Вераське монэн удмурт сямен!

Удмурт Дунне
By Удмурт Дунне Сентябрь 13, 2016 15:45
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Вожвылъяськонэ ӵектэм адямиос пӧлысь огез — Наталья Дмитриева, анай, К. Герд нимо гимназиысь дышетӥсь, удмурт проектъёсын вырись.

Ижысь Н. Дмитриева пиналъёссэ удмурт будэтэ.

Ижысь Н. Дмитриева пиналъёссэ удмурт будэтэ.

— Мон котьку тау шуисько анай-атаелы монэ удмурт будэтэмзы понна, — вера Наталья Леонидовна. — Удмурт кыллэсь медам куштӥськы шуыса, монэ каникуллы быдэ Кияса ёросысь Тӥгырмен гуртэ ӵужанае доры келяло вал. Отын будэменым сэрен ик удмурт сям-йылолъёсты золгес валаны но яратыны кутски. Бадӟымгес будэме бере городской карыса гуртоос мыным ӟуч сямен вазё вал. Малы ке талы туж йыры кур луылӥз. Пумитазы котьку шуылӥ: мон удмурт, вераське монэн удмурт сямен! Собере, мынам атае вӧзын ӟуч будыны но кылдысал меда? Леонид Гусев — Удмуртиысь дано журналист. Радиоын ужам сяна, со Удмурт театрын спектакльёсты синхрон амалэн берыктылӥз. Доре огнаме уд кельты шуыса, ваньмаз сямен спектакльёсы сьӧраз нуллэ вал! Анае нырысь телевидениын редактор луыса ужаз, отӥяз — крезьгуръя училищеын. Зэм, мон будыку, удмурт классъёс ӧй вал. 44-тӥ лицейын финно-угроведениея ӧр усьтэмен, удмурт кыллы дышетӥсь Ангелина Решетникова монэ ас палаз кыскиз. Отӥяз Удмурт кун университетысь историяя факультетын ми понна усьтӥзы фин-угор калыкъёслэн историзылы но культуразылы сӥзем курсъёс, дышетӥм удмурт, фин но англи кылъёсты. Ижын удмурт луыны азьло секыт вал. Но ӵапак удмурт луэме мыным юрттылӥз кунгожсьӧръёсын кусып тупатыны.

Семья кылдытэмез бере Наталья Дмитриевалэн йыраз ик ӧз лыктылы, нылпиоссэ ӟуч будэтоно шуыса. Тодосчиос шуо ук: кыӵе ке кылэз нылпилы весяклы пыӵатэмды потэ ке, 2-3 аресозяз вераське со кылын гинэ. Дмитриевъёс озьы ик каро.

— Пиелы 18 арес ни. Тужгес секыт сётӥськиз тазэ удмурт карыны, — тодаз вае Наталья Леонидовна. — 112 номеро удмурт сад шедьтӥмы ик. Но садын но семьяын сяна, мукет нокытын удмурт сямен вераськыны. Нылме удмуртлык пала кыскыны капчигес луиз. Со ветлӥз 208 номеро нылпи садэ, дышетскиз Ольга Аркашева дорын. Нылы адӟиз удмурт кыллэсь кулэ луэмзэ.  Но удмурт луэменыз золгес данъяськыны кутскиз «Пичи чеберай» конкурсэ пыриськемез бере. «Визьнодӥ» ним басьтэмезлы туж лӧптӥз. Со дырегес ик ветлыны кутскимы Настя Деметерен кылдытэм «Шудон корка» клубе. Отӥяз ачим со проектэз нуыны ӧдъяй. Городысь тросгес удмурт семьяосты котырам бинеме потӥз. Ог-огмес мед тодом, удмурт кылын вераськыны, сям-йылолъёсмес нылпиослы пыӵатыны площадка мед луоз шуыса. Татын шудон пыр нылы но тодматскиз ачиз кадьёсын. Та но отӥяз мылкыдзэ ӝутӥз крезьгурен тунсыкъяськыны. Али нылы 6-тӥ классын, аккордеонэн шудэ, фольклоръя студие ветлэ. Ӵапак удмуртэз тодэмзы мукет кылъёсты яратыны но ӝоггес дышетыны юрттӥз. Пиме фин кыллы дышетӥ на уго. Нылы англи кылэн вераськыны йӧндыре. Огез сюлмаськытэ: кинэ меда кузпал шедьтозы, соослэн нылпиоссы удмурт кылэз дышетозы на меда?

Али Наталья Дмитриева куинетӥ пиналын утиське. Таиныз но удмурт кылын гинэ верасько. Зэм, урамысь эшъёсызлэсь мар сярысь вераськемзэс мед валалоз шуыса, куддыр ӟуч кыл пыртало  ик. Наталья Леонидовна огез пумысен жаля: «Шудон корка» проектэз декретэ потэмез бере азинтӥсь ӧвӧл. Ужаны потӥ ке, сое одно ик улӟыто, шуэ.

— Нырысетӥ нылпиосы будыку, удмурт кылъя книгаос но шудонъёс ӧй вал. Али улон умой пала воштӥське. Но 1 аресъемъёслы зӧк картонлэсь шудон-лыдӟон книгаос ӧвӧл. Кылбуръёс но бадӟымгес аресъемъёслы. Соин ик туж потэ шудон книга лэсьтэме. Кылбуръёс утчаны кутски ни. Ачим но гожъяськисько. Ваньмыз ӟеч пӧрмиз ке, книга, оло, кылдоз.

Сюлэм вылын улэ мукетыз но. Мунё театрын удмурт спектакльёс туж ӧжыт, отчы но билет басьтыны шуг. Нылпиосты юромо классэн нулло, мукет сямен зал тыр калык уз люкаськы, шуо, лэся. Та югдурез кызьы ке воштоно вал. Удмурт культурамес ватӥськыса возьматӥмы ке, нылпиослы удмурт будыны секыт луоз.

Елена Сараматова

Туспуктэм: Наталья Дмитриева

Удмурт Дунне
By Удмурт Дунне Сентябрь 13, 2016 15:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<