«Чупчи крезь» спектакль: Лопырскон

Удмурт Дунне
By Удмурт Дунне Октябрь 28, 2016 11:26
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
«Чупчи крезь» спектакльысь суред.

«Чупчи крезь» спектакльысь суред.

20-тӥ коньывуонэ Удмурт театрын выль сезон усьтӥськиз. Пётр Захаровлэн «Эбга» трагедиезъя пуктэм «Чупчи крезь» спектакле быдэс зал люкаськиз — арлыдоос но, егитъёс но.

Театре ветлэме бере туж капчи мылкыдын, выльдӥськыса бертӥ. Котькудӥз спектакль, «Мусое, мынам мусое» серекъятӥсь комедия-а со, лулэз бугыртӥсь «Мултан уж» яке лиричной «Чупчи крезь», кельтэ аспӧртэмлыко мылкыд, малпаськытэ. Нош кӧня уж лэсьтэмын, спектакль адӟисьлэн сюлмаз мед пыроз шуыса. Тани «Чупчи крезь», кылсярысь…

Спектакль кутскон азьын борддорын адӟиськизы Валентин Белыхлэн суредъёсыз. Отын возьматэмын кужмо батыръёс, тӧроос, оглом удмурт калыклэн историысьтыз учыръёс. Чакламын вашкала дӥськут, ожмаськон арбериос, котькуд деталез туж эскерыса но тыршыса суредамын кадь. Ожмаськонэ мынӥсь йыг-йыг воргоронъёслэсь палэнынгес кышноос, келяськисьёс сыло. Озьыен, батыръёсмы сьӧрын — быдэс калык. Валентин Белыхлэн суредъёсыз сюлэмез бугырто, спектакль кутскон азьын ик соос аспӧртэмлыко мылкыд сёто, вуоно действилы дасяло. Усто гожтэмын спектакльлэн крезьгурез но. Гур воштӥськемъя валано ни, мар луоз: яратон кусыпъёс яке тунаськон, веднаськон вакыт. Мон малпамъя, спектакль пӧрме соку, куке адӟисьлэн паймеменыз интыысьтыз вырӟемез но уг луы ни. Озьы ик вал монэн но, эшъёсыным но.

П. Захаровлэсь «Эбга» трагедизэ лыдӟи вазенгес. Произведениен тодматскемын вал бере, спектакльлэн пуштросэз пумысен юанъёс чик уз кылдэ, малпасько вал. Янгышаськем. Паймытӥзы Зуйлэн монологъёсыз, трагедиын гожтэменыз ӵошатыса, паськытгес пуштросо, узыргес луиллям. Валтӥсь режиссёр Алексей Ложкин но Пётр Захаров бадӟым уж лэсьтӥллям спектаклез выльдон понна. Трослы-а воштӥськем «Чупчи крезь», 1993-тӥ арын пуктэм «Эбгаен» ӵошатыса? Мамае студент вакытаз та спектакле ветлэм. Со но, пе, ачим кадь, Эбгалэсь верамъёссэ сак кылзэм, валтӥсь геройёс понна сюлмаськем, ӝожомыса но пушкыз тырыса, потэм залысь.

«Кытын, кытын-о тон мынам, кытын, шуд кисьматӥсь югытэ? Югытэ, югытэ…»  — черектӥськиз, киоссэ вӧлъяз Зуй, солэн мугорыз золтӥськиз. Милям но, учкисьёслэн, лулъёсмы сьӧраз ӝутскизы кадь. Зуй сцена вылысь ышиз, нош ми интыосамы измимы. Зуйлэн (Алексей Котковлэн) та верамез туж зол чузъяськиз. Со Пётр Захаровлэн «Мон кошкисько» кылбурысьтыз чуръёс, соя кырӟан но гожтэмын, быдэстэ Надежда Уткина. Трос пол кылылӥ ни та кырӟанэз, но пуштросэз пумысен ноку но йырме ӧй висьыты. Нош кыӵе чебер, кыӵе мур кылбур вылэм. Ӵемысь матысьтымы ум адӟиське чильпырась чеберез, зарнивуам шудмес. Театр вӧзысьтымы узырлыкез адӟыны дышетэ. Тани ук со, матын, синдэ гинэ усьты.

Марина Пахомова

Удмурт Дунне
By Удмурт Дунне Октябрь 28, 2016 11:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<