмурт Дунне
By Удмурт Дунне 6 октября, 2016 17:21 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<