«Шаере — Удмуртия»: Гуртлэн вакытэз

Удмурт Дунне
By Удмурт Дунне 20 сентября, 2016 10:32

Шаерамы ваньмыз лэсьтӥське, калыклэн улон-вылонэз умойгес мед луоз шуыса. Тае адямиос шӧдытэк уг кылё.

miron

Елена Миронова, Удмуртстатлэн кивалтӥсезлэн воштӥсез:

— Улонэ лыдъян-чотанэн герӟаськиз бере, шаермес ӵошатыны быгатӥсько мукет улосъёсын. Данъяськыны вань маин. Котькуд 1 сюрс адямилы быдэ пуктэм улоно юртъёсъя Удмуртия Приволжск федерал округын 5-тӥ интыын. Туэ 8 толэзь ӵоже шаерамы пуктэмын 7 сюрс 467 квартира. Кылем арысь та вакытэн ӵошатыса, со 22 процентлы уногес. Макем азинске гурт удыс, промышленность, сокем ӟечгес улон-вылон луэ. Туэ промышленность удысын вуз поттон 4,4 процентлы йылӥз ни. Сиён-юон поттон но ялан будэ. Кылсярысь, 20 процентлы уногес поттыны кутскимы нӧкы вӧй, 16 процентлы — сӥль. Гуртоос 43 миллиард манет тыр вуз поттӥзы ни.  Со дыре ик дунъёс огкадь возисько. 8 толэзь ӵоже шаерамы инфляция 2,2 процент луиз, Россиын — 3,9. Уждун пумен йылэ. Июль толэзе шоро-куспо уждун 25 сюрс 944 манет лыдъяськиз. Кылем арен ӵошатыса, та 5,3 процентлы бадӟымгес. Уждунлэн быдӟалаезъя Удмуртия Приволжск федерал округын 6-тӥ интыын (1-тӥ интыын — бадӟым уждун).

2-16-1Владимир Савельев, медицина наукаосъя доктор:

— Удмуртиын кадь небыт калыкез уд шедьты ни. Эмъян удысын мон 1953-тӥ арысен ни: фельдшер луыса ужаны кутски, тазалыкез утёнъя министр но вал. Министр дыръям уката сюлмаськи гурт калык понна: тросаз гуртъёсын вуэн, канализациен фельдшер-акушер пунктъёс усьтӥм. Али но эмъян удысын ӧжыт уг лэсьтӥськы: больницаосы табере  пуктылэмын туала куронъёслы тупась тӥрлык. Томографъёс гинэ шаерамы 10 ини, мон министр дыръя одӥг но ӧй вал. Табере котькуд ёрос центръёсын УЗИ кабинетъёс вань — мон дыръя соос но ӧй вал. Туж умой, туэысен гуртъёсы ФАП-ёс выльысь усьтыны кутскизы.

Удмуртиын туж секыт вакытэ ай, 1933-тӥ арын, усьтэмын мединститут. Ижысь медициная кун академиын дышетскыны мылкыд карисьёс палэнын но туж трос. Угось врачъёсты уг дасяло артэ Кировын но, Сыктывкарын но, Саранскын но. Та понна гинэ но вожъяськыны луэ ни асьмелы.

крылов

Михаил Крылов, Алнаш ёросысь «Молодая гвардия» хозяйствоен кивалтӥсь:

— Аслэсьтыд шаердэ кызьы уд яраты? Со тонэ вордӥз, будэтӥз, адямие поттӥз. Соин, лэся, шаере понна ужамъя ужам потэ. Уката ик али хозяйствоослы государство ласянь бадӟым саклык висъяськыны кутскиз. Котькуд кыскем литр йӧллы но котькуд мерттэм гектар музъемлы субсидия дыраз вуэмен, гырон-кизён ужъёсты рос-прос быдэстыны луонлыкъёс кылдо. Фермаос пуктыны юрттэт вуэмен, котькуд ёросын гидъёс ӝужало. Алнаш ёросын ик али 3 ферма пуктӥське. 1 скал возён интылы 50 сюрс манет сётӥське уго. Озьыен, ферма пуктыны понэм вань уксё пӧлысь ӝыныез сямен хозяйстволы берен берыктӥське. Ми но хозяйствоямы, 600 йырлы чакласа, туала ферма пуктыны малпаськомы. Гидъёсты компьютеръёсын но роботъёсын узырмытытэк нокызьы уг луы — ужась уг тырмы. Азьло егит механизаторъёсты секыт вал комбайн сьӧры пуктыны: кабинаын пӧсь, техника тӥяське. Али тӧдьы дэремен ужаны лыкто — кондиционерез вань, чылкыт. Зэм, шуг-секытъёс кылдыло, но соосты вормыса, эшшо золгес азинскиськод. Али котькуд коркан газ кыскемын. Сюресъёсъя фонд юрттэмен, гурт поселениысь ваньмыз сюресъёс щебёнкаен шобыртэмын. Гуртлэн самой улоно но ужано вакытэз али.

Елена Сараматова

Удмурт Дунне
By Удмурт Дунне 20 сентября, 2016 10:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<