Николай Стрелковлэн рецептэз: Кызьы ӟеч эмчи луоно

Удмурт Дунне
By Удмурт Дунне 28 сентября, 2016 13:46
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
n-c-strelkov

28-тӥ сентябре Николай Сергеевич пусъе 65 арес тырмонзэ.

Николай Стрелков — одӥгез яркытэз  удмурт кизили. 1993-тӥ арысен со кивалтэ  Ижысь медициная кун академиен, нош эмъян удысын 1976-тӥ арысен ни. Нылпи  хирургез  Удмуртиын гинэ ӧвӧл, тодо Россиын но, кунгож сьӧрын но. 28-тӥ сентябре Николай Сергеевич пусъе 65 арес тырмонзэ.

Но юбилеезлы гань-гань дасяськыны амал ӧвӧл — ректор сюрес вылысь уг пыра, шуыны луоз. Тани толон кошкиз Перме — кӧня ке ар талэсь азьло Приволжск федерал округысь  медициная 5 вузъёс  кылдытӥзы асьсэлэсь кластерзэс — таӵеез быдэс Россиын ӧвӧл на. Пятницае вуыса, понедельниказ мыноно Москвае — Россиысь тазалыкез утёнъя министр Вероника Скворцова ортчытэ ректоръёсын кенешон. Озьы вылысьтыз вылаз. Чемоданъёстэс вошъяса вуттӥськоды-а, юаськом серекъяса. Кузпалы ваньзэ дася, пе, мар отчы тыре, тодӥсько ни сюрес вылысен.

Кемалась ӧвӧл одӥг командировкае ӵош укшам. Малпасько, быдэс сюрессэ медицина сярысь мадиськоз, дыр, та — астэ  мурт пуртые усемен шӧдод ни. Но Николай Сергеевич чорыг кадь уя вылэм котькыӵе удысын. Со огкадь тунсыко мадиське  эмъян но дышетон, политика но власть,  суредаськон но дуннеез котыръян сярысь. Огкылын вераса, туж вожъяськи медакадемиысь студентъёслы — Стрелков профессорлэн лекциосыз шӧдылытэк ортчо, луоз.

Николай Стрелков вордӥськиз Эгра ёросысь Карачум гуртын 1951-тӥ арын 28-тӥ сентябре.

Зура школаез йылпумъяса, пыриз Ижысь медициная институтэ.

1976-тӥ арысен — нылпи  хирургияя курсысь ассистент, 1988-тӥ арын  утиз кандидат диссертацизэ, 1990-тӥ арын юнматэмын педиатрияя факультетэ деканэ, 1991-тӥ арысен — дышетонъя проректоре, 1993-тӥ арысен — ректоре. 

1999-тӥ арын утиз «Патогенетические методы ранней диагностики и лечения острого гематогенного остеомиелита у детей» темая доктор диссертацизэ. Бадӟым уж  лэсьтӥз  Удмуртиысь калыклэсь улон гумырзэ вакчиятӥсь мугъёсты шараянъя но мукет.

Н. Стрелков кивалтон дыръя академиын усьтэмын ватсаса факультетъёс, кафедраос, диссертация утёнъя кенешъёс, дасямын 10 сюрслэсь трос врачъёс.  Дасяз 3 докторез, 22 кандидатэз, печатлаз 760 уж, со пӧлысь 7-ез — монография. Радъяз кунгож сьӧрысь 16 университетъёсын кусыпъёс. Со 62 патентлэн авторез, нылпи хирургиын вӧсьтэк йӧнатон амалъёс малпамез понна пусъемын  Удмурт Элькунлэн наука но техника удысысь Кун премиеныз.

2007-тӥ арысен Николай Сергеевич Удмурт Элькунысь Общественной палаталэн  тазалыкез утёнъя комиссиезлэн кивалтӥсез луэ, 2014-тӥ арын Россиысь Общественной палатае быръемын. 

16 ар ӵоже Николай Стрелков вал фин-угор калыкъёслэн Консультативной комитетсылэн ёзчиез, радъялляз тазалыкъя но демографияя комиссилэсь ужзэ. 

Удмурт Элькунысь тазалыкез утён удысысь дано ужась, Россиысь дано врач.

 

Но, жаль, али занятиосты уг нуиськы ни, пе. Нош азьвыл академиысь вань студентъёсты нимтулзыя, тусбуйзыя тодмалляз. Стрелков профессор лыдӟылӥз нылпи хирургияя лекциос.

— Капчи предмет ӧвӧл, студентъёсты жалялляды, луоз, тӥледыз каньыл адями шуо ук.

— Ӧй! — шуак паймытӥз Николай Сергеевич. — Мон ноку но уг вала сыӵе «жалясьёсты», со шонер ӧвӧл. Малпалэ ай, кыӵе врачез ми поттом, со тужгес кулэзэ но ӧз тоды ке? Экзамен мон кутӥсько одӥг пол, но сётӥсько на эшшо луонлык, зэм, сыӵе учыре со ужен выре ини кафедра. Студентъёслы котьку шуисько: азинлыко луон понна трос ик кулэ ӧвӧл, куинь гинэ рецепт: тыршоно, тыршоно, тыршоно! Тани учком гуртысь но городысь студентъёсты. Котьма шуэ, коть зарни  медален, коть сю баллэн мед пырозы, но гуртоос тодон-валанзыя нырысь-валысь туж бездыт адӟисько. Мон соослы шуисько: мон тӥледыз нырысетӥ курсын жаляло ай, но кыкетӥ курсозь тӥ мукетъёссэ сутыны кулэ. Тани учке, мон тӥ кадь ик — гуртысь, городэ лыктыкум, ӟуч кылын йӧназ вераськыны но уг быгатӥськы вал, но ректорозь асме ачим будэтӥ. Кылзӥсько, кыкетӥ-куи-нетӥ курсын зэмзэ но городысь эшъёссэс суто но, ортчо но.

Ачим студент дыръям ик фельдшер луыса ужай ни, уйёссэ дежурить карылӥ, но дышетсконме ӧй аналты. Интернатураын дыръям мыным  оскылӥзы ни пичи операциосты. Мукет студентъёс тушмоназы: малы  Стрелковез ассистентэ басьто, мукетъёслы уг оско? Деканмы шуылӥз: тӥ утчалэ кӧня ке уй изьытэк со сямен тыршыны… Азьвыл вакытэн ӵошатыса, али, огласянь, туж лякыт ужаны: сомында выль технологиос, аппаратура. Нош азьвыл оскон вал ас киосыдлы гинэ. Кӧня пиналэз утьыны ӧз луы полиомиелитлэсь ик, одӥг аре, тодӥсько на, 36 нуны кулӥз. Анайёссылэсь кайгуэн пачылмем ымныръёссэс али но тодӥсько на. Но одӥгез но врач вылэ ӧз омырскы, тодӥзы уго: одӥг эмчи но юромо урод уз кары. Ми лумбытэн операционнойысь ӧм поталэ.

— Нош кӧня адями утемын!

— Бен, со ик шунтэ сюлэмез. Туж тросэз, олокӧня аръёс ортчыса но, тау каро на, куд-огез дорам но вуылэ. Тодӥсько одӥг туж шуг операциез — таӵезэ нокытысь кылэме ӧвӧл. Ижын трамвай улэ сюре 12 аресъем нылаш. Со шори паньгатэмын вал, шуыны луоз. Ӝегатскытэк люкам тужгес усто хирургъёслэсь консилиумзэс, ваньмыз шуизы: со вормонтэм уж, нылаш уз чида, чидаз ке но, пыд вылаз ноку уз султы. Мон малпай: ватыны вуом ай, эскероно! Нылашез уйбыт выльысь бичам, шуыны луоз. Сӧсыргес-кырыжгес ке но, улэп кылиз. Со сярысь ивор вӧлмиз быдэс Совето Союзэ, центральной телевидение пыр ивор сётъязы, зэм, Ижын шуыса ӧз поттылэ, соку городмы пытсамын вал. Со дырысен ортчиз, оло, 30 ар, кылемаз юбилеям ӟечкыланы шуыса кабинетам тодмотэм кышномурт пыре. Тодмаськоды на-а, пе. Мон тӥляд бичам нылды! Тани ветлӥсько, карт но шедьтӥ, пинал но вайи! Мон гуньдӥ. Талэсь ӟеч кузьым мыным улонам ӧй вал на. Сыӵе ӟеч мылкыдын пырасьёс туж трос. Маин пунэмзэ берыктом, юало. Мон шуисько: таза луэ, кема улэ!

Ас вакытаз, шуге-леке шедем нылпиослы ӝог юрттэт сётыны мед быгатоз шуыса, Николай Сергеевич семьяеныз  юромо улӥз  нылпи больницалы матысь юртын. Врачез уго уйшор бере но ӧтьыло. Паймоно кадь,  кӧня ке ар талэсь азьло закон кутӥзы, дышетӥсьёслы эмъяны уг яра шуыса, озьы ректор академилэн ужъёсыныз гинэ выроно луиз на. Зэм, «гинэ» но уд шуы, угось хозяйствоез пичи ӧвӧл: кӧня ке дышетскон корпусъёс, лабораториос, общежитие, спортъя комплекс, нылпи сад… Ваньзэ сое  возёно, тупатъяно, солы уксё портоно.  Мукет вузъёслы тазалыкез утёнъя министерство араз 3-5 миллионэн висъя ке, Ижысь академилы — 30! Валамон ини, ваньмыз со потэ Н. Стрелковез кивалтӥсез сямен  гажам бордысь.

Зэм, берлозэ контракт гожтон азьын сое 9 толэзь курадӟытӥзы. Ректоре юнматэмзы бере ини Россиысь тазалыкез утёнъя министр Вероника Скворцова ачиз шуиз: вожъяськисьёсты трос, чагисько тани, но ми ваньзэ эскерим, тӥ — чылкыт.

Николай Стрелков, зэмзэ ке, быгатысал луыны политик но, бадӟымгес кивалтӥсь но. Сыӵе ӵектонъёс вал, но со туннэ но ас  интыяз.  Малы?

— Малы ке шуоно мон зэмзэ но аслам интыям, — данъяськыса вера ректор. — Мон, нялтас вераса, тодмо, дыр, вань кивалтӥсьёсын — азьлоосыныз но, алиосыныз но — ваньмыныз огкыл шедьтӥсько. Визь-кенеш юаса, Россиысь гинэ ӧвӧл, мукет кунъёсысь но тодмо адямиос жингыръяло. Бадӟым данэн лыдъясько фин-угор движение пыриськемме, 16 ар ӵоже мон фин-угор калыкъёслэн Консультативной комитетсылэн ёзчиез вал, кивалтӥ тазалыкез утёнъя комиссиен. Шумпотӥсько, мон «Удмурт Кенеш», удмурт калык понна маке-маке лэсьтыны быгатӥсько шуыса.

— Али тӥ клиникаын уд ужаське ни, уд мӧзмиське-а эмъян ужлэсь?

— Мон ужасько кабинетам. Ӵукна 7 но ӝыныысен калык черодын сылэ: визь-кенеш юало, учкыны куро. Собере жингыртыса верало ке, бурмим шуыса, асме туж шудоен шӧдӥсько. Инмарлы тау, монэ та удыслы сӥзем шуыса. Нялтас вераса, анае акушерка вал. Мон 2 пол кузпалъяськемын, кыкез ик кышноосы — эмчиос, нылы — офтальмолог. Кык пиосы техника удысэз бырйизы, но нырысетӥ юрттэт фельдшерлэсь урод уз сётэ.

— Тӥлесьтыд ноку адӟем ӧвӧл пазяськемдэс, керетэмдэс, ӝожтӥськемдэс — тӥ  котьку  огкадь…

— Мӧзмыт?

— Ӧвӧл,  оскымон.

— Малы ке шуоно мон эмчи.

 Зинаида Рябинина

Удмурт Дунне
By Удмурт Дунне 28 сентября, 2016 13:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<