Ӵыпет трос — чорыг ичи

Удмурт Дунне
By Удмурт Дунне Октябрь 11, 2016 10:28
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
1-5

Вуосысь арлы быдэ 128-180 тонна чорыг куто.

Удмуртие будэтон вылысь карп нырысьсэ вайиллям 1949-тӥ арын. Удмурт воргорон Поликарп Перевозчиков чорыгез валъёсын бекчеосын вуттэм Иваново улосысь. Туннэ  карп вордонъя технологиосын тодматскыны шаерамы быдэс Россиысь вуыло.

Таза луон понна эмчиос дэмлало араз 18,7 кило чорыг сиыны. Нош кӧня чорыг сииськом асьмеос?

— Кылем арын Россиын 4 миллион 31 сюрс тонна чорыг кутӥзы. Тае адямилы быдэ люконо ке, котькудмылы 24 килограмм усе, — вера гурт удыс наукаосъя доктор, профессор, Вотка ёросысь карп вордонъя «Пихтовка» хозяйствоен кивалтӥсь Георгий Крылов. — Но зэмос югдур уродгес. 4 миллион тонна кутэм чорыг пӧлысь ог 2 миллионэз зарезь чорыг кошке кунгож сьӧры. Со сяна, 450 сюрс тонна чорыг мынэ пудо сиёнлы пызь лэсьтыны. Та но кунгож сьӧры кошке, отын уго сыӵе пызьлы бадӟым дун пукто. Озьы Россие кыле 1 но ӝыны миллион тоннаез гинэ. Шорлыдын со котькудмылы 10 килограммен усе. Сием чорыг пӧлысь 25-30 процентэз шурысь луыны кулэ. Асьмелэн та лыдпус 5 процентозь гинэ вуэ.

Георгий Крылов верамъя, Удмуртиын чорыг поттонэз 3-4 пол йылтыны луэ. Ас вакытаз Вотка ӵыпет гинэ туж узыр вал уго. Дуннеын со 3-тӥ интыын лыдъяськиз трос чорыг сётыны быгатэмезъя. Али лябомиз.

Удмуртиын 4 бадӟым водохранилище: Иж, Вотка, Камбарка, Пудэм. Со сяна, Кам шур узыр на. Лыдпусъёсты учконо ке, та вуосысь арлы быдэ 128-180 тонна чорыг куто. Но Георгий Степанович верамъя, татчы уг пыры браконьеръёсын кутэм чорыг. Озьыен, шаерамы оглом куто ог 400 тонна чорыг. Трос-а со, ӧжыт-а?

— Удмуртиын 1 гектар вуысь арлы быдэ басьтыны луэ 1 центнер чорыг. Ижысь ӵыпет, кылсярысь, 210 тонна чорыг сётыны кулэ. Оглом ӵыпетъёсысь 900 тонна чорыг поттыны луоно. Но уг пӧрмы. Малы? Ас вакытаз трос чорыг будэтыны но кутылыны ӧз лэзе вал. Пумен чыры-пыры чорыг дуно чорыгъёслы эркын улыны ӧз сёты ни. Вуын инты тырмытэк, дуноез быриз, векчиез кылиз.

Вотка но Иж ӵыпетъёсын ортчытэм эскеронъёс возьма-тӥзы: векчи чорыг уно луэмын. Югдур ӧз воштӥськы ке, чебер, таза чорыгтэк кыльыны кема ӧвӧл. Векчи чорыглэсь мозмытскон вылысь вуэ лэзёно толстолобик, сазан но карп кадьёсты.

чорыг

Россиысь чорыг вордӥсь хозяйствоос пӧлын Пихтовка тужгес уйпалан интыяськемын.

— Удмуртиын чорыг уногес будэтыны луэ, — шуэ Г. Крылов. — Сива, Чупчи, Вало шуръёсысь 500 тонна форель поттыны луоно. Туннэ та чорыген нокин рос-прос уг выры. Азьвыл котькуд колхозлэн аслаз ӵыпетэз вал. Али 5 гектар быдӟаосыз 250 лыдъясько, 1 гектар быдӟаосыз 1 сюрс мында. Соосты ваньзэ чорыген тырмытӥд ке, 1 сюрс 900 тонна чорыг эшшо поттыны луоно. Озьы адямилы быдэ 3 килограмм чорыг шаерамы басьтыны быгатомы.

Со сяна, 1962-тӥ арын УАССР-ысь Министръёслэн Советсы куремъя Москваысь Гидропроект институтэн валче асьме тодосчиос шаерамы чорыг вордонъя 10 инты утчазы. Соос кылдыны кулэ вал Яр ёросысь Пудэмын но Октябрьскийын, Сьӧлталась Арлеть котырын, Кезысь Тум вадьсын, Воткинскысь Пихтовкаын но мукетъёсыз. Талы чакламын вал 4 миллион манет. 1970-тӥ арын лэсьтыны кутскизы Пихтовкаез. Отын чорыг 1974-тӥ арын будэтыны кутскизы. Лэсьтыны ќдъязы Арлеть котыре ӵыпет,  но туж дуно усе шуыса, аналтӥзы.

— Шаерамы чорыг вордонэз азинтонъя проектъёс ӟечесь, — шуэ гурт удысъя но сиён-юонъя министр Александр Прохоров. — Но соосты улонэ пыӵатон понна трос коньдон кулэ. Шурысь чорыглы кулэяськисьёс арысь аре йыло. Та умой адӟиське ярмаркаос дыръя — одӥг чорыг но басьтытэк уг кыльы. Та пумысен азьланяз, оло, малпаськыны кутскомы. Огез шумпоттэ: фермеръёс басьтӥсько ни та уж борды.

Нялтас вераса, туннэ шаерысьтымы фермеръёс «Пихтовкае» дышетскыны вуыло. 4-тӥ коньывуонэ но республикаысь гурт удысын тыршисьёс хозяйствое люкаськылӥзы, ужаменыз тодматскизы. Россиысь чорыг вордӥсь хозяйствоос пӧлын Пихтовка тужгес уйпалан интыяськемын. Татын поттыны кулэ вал гектарысьтыз 8 центнер чорыг. Нош хозяйство али поттэ 60-70 центнер. Россиысь чорыг вордонъя хозяйствоосын шорлыдын потто 9 центнер — Ростовын, Краснодарын, Ставропольын, отын 4 градуслы шунытес ке но. Пихтовкаысь технологиез шуныт палъёсы выжтӥд ке, будэтыны луоз 400 сюрс тонна чорыг, со 44 миллиард манет тыр барыш вайысал, шуэ Г. Крылов.

Хозяйствоез зол азинтыны быгатэмез понна 5-тӥ коньывуонэ Георгий Крыловез ӧтчазы Москваысь ВДНХ-ын усьтӥськем «Зарни сӥзьыл» ярмаркае. Гурт удысын ӟеч тыршисьёсты Правительстволэн Тӧроез Дмитрий Медведев татысен кун наградаосын пусйиз. Георгий Степанович данъямын «За заслуги перед отечеством» 1-тӥ степенё орденлэн медаленыз.

Елена Сараматова

Туспуктӥз В. Беломорских

 

Удмурт Дунне
By Удмурт Дунне Октябрь 11, 2016 10:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<