Юанлы кулэ валэктон, проектлы — коньдон

Удмурт Дунне
By Удмурт Дунне 23 сентября, 2016 15:27
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Таяз арняе  Россилэн Президентэныз Владимир Путинэн ӵош шаерамы вуылӥз Россиысь  культурая министр Владимир Мединский.

medinskijj

Россиысь культурая министр В. Мединский (бурысез) тодматскиз М. Калашниковлы сӥзем музеен но.

2019-тӥ арын 100 ар тырме М. Калашниковлы. Юбилейлы дасяськон мытэмын ни. Соин валче министр учкиз Пыӵал тирлык поттон заводлэсь валтӥсь корпуссэ но Операя но балетъя театрез, собере малпаз  элькунысьтымы  культура удысын тыршисьёсын пумиськыны. Нош юанъёс та удысын лачак — учреждениослэн кивалтӥсьёссы министрез асьсэлэн сюлэмшугенызы согизы, шуыны луоз. Тросэз юанъёс герӟаськемын тырмыт коньдон висъямтэен.

Кылсярысь, элькунысьтымы Усточиослэн школаенызы кивалтӥсь Надежда Иванова юаз: уг луы-а  таӵе школаослы крезьгуро инструментъёсын юрттыны? Министр  тыршом шуиз но, кыӵе ке оскон вордӥськыны медэ ни кадь вал. Но В. Мединский шуак юаз:  нош малы анай-атайёс пиналъёссылы инструмент уг басьто? Надежда Петровна валэктыны выриз  шоркарысь кунолы, гуртоос, туж потыса но, уз быгатэ  нылпизылы 200 сюрс манет тыр сылӥсь инструмент басьтыны, татын Москваын быдӟа уждунъёс ӧвӧл. Озьы ке но В. Мединский тодэ вайытӥз, Россиын  5 но ӝыны сюрс крезьгуро школаос шуыса…

Кӧня ке ар ӵоже ни курадӟе Национальной библиотека — юртэз пытсамын, отделъёсыз город тыр пазямын. Сое йӧскадь тупатъян понна кулэ 650 миллион манет.  Со пӧлысь 400 миллионзэ асьме Правительство куре  федерал бюджетысь. Та ласянь оскон бадӟымгес кадь —  Россиысь Культурая министерство проектлы дурбасьтӥз, со пыртэмын 2017-тӥ арлы бюджетэ, но учкоз-а озьы ик Коньдон ужпумъёсъя министерство, тодмо ӧвӧл на.

Асьме культурая министрмылэн воштӥсезлэн  Пётр Даниловлэн сюлэмыз котьку висе артистъёс понна — туала вакытэ соос уг быгато гастрольёсы потаны, ас  кожазы пӧзё, луоз-а та ласянь улосъёслы юрттыны? В. Мединский  ӵектӥз  улосъёсын валче ужанъя проект гожтыны — коньдон висъянлэсь оглюкетсэ элькун ас вылаз басьтӥз ке, уж пӧрмыны кулэ.

Шуггес музейёсын. Элькунысьтымы Суредан искусствоосъя музей кемалась  рос-прос тупатъямез кулэ каре, со сяна, уг тырмо та удысысь специалистъёс. Кылсярысь, туннэ нуналлы быдэс шаерамы ӧвӧл живописья одӥг но эксперт, чиньыен лыдъямон реставраторъёс но. Удмурт кун университетэз йылпумъямъёс кошко бадӟым городъёсы, мар кароно?

Малы ке та ужпум борды министр воксё ӧз дэмӟиськы, суредан искусствоосъя музейлэн егит директорезлэн В. Вахрушевалэн мылкыдыз, валамон, куашказ. Со дыре ик В. Мединский  республикаез ушъяз ӟеч кадръёс будэтэмез понна — толон гинэ, пе, пумиськылӥ  «Росгосцирклэн» выль кивалтӥсеныз, бӧлякеныды Дмитрий Ивановен, туж оскисько, со быдэс кунысьтымы цирк удысэз радъяны быгатоз шуыса.

Тросэзлэн юанъёссы-куронъёссы коньдонэн герӟаськемын ке вал, одӥгез  гуртысь библиотекарь  министрлы ӝожтӥськиз, соосты  бумага уже выйтыны выро шуыса: милям 90 процентэз ужан дырмы бумага отчётъёс гожъяса быре, пе. Малы со кулэ? Ярам, бадӟым фестивальёс-мар луысал ке, но пичи ужрад ортчытӥськод но 3 нунал  гожъяськыса пукиськод.

Владимир Мединский чӧлскиз вал асьме министерство вылэ, но етӥз библиотекарь ӧз сётскы: ӧвӧл,  косонъёс (нормативной  кагазъёс) вуо Россиысь  министерство ласянь!  Соку  министр  амалтэк соглаш кариськиз, мон но, пе, сое шонерен уг лыдъяськы, со интые умойгес луысал  ужрадъёсы тросгес калыкез кыскон сярысь сюлмаськыны.

— Ярам, ойдолэ тазьы вераськом, — вордӥськиз соку ик ӵектон. — Тӥляд министрды Владимир Соловьёв Россиысь Культурая министерстволэн коллегияз  мултэс отчётъёс сярысь доклад мед лэсьтоз, солэсь вераськемзэ мукетъёс чабыса пумитазы ке,  тыршом  та югдурез воштыны.

Пумиськон туж кема кыстӥськиз, ваньмыз мылкыд карисьёс юанъёссэс сётыны быгатӥзы. Табере пайдаез гинэ мед луоз.

Зинаида Кириллова

 

Удмурт Дунне
By Удмурт Дунне 23 сентября, 2016 15:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<