Валамон, Паримон!

Удмурт Дунне
By Удмурт Дунне 7 октября, 2016 15:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Удмуртъёс понна 3-тӥзэ ортчиз «Шудком» визь сынан. Радъяло сое егитъёслэн «Шунды» огазеяськонзы но Нациосын ужан политикая министерство.

c7v4v_yygn0

«Кыло-ымо» команда: визьмо бускельёсын кенешыны яра.

18.45. 3-тӥзэ усьтӥ Ижысь «Ковёр» клублэсь ӧсъёссэ но буш ӝӧк утчаны кутски. «Удмурт дунне» газетысь иворчиослэн «Кытынкумар» командамы люкаськыны кулэ ни. Вазь вуи кадь, но сэргын сяна инты кыльымтэ ни. Мукетъёсыз 8 командаос эшшо но вазьгес вуиллям. Гужем бере, иське, чидатэк возьмаллям шудонэз. Котырскисько визь пог эшъёсмы дортӥ. Киоссэс посыса ик, пуко удмурт азьветлӥсьёслэн «Валамон-паримон», Историяя, кылъя но литературая Удмурт институтысь тодосчиослэн «Кынкорт», «Удмуртия» ГТРК-ысь журналистъёслэн «Кыло-ымо», егитъёслэн «Кызьыайсо» командаоссы. О! Выль ымныръёс но адӟисько: «Шунды» огазеяськонлэн выль правлениезлэн «Дырыз дыръя», студентъёслэн «Ю-тыщ» (шедьтэ та кылысь янгышсэ) командаос. Залын крезьгур каллен чалмыны кутскиз, шудӥсьёс интыяськизы ӝӧкъёс сьӧры.

19.00 Шудон кутскиз. Ымныръёс шуак кисырскизы. Юан. «Та тылобурдоос вуӵырто но жугиськыны ярато бере, соос символ луыны уггес тупало. Кыӵе тылобурдоос сярысь вераськон мынэ?» 60 секунд каллен кошке. Командаос  малпасько, куспазы кенешо. Ми жугиськись тылобурдоосты тодамы вайыны кутским. Атас! Но со уг вуӵырты ук. Курка! Но со марлэн пусэз луэ? Дыр ортчиз, шуиз шудонэз нуись Александр Бикузин. Сюлэмъёсмы эшшо но золгес кокаськыны кутскизы. Милям йырамы нокыӵе малпан ӧз лыкты ни — кагаз вылэ «атас» гожтӥм  но…

shku

Шудонэз нуись Александр Бикузин.

19.03. … келям. Дыдык, пе. Эх! Лулӟим. Вӧзамы чабем куараос кылӥськизы. ГТРК-ысь журналистъёс шонер тодӥллям. Тани-тани кыкетӥ юанлы шонер валэктон сётом ай…

19.10 Юанысь юанэ возьмаськом удмуртлыкен, шаертодонэн герӟаськем юанъёсты. Соос ӧвӧл но ӧвӧл.

19.39 милям 4 баллмы сяна ӧвӧл на. Шудон ми понна секытэн кутскиз. Писпулэн кыӵе люкетэзъя тодыны луэ, кудпалась тӧл пельтэ? Гожтӥм «гыркезъя» — ӧм тодэ, выжыосызъя вылэм. Шоколадлэсь ӟечлыксэ, пе, со тодметъя тодыны луэ. Пичияк гинэ палэнэ кошким. «Пинез чаляк сапта» гожтӥм, нош вылэм — киын чаляк шуна.

19.40  13-тӥ юан. «Одӥг критик гожтэ: Оксимирон рэпер ӟуч литературалэсь сям-йылолъёссэ уте, угось огшоры рэперъёс, пе, шуба нулло, нош Оксимирон — сое. Нималэ ӟуч гожъяськисез, кудӥз 1842-тӥ арын сыӵе нимын произведенизэ гожтӥз». Капчи юанлы оскытэк, ог-огместы оскытыны турттӥськом, со, зэм но, шинель шуыса. «Шинель» нимо произведениез вань Николай Гогольлэн, Оксимирон уте ӟуч кылэз, нош «шинелен адямиос» утё кунэз. Озьыен, Н. Гоголь.

19.45 Со зэм но Гоголь! Тросэз та юанлы шонер валэктон сётӥзы, луоз. Шуг юанъёсты капчиосызгес вошто, валады ни, дыр, вера ведущиймы.

20.00 Вис. Кырӟа Юлия Гаврилова.  Йыръёсмы шутэтскемен валче мукет командаосысь визь погъёсын вераськиськом. Визь сынанъя шудонъёс, зэм но, вакчи дыр куспын туж тодмо луизы но бордазы соку ик трос калыкез кыскизы. Ижын ортчылӥсь «Что? Где? Когда?» шудон элькун этапын 60-лэсь ятыр командаосты бича. «Валамон-паримонысь» куд-ог шудӥсьёс «60 секундэ» пырисько. «В» лёгетысь «А» лёгетозь но вуылэммы, пе, вань. «60 секунд», «Шудком» кадь ик, кафеосын ортчылэ. Валамон, вань командаос отчы уг тэро ни. «Шудкоме» гинэ но 9-лэсь ятыр куриськон вуиз вал. Бере кылемъёс азьланяз шаплыгес луозы.

20.10 Ӝытэз нуись вера командаослэсь баллъёссэс. Та вакытэ азьпалан удмурт азьветлӥсьёслэн «Валамон-паримон», «Удмуртия» ГТРК-ысь журналистъёслэн «Кыло-ымо» командаос. Ми, жаляса верано, та рад беразыгес кылиськом. Паймытӥзы Историяя, кылъя но литературая Удмурт институтысь тодосчиос. Выль сезонын егитомем команда, оло, дасяськыса лыктэм.

shk

О! Выль ымныръёс но адӟисько.

20.38 Йырез тӥяса дыр туж ӝог ортче. Тани берпуметӥосыз пӧлысь юан вуиз ни. «Одӥг статьяын гожтэмын: ми соослэсь нимзэс тодӥськом бере, соос сокем ик умой ватӥськыны уг быгато. Кыӵе япон кылын соосты нимало?» Ниндзяос. Соос шпионъёс бере, милемлы ниндзяос сярысь тодыны уг яра, нош  ми тодӥськом.

20.40 Кичабонъёс быдэс зал тыр чузъяськизы. Валэктонмы шонер! Берпуметӥ юанэз вормыны ӧм ни быгатэ, кылим 4-тӥ интые. Ми кадь ик 11 юанъёсты вормиз егит азьветлӥсьёслэн «Кызьыайсо» командазы. Но шудон уг на йылпумъяськы. Нырысетӥ интыез люко «Валамон-паримон», «Кынкорт» но «Кыло-ымо» командаос — соослэн быдэн 13 балл. Ватсаса юан чузъяське.

20.44. Залын шыпыт. «Куд-ог валась муртъёс пыдкутчанзэс тамакен зырало, со ас ужзэ лэсьтыны медаз быгаты шуыса». Вис. Дыр ортчиз.

20.46. Александр Бикузин лыдӟе дораз вуэм валэктонъёсты. Огез соос пӧлысь: коӵыш медаз кызя шуыса. Зал тыр серекъян чузъяськиз. Но шонер валэктон мукет: пуны адямиез пытьыезъя медаз шедьты шуыса.

par

«Валамон-паримон» команда нош ик вормизы! 3-тӥ пол!

20.47. Зал пумын «Валамон-паримон» командаысь шудӥсьёс султо но, ог-огзы борды кутскыса, киоссэс вылӥе ӝуто. Нош ик вормизы! 3-тӥ пол!

Кызьы азьпалтод на «Валамон-паримон» командаез?

Кивалтӥсьсы Юрий Мишкин шуэ: капитан котькуд шудӥсезлэсь малпанзэ кылыны но вераськонэз шонер ӧре выжтыны кулэ.

Пумозяз оскимы, удмурт юанъёс таяз радэ чузъяськозы ик шуыса. Но кызьы веразы радъясьёс, вуоно шудонын соос одно ик луозы ни. Озьыен, коньывуон пумын пумиськытозь!

Мария Векшина

Туспуктэмъёсыз Г. Степановлэн

Видео: «Мынам Удмуртие» ТРК

Удмурт Дунне
By Удмурт Дунне 7 октября, 2016 15:30 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<