Пётр Акмаров быдэс улонзэ сӥзиз гуртоослы

Удмурт Дунне
By Удмурт Дунне 23 сентября, 2016 13:03
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
akmarov

Ижысь гурт удысъя кун академиысь дышетон ужъя проректор Пётр Акмаров.

«Мон туннэ но дышетскисько»  

Удмурт тодосчи, профессор, Ижысь гурт удысъя кун академиысь дышетон ужъя проректор Пётр Акмаров 23-тӥ куарусёнэ пусъе 60 арессэ.

— Пётр Борисович, юбилейдэс кыӵе мылкыдын пумитаськоды?

— Мылкыд пӧртэм. 60 аресъем юбилей — улон вакытэз мертаны тупатэм дыр. Мышке учкыны луэ, валаны, мар лэсьтэмын, нош мар быдэстоно на.

Мынам вань улонэ герњаськемын гуртоослэсь ужзэс капчиятыны тыршонэн. Таин сэрен но 23-тӥ куарусёнэ радъяське конференция.  Россиысь лыктэм тодосчиос эскерозы гурт удыслэсь туннэ но џуказе нуналзэ. Со сяна, вераськозы, кыџе инты басьто экономистъёс, юристъёс гурт удысэз азинтонын. Россиысь Дышетонъя но наукая министерстволэсь гурт удысъя академиос шоры учконзэ воштоно. Туннэ гурт удысэ специалистъёсты дасян лябӟе. Кылсярысь, экономистэ дышетскыны бюджет интыос ялан кулэсмо. Но њеч экономист бордысь ик потэ хозяйстволэн џуказе нуналыз.

Проректор луыса 15 ар ужатозям, быдэс командаен ӵош быгатӥмы вал ни калыклэсь академилы осконзэ асьме пала берыктыны.  Гуртысь егитъёс ми доры капчиенгес пырыны, ми дорын капчиенгес дышетскыны мед быгатозы шуыса, кӧня-кӧня кужым понэмын! Егитъёс туннэ ми доры шумпотыса лыкто. Диплом басьтэмзы бере но уго уже интыяськыны юрттӥськомы. Гуртысь потэм егит муртлы сётыны кулэ оскон, солэн юрттӥсез вань шуыса. Озьы со кужмогес луэ, быгатыса дышетскыны кутске.

Аслам но улонам вӧзам котьку вал умой адямиос. Вордӥськи Ува ёросын. Атае 5-тӥ классын дышетскыкум, анае студент дыръям кулӥзы. Тау, умой дышетӥсьёс мыным сюризы. Али но котырысьтым коллективе туж умой — дэмен вань шуг-секытъёсты вормиськомы.

— Куке малпады-а, кивалтӥсёзь ӝутӥськоды шуыса?

— Ноку ӧй малпалля. Пичи дыръям туж яратӥ математикаез но физикаез. Аслым ваньзэ тодӥсько кадь потылӥз. 8-тӥ классын дышетскыкум, Ижысь медакадемиын дышетскись апае вайиз студентъёслы чаклам физикая учебник. Книгазэ учкисько но номырзэ уг валаськы. Йыры кур луиз: малы адямиос валало, нош мон уг? Аслым шуи: одно валаны кулэ! Но ваньзэ валан понна ялан ас бордад ужано, тодон-валандэ ялан будэтоно. Соин ик мон туннэ но ас поннам дышетскисько, котыр ласянь  визь люкасько. Туж потэ нылпиосылэн пиналъёссылы  но образование сётэме.  Мынам кык нылпие, котькудӥзлэн быдэн 2 нылыз. Соос шудо луизы ке, мынэсьтым шудоез уз луы.

— Мар туннэ эшшо сюлмаськытэ тӥледыз? Мае лэсьтыса ӧд вуттэ на?

— Научной ужме азьланьтэме потэ. Гурт удысэз азинтонъя экономической модель кылдытысалмы ке, хозяйствоослы ужаны трослы капчигес луысал. Кылсярысь, туэ малпаськомы вал бадӟым урожай басьтыны. Куазь малпанэз быдэстыны ӧз сёты. Гуртоос 1 миллиард манет тыр ыштон адӟизы. Нош кунгож сьӧрын урожайзы куазь бордысь уг поты. Технологиоссы юртто урод куазен но трос пудо сиён но ю тысь люканы. Соос дышизы ни, ӧжыт уксё кисьтыса, трос урожай басьтыны. Экономической модельёс бордын ужало уго. Со ужпумез асьмеос но быдэстысалмы ке, кык-куинь арлы ке но азьпала вераны  быгатысалмы, мар асьмемыз возьма.

— Дась-а туннэ хозяйствоос моделья ужаны? Асьмеос тодӥськомы уз шуэ-а?

— Хозяйствоослы валэктыны быгатӥмы ке модельлэсь пайдазэ, соос асьсэос мылкыд карозы научной ужез удысазы кутыны. Выль тодон-валанъёстэк, выль технологиостэк туала вакытэ азинскыны уг луы.

— Но выль технологиосын ужаны егитъёс кулэ. Асьмелэн соос гуртъёсын уг тырмо.

— Соиз шонер. Асьмелы туннэ уг яра наука сярысь гинэ вераськыны. Наукаез азинтыны быгатӥсь специалистъёсты дасяны ӧм быгатэ ке, ужаммылэн пайдаез уз луы. Но специалистъёсты дасян сяна, кулэ на кун ласянь бадӟым юрттэт.  Кунгож сьӧрын но юрттэттэк ужзэс азьланьтэмзы уг луы. Россиын берло дыре вылӥ кивалтӥсьёс гурт удысэз син шоразы возё. Нырысь ик адямиослы улон но ужан условиос кылдытоно, соку калык мылысь-кыдысь ужалоз. Зэм, одӥг ӧрез гинэ азинтыны уг яра — ваньзэ ӵош ӝутоно. Кутсконо сыӵе удысъёс бордысен, кудъёсыз мукетъёссэ но ӝутозы. Кылсярысь, гурт удысын 1 ужан инты кылдытыса, 10 адямилы ужаны луонлык сётӥськомы. Гуртэз азинтӥмы ке, выль сямен шокчозы переработка, промышленность но мукетыз.

— Кызьы малпаськоды, хозяйствоосты экономика ласянь юнматон понна мар бордысен кутсконо?

—  Тросэз малпало: уксё тросгес басьтом но, уж мыноз. Озьы уг луы. Вавож ёросысь «Колос», Мичурин нимо хозяйствоос, Вотка ёросысь «Пихтовка», Грак палъёсысь «Родина» но шаерысьтымы мукет азьмынӥсь хозяйствоос умой азинтӥськизы, отчы рос-прос кивалтӥсьёс сюрыса гинэ. Соин ик хозяйствоосты юнматыны кутсконо кивалтӥсьёс бордысен. Кивалтӥсь ас удыссэ тодӥз, выль технологиосты пыӵатӥз, адямиоссэ ӝутӥз, гуртысь улон-вылонэз умоятӥз ке, хозяйствояз уж пӧзёз.

Экономикаын закон вань: 1 манет понӥд, 2-3 ар ортчыса, со тыныд 100 манетэн берыктӥськоз. Егит специалистлэсь но нырысь-валысь пайдаез сокем ӧвӧл, но со шӧдӥз ке, сое дунъяло шуыса, выль технологиосты ужаз кутӥз ке,  эшшо умойгес тыршыны кутскоз.

— Шаерамы арлы быдэ 5 хозяйство банкрот кыле. Ог 30 процентэз хозяйствоос лябесь. Лябъёссэ юнъёсыныз огазеянлэн пайдаез вань-а?

— Куд-ог хозяйствоослэн огазеяськыны мылкыдзы вань. Ӵапак сыӵеосты юнъёсыз борды кароно. Соку пайдаез шӧдскымон луоз. Куд-огезлэн мукетъёсын огазеяськемез но, ас понназ ужамез но уг поты. Соосты кужмысь карыны кулэ ӧвӧл. Сыӵеос асьсэ коже но, муртлэн бурд улаз но кема уз улэ. Вотка ёросын 3-4 ар талэсь азьло агрокомплекс кылдытъязы, отчы вань хозяйствоосты огазеязы. Но одӥг кыткетын ужамзы ӧз луы. Зэм, куд-ог хозяйствоосты нокин борды карыны — вӧзазы юнэсьёсыз ӧвӧл. Но соосты но юнматыны луэ, умой кивалтӥсь шедьтыса.

Куд-ог студентъёс гуртсы понна сыџе «висьыса» лыкто! Рос-прос дышетскыса, хозяйствозэс љутыны берытско. Сыџе егитъёс шоры учкыса, валаськод: гурт улоз на! Сыџе сюлмо егитъёс понна ик ужамъя ужам потэ!

Елена Сараматова

 

 

 

Удмурт Дунне
By Удмурт Дунне 23 сентября, 2016 13:03
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<