Тушмон яратэ керетонъёсты

Удмурт Дунне
By Удмурт Дунне Сентябрь 13, 2016 12:15
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
1452848222

Кышкыт огазеяськонэ пырыны ӝуткась адямиос ваньзы сьӧд йырсиё но тушо ӧвӧл. Пӧлазы кильтро дӥсяськем, дышетскем, ӟуч кылын чебер вераськись тӧдьы йырсиё воргоронъёс трос.

Азьло аръёсы экстремизм мылкыдъёсын улӥсьёсты оген-кыкен гинэ пумиталод вал. Туннэ соослэн бадӟым огазеяськонзы вань — идеологизы юн, уксёзы трос.

Шудон лекомытэ

Та пумысен кенешон ортчиз Элькун Тӧро А. Соловьев дорын. Котырес ӝӧк сьӧрын малпанъёссэс кисьтӥзы шаерысьтымы валтӥсь следователь Владимир Никешкин, дышетонъя но наукая министрлэн воштӥсез Игорь Белозёров, нациосын ужан политикая министрлэн воштӥсез Павел Орлов но мукетъёсыз. Люкаськемъёс огымысь шуизы: элькунамы экстремизм мылкыдын нюръяськонэз кужмоятоно.

Кышкыт малпанъёсын ӵемгес поромыло егитъёс — футбол фанатъёс, «Антифа», «Неформал», «Хардлайн» выллем группировкаосы пырисьёс. В. Никешкин ивортэмъя, 2 адями вылэ уголовной ужъёс но ӝутылӥзы. Пияш, Ижысь но Челябинскысь командаос туп ӵыжаку, пӧртэм калыкъёсты ултӥяса, стадион тыр черекъям. Мукетыз Зимбабвеысь вуэм куноез тышкам…

Анай-атайёслы нылпиоссэс сак чаклано, лыдъя валтӥсь следователь. Адями яке пӧйшур виылонэн герӟаськем шудонъёсы пинал медаз выйы. Соосын аръёсын шудыса, пиналлэн лулпушкыз лекоме, со адямиез быдтыны дась луэ.

— Берло 5 ар куспын Россиын экстремизм мылкыдъёсты вӧлмытэмзы понна пытсэт сьӧры шедемъёс 3 поллы йылӥзы, — вераз Владимир Анатольевич. — Миым сыӵеос 100 котыр вал, али 600-лэсь ятыр. Ӵапак таӵе адямиослэсь егитъёсмес утёно.

И. Белозёров оскытӥз: школаосын пиналъёсты утён ласянь трос лэсьтэмын. Видеокамераос, кышкытлык сярысь ивортӥсь кнопкаос, кенеръёс вань. Йыртэмасьёс пырыны уз быгатэ. Кышкыт малпанъёс но пыӵаса уз вуттэ — 6-тӥ арзэ ини пиналъёс ветло дуннеысь осконъёслы сӥзем урокъёсы.

— Та вакытэ шаерысьтымы дышетскон учреждениосын астэ утёнлы сӥзем пумиськонъёс ортчыло, — шуиз Игорь Николаевич. — Дышетӥсьёс сяна, пиналъёслы визь-нод сёто югдурез утисьёс, баӵкоос. Та ужрадъёс кыстӥськозы 20-тӥ сентябрёзь.

Дышетонъя но наукая министерстволы юрттӥське Кун Кенешысь Егитъёслэн парламентсы. Азьветлӥсь нылъёс-пиос нимысьтыз группа кылдытӥллям, студентъёс доры поталляло.

— Алигес вуылӥмы Чечняе, — вераз Егитъёслэн парламентэнызы кивалтӥсь Сергей Колегов. — Грозныйысь егитъёслэсь тодӥмы, кызьы вербовщикъёслэсь утиськоно. Бадӟым саклык висъяськомы Интернетлы. Отысь тодматскон бамъёс пыр Россиысь 2 сюрслэсь трос нылъёсты-пиосты экстремистъёс котыразы бинизы ини.

Террористъёслы кельшо калыкъёс вискын пуромем керетонъёс, лыдъя Павел Орлов.

Террористъёслы кельшо калыкъёс вискын пуромем керетонъёс, лыдъя Павел Орлов. Ӵапак сыӵе кунъёсы соос мерско, огазеяськоназы выль адямиосты утчаса.  Соин калыклы тупаса улоно. Шаерамы та ласянь югдур ӟеч. Озьы ке но Нациосын ужан политикая министерство эскеронъёс радъялля. Гуртын яке городын пӧртэм калыкъёс куспын кылдэм керетонъёс сярысь иворъёс соку ик министерствое вуо.

 

— Миым шаерамы улӥсьёс пӧлын юалляськон ортчытӥмы, — вераз Павел Анатольевич. — 15 процентэз мукет калыкъёслы пумит луэмзэс усьтӥзы. Та умой ини. Угось азьло соос 26 процент вал.

Книга юрттэ

Котырес ӝӧк сьӧрын выль книгаен тодматскон ортчиз. Сӥземын со егитъёс пӧлын лекъяськон мылкыдъёсын нюръяськонлы.

— Ижысь Восточно-Европейской институтын конференция ортчиз. Отын чузъяськем докладъёс та книгае шедизы. Со егитъёсын ужасьёслы юрттэт выллем луоз, — валэктӥз институтлэн наукая но инновациосъя проректорез Алексей Моров.

Книгаын тыро-пыдо валэктэмын: кышкыт огазеяськонэ пырыны ӝуткась адямиос ваньзы сьӧд йырсиё но тушо ӧвӧл. Пӧлазы кильтро дӥсяськем, дышетскем, ӟуч кылын чебер вераськись тӧдьы йырсиё воргоронъёс трос. Соос ки улэ ӵемгес сюрыло начар семьяосын будэм 20-23 аресъем егит муртъёс. Пӧлазы трос нылкышноос — тодматскон сайтъёсын ӵемгес пукыло, пиосмуртъёсын ӵошатыса, вераськисесьгес, оскисесьгес луо. Вербовщикъёс нылкышноослы нырысь туган карисько. Собере Сириын я эшшо кытын пиналъёсты быдтонэн герӟаськем видеосуредъёсты возьматъяло. Шуо: татын нылпиосты виыло, тон — вуоно анай — соослы юрттыны кулэ!

Интернетысь сяна, кышкыт огазеяськонэ пырыны ӝуткась адямиосты пумитаны луэ ульчаысь, кафеысь, университетысь. Сыӵеослэсь вераськон мылкыдзэс куаӵак уретоно. Шуоно: али ик полицие жингырто! Яке: мон мукет огазеяськонэ пыриськисько ини! Синмазы учкыны уг яра. Киез, йырсиез исаны лэзёно ӧвӧл — соос  адямиез гипнозэ уськытыны быгато.

Кызьы валано, егит адями кышкыт огазеяськонэ пыриськыны медэ шуыса? Вераськемез, ассэ воземез чутрак воштӥське. Мукет выжыысь калыкъёсты адӟемпотостэм каре. Лек мылкыдъёссэ пушказ уг возьы. Эшъёсыз пӧлын кылдо тодмотэм адямиос. Соос егит муртэ лӧпкытъяло: татын тонэ уг валало, уг гажало, нош ми дорын тонэ ки выламы нулломы!

Телефон ужа

Туннэ Россиын ужа «пӧсь телефон» — 8-800-700-88-00. Та номеръя жингыртыса, тодыны луоз, ма кароно, матысь адямиед шӧдтэк шорысь лекоме, олокыӵе адямиослэн малпанзы вылэ чӧлске, огъя вераса, экстремизм малпанъёсын улэ ке. Кунамы терроризм секыт йыружен лыдъяське. Уголовной кодексысь 205-тӥ-208-тӥ но 280-тӥ-284-тӥ статьяосъя кыл кутон улэ сюремъёс пытсэт сьӧры кемалы шедё.

Ольга Корепанова

 

Удмурт Дунне
By Удмурт Дунне Сентябрь 13, 2016 12:15 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<