«Шунды» огазеяськонлэн конференциез ортчоз

Удмурт Дунне
By Удмурт Дунне 6 сентября, 2016 13:24
Берло 4 арзэ «Шунды» огазеяськонэн кивалтэ Ольга Тронина. Со кивалтэм улсын уно проектъёс улонэ пыӵамын.

Берло 4 арзэ «Шунды» огазеяськонэн кивалтэ Ольга Тронина. Со кивалтэм улсын уно проектъёс улонэ пыӵамын.

15-тӥ куарусёнэ егитъёс берло 2 ар ӵоже ужамзылы йылпумъянъёс лэсьтозы, огазеяськонлы выль кивалтӥсь быръёзы.

Берло 4 арзэ «Шунды» огазеяськонэн кивалтӥз Ольга Тронина. Та дыр џоже «Шунды» огазеяськонлэн выль ёзъёсыз усьтӥськизы Вавож, Сьӧлта, Балезино, Кез, Глазов ёросъёсын но Сарапул карын, выль кужымен ужаны кутскизы Дэбес, Алнаш, Якшур-Бӧдья ёросъёсысь, Глазов карысь егитъёс.

— Выль проектъёсты улонэ пыӵатӥм, ас пуртыямы гинэ ӧм пӧзе, улосвылъёсы потам, мукет огазеяськонъёсын валче тыршим, — вера Ольга Тронина. — Мерлыко ужен вырон понна дун уг тыро, соин ик егитъёслэсь, ёрос ёзъёсын кивалтӥсьёслэсь мылкыдзэс ялан ӝутъяно, котыр ласянь юрттӥськоно луэ. Ачим понна но «Шунды» — бадӟым но мертантэм школа. Кыӵе вал мон азьло но кыџе али — бадӟым пӧртэмлык. Калыкен ужан — со бадӟым кыл кутон.

Берло дыре «Шунды» огазеяськонлэн нимыз шаерамы ӵемгес чузъяськыны кутскиз. Уго солэн проектъёсыз вылысьтыз вылаз вордӥсько. Тужгес адӟем карымонъёсыз, кызьы вера Ольга Тронина, со егит кырӟасьёслы, крезьгурчиослы но кылбурчиослы «Куарагур», клипъёс лэсьтонъя «Кизили пус», визь сынанъя «Шудком» проектъёс. Бадӟым уж нуиз «Арт-экспедиция» команда: быгатӥсь егитъёс Удмуртиысь но бускель улосвылъёсысь гуртъёсы потазы, отысь туала культураен тодматӥзы. Шумпотымон, егитъёс, «Шунды» школа пыр потыса, асьсэос но проектъёс борды кутско. Кылсярысь, огазеяськонлэн правлениезлэн ёзчиез Анастасия Тутаева нылпиос понна удмурт кылбуръёсын, шудонъёсын, видеоурокъёсын «Чингыли» диск дася.

шунды

15-тӥ куарусёнэ конференцие вуозы 19 ёросъёсысь но каръёсысь, Татарстанысь, Комиысь, Башкириысь делегациос.

15-тӥ куарусёнэ конференцие вуозы 19 ёросъёсысь но каръёсысь, Татарстанысь, Комиысь, Башкириысь делегациос. Соос быръёзы выль кивалтӥсь но правление. Со сяна, уж нуиськоз 4 секциосын. Егитъёс ёросъёсысь но улосвылъёсысь ёзъёслэсь шуг-секытъёссэс сэрттозы-пертчозы, тодматскозы удмурт нылпиослэн «Шундысиос» движениенызы, эскерозы, кызьы ивор вӧлмытӥсь ёзъёсты уже кутоно,  «Шунды»  огазеяськонлэсь али проектъёссэ азинтоно.

Ольга Тронина «Шундылэсь» уз палэнскы. Вуоно кивалтӥсьлы юрттӥськоно, выль малпанъёсты улонэ пыӵатоно на.

Мария Векшина

Туспуктэм: «Шунды» огазеяськон

 

Удмурт Дунне
By Удмурт Дунне 6 сентября, 2016 13:24