Руль сьӧрын эн зульы

Удмурт Дунне
By Удмурт Дунне Сентябрь 8, 2016 16:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
068795motocikttransport

«Учебная езда» — право басьтыны мылкыд карисьёслэсь ульчаостӥ ворттылэмзэс эскерозы, «Номер» — шонертэм машина номеръёсты утчалозы, «Пешеход» — сюрес вамен лэзьымтэ интыетӥ потасьёсты кутылозы, «Школьный автобус» — дышетскисьёсты нуллӥсь водительёсты чаклалозы но мукет.

Шаерамы йыло мотоциклэн ворттылӥсьёс. Соин валче полициын малпамын кылдытыны мотовзвод.

Сюрес вылысь югдурез чакласьёс матысь дыре пуксёзы мотоосы. Та сярысь ивортӥз ГИБДД-лэн шаермыя управлениезлэн кивалтӥсез Александр Коробейников.

Удмуртиысь инспекторъёс адӟем каро Киров но Пермь улосъёсысь югдурез чакласьёслэсь. Отын мотоен яке скутерен куронъёс-ты тӥяса ворттылӥсьёсын нюръясько мотоотрядъёс. Асьме отрядын луоз 10 полицейской. Ужалоз со гужемъёсы гинэ. Угось ӵапак пӧсь куазен йыло кышкыт учыръёс. Мотоциклъёс олокыӵе мудронэсь уз луэ. Огез усёз 700 сюрс манет тыр. Югдурез утисьёс соосты ас сяменызы буялозы, отчы шулась-жиетӥсь тӥрлык пуктозы.

—  Али шаерамы мынэ «Мотоциклист» операция, — вера Александр Коробейников. — Июль шорын Сарапул-Ижевск сюрес вылын бадӟым машиналэн питранъёсыз улын быриз 2 адями. Соос скутерен ворттыло вылэм. КамАЗ-лэн водителез кудӟемын вал. Шуккиськемзы бӧрсьы пегӟиз. Но сое инспекторъёс шаплы кырмизы. Шаркан ёросын 2 агай-вынъёс чорыгамысь кудӟыса мотоен доразы берто вылэм. Но гуртсэс воштӥз эмъяськонни…

Ӝог юрттэт сётӥсьёслы куддыр асьсэлы юрттэт кулэ. «Скорой» машиналы сюрес сётымтэен сэрен туэ 8 шуккиськон пусъемын. Соин валче шаерамы ялэмын «Маячок» операция. «Скоройлы», тылпу кысӥсь машиналы сюрес пытсасьёсты инспекторъёс визьмало: 500 манет тыриськон сёто яке 3 толэзьлы правозэс талало.

— Шуккиськонъёсты эскерыса, валамы: уноез водительёс «скоройлэсь» шуламзэ уг кыло — машина тыр лэзьыса, радио кылзо, — шуэ А. Коробейников. — Сюро сыӵеосыз но: стоп-гож доры дугдо но уг вырӟыло — камералэсь кышкало. Со шонертэм. Ӝог юрттэт сётӥсьёсты одно лэзёно. Зэм, горд светофор ӝуаку стоп-гожез ортчемъёслы штраф вуэ ик. Но югдурез валэктыса куриськон гожтӥды ке, тыриськоно уз луы.

Туэ ӝыны ар ӵоже республикаын 831 шуккиськон пусъемын. 1 сюрслэсь ятыр адями вӧсь луэмын, 74-ез быремын. Тросэз кышкыт учыръёс кылдэмын, мынӥсь машинаосты кельтыны вырыку.

— Сюрес вылын пичи шуккиськон луэ ке, — валэктэ кивалтӥсь, — полицейскойёсты  витёно ӧвӧл. Угось инспекторъёс вань таӵе учыръёсы потаса уг вутто. Тэшкам машинаез нырысь туспуктоно, собере сюрес урдсы кысконо — мынӥсь-ветлӥсьёслы медаз люкеты. Туспуктэмен ӵош лыктоно дорамы. Соку кутскомы та учырез дыртытэк эскерыны.

Югдурез утисьёс та вакытэ дасясько пӧртэм операциослы: «Учебная езда» — право басьтыны мылкыд карисьёслэсь ульчаостӥ ворттылэмзэс эскерозы, «Номер» — шонертэм машина номеръёсты утчалозы, «Пешеход» — сюрес вамен лэзьымтэ интыетӥ потасьёсты кутылозы, «Школьный автобус» — дышетскисьёсты нуллӥсь водительёсты чаклалозы но мукет.

— Руль бергатыку, телефонэн вераськыны уг яра, — азьланьтэ веранзэ Александр Александрович. — Но та куронэз тросэз санэ уг басьто. Вунэто, лэся, та понна 1 сюрс 500 манет штраф тупатэмын шуыса. Зэм, адямилэн янгышез одно ик плёнка вылэ гожтэмын луыны кулэ.

Уноез водительёс сюлэмшугзэс кисьто: тыриськонъёсын гожтэтъёс беромыса вуо. Кылсярысь, Ижын со 5 нунал лыктыны выре. Мар веранэз пыдлось гуртъёс сярысь… Югдурез тупатыны луэ. Со понна куриськон гожтоно. Отын пусъёно электрон адресэз. Озьы тыриськон сярысь иворъёс нуналаз ик вуозы.

— Туэ 6 толэзь ӵоже мынон-ветлон правилоос 300 сюрслэсь трос пол тӥямын вал. Водительёс я кудӟыса руль сьӧры пуксё, я урмыса ширто, я сюрес вамен потӥсьёсты уг лэзё, я нылпиоссэс креслотэк ворттылыто… 151 пинал сюрес вылын вӧсь луыны шедиз. Пӧлысьтызы уноез машинаын думиськытэк пукиллям. Приволжск федерал округысь улосъёсын ӵошатыса, Удмуртиын та ласянь югдур умой ӧвӧл. Башкортостанын пичиосты креслотэк нуллӥсьёс 1,8 процент шараямын. Асьме дорын та лыдпус 33 процент.

Инспекторъёс сяна, сюрес вылысь югдурез утё асьсэос водительёс но. Правилоосты тӥяса ворттылӥсьёсты видеое гожто, сое ГИБДД-е келяло. Куддыр жингыртыло — кижи-кожи, дыг-мог мынӥсь машинаослэсь номеръёссэс иворто.

— Таӵе юрттӥсьёсмылы ми туж шумпотӥськомы. Укылтэм водительёсты адӟиды ке, жингыртэ (3412) 415-700, 415-701 телефон номеръёсъя. Татчы ик вазиськыны луоз, полицейской сюрес вылын уксё куре ке. Ми ужасьёсмес сак эскериськомы. 2-ез вылэ кузьым басьтэмзы понна уголовной уж ӝутэмын ни, — веранзэ йылпумъяз А. Коробейников.

Ольга Корепанова

Туспуктӥз А. Горбунов

Удмурт Дунне
By Удмурт Дунне Сентябрь 8, 2016 16:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<