Шудо вал… Улонысь кошкиз писатель Константин Емельянов

Удмурт Дунне
By Удмурт Дунне 22 сентября, 2016 10:45
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
emelyanov

Сюлмаськиз бадӟым емышо сад будэтон сярысь.

22-тӥ сентябре улонысь кошкиз Эгра ёросысь Мазьги гуртын улӥсь писатель Константин Емельянов. Ужысь ветеран пусъемын уно данъян грамотаосын, трос аръёс ӵоже нуллӥз «Коммунистической ужысь ударник» нимез, луэ дано колхозник но Эгра ёрослэн дано адямиез.

 Вань улонзэ вордскем гуртаз ортчытэмын ке но, удмурт лыдӟисьёс К. Емельяновлэсь нимзэ ӟеч тодо. Серемес веросъёсыз, повестьёсыз мылкыдэз бурдъяло, улыны дышето. Нырысетӥ гожтэмез потӥз 1942-тӥ арын  Эгра ёросысь «Сталин сюрес» газетын. Отӥяз печатласькиз «Советской Удмуртия» («Удмурт дунне») газетын, «Молот» («Кенеш») журналын. Пичи иворъёс бордысен кутскыса, очеркъёс, веросъёс но серемес чуръёс гожъяз. «Ветлӥ меда, ӧй меда?» (1971-тӥ ар), «Бускельёс» (1975-тӥ ар), «Эшъёсы-юлтошъёсы» (1978-тӥ ар), «Пилиськем горшок» (1989-тӥ ар) книгаосыз потӥзы.

Константин Емельянов бадӟым семьяын будэмын. 4 пинал пӧлысь нырысетӥез вал. Юртъер котырын бергам сяна, пичи сузэр-вынъёсызлы но котыр ласянь быгатэмезъя юрттӥськыны тыршиз. Аслэсьтыз но 4 пиналъёссэ ӟеч будэтӥз, ваньзылы вылӥ образование басьтыны луонлык сётӥз. Кенъёссэ, эмеспизэ аслаз карылӥз, внукъёссэ туж яратӥз, улыны визь-нод сётылӥз. Пельыз ляб кылэмен, Быдӟым оже ветлытэк кылемын. Пиналысен трактор руль сьӧры пуксьыса, пенсие потытозяз, колхозын тыршиз.

Берло 17 арзэ Константин Васильевич огназ улӥз. Угось кема висемез бере кузпалыз Галина Фёдоровна улонысь кошкиз. Огназы кылем воргоронъёс ӵем дыръя юон пӧлы выё, нош Константин Васильевич сыӵеос пӧлысь ӧй вал. Сюлмаськон-мӧзмонзэ вормыны юрттӥз юрт котырын бергамез.

Быдэс нуналэз часэн-минутэн радъямын вал. Ачиз сиськытэк кылёз, нош животсэ дыраз сюдоз. Ваньзэ нуныялоз, вешалоз.

Сюлмаськиз бадӟым емышо сад будэтон сярысь. Садэз емышъёсын туэ нырысьсэ шумпоттӥз. Жаляса верано, садзэ ас синъёсыныз адӟыны, садаз потаны Константин Васильевичлэн кынарыз ӧз тырмы ни.

Константин Васильевич ноку ӧз эшъяськылы урод сямъёсын, улытозяз кӧё-вӧё сиёнлэсь утиськыны тыршиз. Тужгес яратӥз табанез, сое ачиз ик пыжылӥз. Яратоно интыез гур выл, гур йӧнатэ но, кужым но сётэ, шуэ вал со.

Тазалыкез вылэ ӧз ӝожтӥськылы, синъёсыз ляб адӟем пумысен гинэ лулӟылӥз, угось лыдӟиськемез туж но туж потылӥз. Выль журнал-газетъёслэсь вуэмзэ пӧсь табанез кадь витьылӥз, букваосты кык лупаен учкылӥз. Лыдӟиськем сяна, мыло-кыдо гожъяськиз. Берло дыре ини, лябӟыны кутскыса, ручка борды шергес басьтӥськылӥз. Туэ гужем берпум чуръёссэ, улонысь учыръёссэ, гожтыса кельтӥз.

Алигес сое шумпоттӥз вал ӟеч ивор: «Удмуртия» издательствоын потыны дасяськись «Яратонэз уд алда» бичетэзлэсь вылбамзэ ас киосыныз кутылӥз. Сыӵе шумпотӥз, пичи пинал сямен синвуаськиз.

Константин Васильевич ӧз яратылы трос калык люкаськон интыосты, уката ик вордскем нуналзэ пусйыны. Ӵапак туннэ, 23-тӥ сентябре, солы 90 арес тырмысал. Одӥг нунал ӧз чида вордскем нуналэз дорозь. Калыкын юнме шуиллямтэ: шудо адямиос вордскем нуналзы котырын улонысь кошко.

Лобась тэркы

Валентина Емельянова

Удмурт Дунне
By Удмурт Дунне 22 сентября, 2016 10:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<