Надежда Уткина: Улон — сяська керттэт

Удмурт Дунне
By Удмурт Дунне Сентябрь 24, 2016 08:56
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
utkina

Надежда Уткина.

Надежда Уткина пушкын, паймымон, ог-огзылы люкетытэк, уло кык пӧртэм дуннеос: кырӟан но проектъёс бордын ужан. Мар гинэ медаз лэсьты Удмуртиысь калык артистка, со быдэстэ одӥг ужпумез — Удмуртиез тодматыны дуннеен, дуннеез — Удмуртиен. 24-тӥ куарусёнэ Надежда Эдуардовна котырес лыдпуссэ пусъёз… Ижысь зоопаркын благотворительной концертэ пыриськыса.

— Тӥ вордӥськемын Валлэн араз, ужъёстыя но адӟиськом, вал кадь ужась шуыса.

— Бен, вордӥськи Огненной валлэн араз. Та аре вордӥськем адями семья, пе, бер кылдытэ (кӧня пиосмуртъёслэсь сюлэмъёссэс пили), улонэз ялан пӧзе. Юбилейной концертам ӧтёно адямиосын ту-у-уж кузь список дасяй — экран вылысен возьмато, мар бордысь ваньмыз кутскиз-потӥз. Со нырысь ик семьяе, собере дышетӥсьёсы, пӧртэм пумо проектъёсы.

Мон улӥсько аслам малпам мифеным: монэ анай-атаен катанчи сьӧрын кылдытӥзы. Анай-атае, Эдуард Уткин но Маша Михайлова, егит дыръязы ветлӥзы Анатолий Митрофановлэн калык театраз — куиньназы ик туж матысь эшъёс вал.

Пичи Пурга школаын А. Иванов дышетӥз гитараен шудыны, кырӟаны. Университетын дышетскыкум, «Чипчирган» ансамбле мынӥ. Р. Анкудинова дышетӥз асме сцена вылын возьыны, ветлыны, куинь куараен кырӟаны. Соку нырысетӥ гастролям потай — Шарканэ. Со сяна, ветлӥ англи кылын кырӟанъя ансамбле. Валай, кылэз кырӟан пыр но дышетыны луэ шуыса — «Битлз» группалэсь, Америкаысь, Англиысь калык кырӟанъёсты али но шумпотыса быдэсъясько.

egnit-dyr

Егит дыр.

— Студент дыръяды ик котькытчы пыриськиськоды вылэм, но семья кылдытыса,  кошкиллямды гуртэ — Ува ёросысь Жужгесэ.

— Картэ сьӧры, кызьы верасько, декабристка выллем, ссылкае кошки. Соку мон огшоры дышетӥсь вал. Ӧй быгаты гуртын улыны, шӧдӥ, мон — лобась ӵӧж — пытсэт сьӧрын пукисько шуыса. Но! Жужгесын улыкум, мон «Шунды» огазеяськонэн тодматски. 1990-тӥ арын Иже удмурт егитъёслэн Выль аразы вуылӥ. Кутскиз общественной ужен вырон вакытэ — пиме кельтыса, Иже автобусэн пӧртэм ужрадъёсы пегалляй. «Шунды» огазеяськон мыным удмурт кылэз «сётӥз». Отчыозь удмурт сямен кык кылэз но герӟаме уг луы вал. Сыӵе возьыт, мон азьветлӥсь, «Шундылэн» кивалтӥсез, но уг тодӥськы анай кылме. Кутӥ но кутски вераськыны. Жужгесын ик мон кырӟанъёс гожъяны кутски. Огвакытэ кризисэ усьылӥ, мынӥ библиотекае: вае, шуисько, мыным удмурт нылкышно поэзидэс. Сётӥзы Людмила Кутяновалэсь, Татьяна Черновалэсь, Галина Романовалэсь кылбур бичетъёссэс — удмурт нылкышно кылбурет мыным вӧл-вӧл бурдъёс сётӥз. Соку нуналлы быдэ 2 кырӟан гожъялляй.

— Дас ар талэсь азьло шуиды вал, кырӟась адями шудтэм луэ шуыса. Малпанды воштӥськиз-а?

— Али егит крезьгурчиослы, кылбурчиослы визь-нод сётысал: эн гожъялэ шудтэм луон сярысь. Кыӵе мылкыдъёсын улӥськод, сыӵе ик тынад улонэд. Ярам, кылбур гожтод но сое кагаз вылэ лушкемак кельтод, но кырӟанэз сцена вылысен калык азьын быдэстоно. Малы меда мон сомында аръёс ӵоже шудтэм яратон сярысь кырӟалляй? 200 пала кырӟанъёсы вань, нош юбилеелы сӥзем концертам табере поттыны номыре.

Али улон шоры капчиенгес учкисько ни, капчигес мылкыдын кырӟаме потэ. Сямы берло дыре гань-ганьгес луиз. Катя эше но шуэ: тынад Жераред (али картэ) сыӵе зол тонэ воштӥз. Дӥськутэя но шӧдӥсько: картэлы кельшо гань-гань буёлъёс, мон но табере яратыны кутски югыт буёлъёсты, азьвыл ветлӥсько вал ворпо  этнодӥсен.

Тау карон кырӟанъёс гожъяны кутски — музъемлы, воргоронлы, пиелы, пересь анаелы, калыклы. Али туж потэ балладаос кылдытъяме. Соослэн сюжетсы, историзы, кужмо сямзы вань — кылдэ театр.

— Но кырӟанъёсты но юнме ӧвӧл ук. «Ой, сюлмы, сюлэмы» кырӟандэс, кылсярысь, котькуд гуртын тодо.

— Алигес, концерт сётъяса, вуылӥ Яр, Балезино ёросъёсысь пыдлось гуртъёсы, отчы нокин но уг ветлы. Кырӟанъёсме калык бӧрдыса кылзӥськиз. Со психотерапия кадь, та вие мон асме эмъясен но лыдъясько. Со гуртъёсы потано на, малпай. Одно ик.

Егитгес дыръям кыр-ӟанъёсыным мон калыклы выль тодон-валан, мылкыд сётӥсько вал, нош али ортчем улонзэс, мылкыдъёссэс, малпанъёссэс  бугыртэме потэ. Аспӧртэм «машина времени» кылдытысал. Адямиос, выльысен «Зоры, зоры, зорыез» кылыса, мед 20 ар талэсь азьло улоназы берытскысалзы: оло, соос кинлэн ке шайвылаз ӧз ветлэ, оло, кинлы ке вӧсь каризы. Ваньзэ тупатыны, лэсьтымтэзэ лэсьтыны бер ӧвӧл на.

utkinatrio

Женеваысь ансамблен ӵош.

— Нош мар муген поръясь кырӟась мылкыддэс нуналлы быдэ сӥнырез тӥясь проектъёслы воштӥды?

— Выль инвис усьтӥськиз. Филармониын ужакум, монэ ыстӥзы стажировкае Англие. Уэльсысь эше Гуин Уильямс визь-нод сётӥз: эн кышка вылез борды басьтӥськыны, бер ӧвӧл на (соку мыным 36 арес вал). Проектэн вырисьлэн, артистэн ӵошатыса, тросгес луонлыкъёсыз, сюресэз но кузьгес. Кылсярысь, Гуин Уильямс трубач сямен быдэс Уэльсын тодмо ни, вылӥегес тубыны липетаз пасез ӧвӧл ни.

Англиысь бертыса, мон филармониысь љоген кошки. Соку отын ӧй вал на валан, проектъёсын ужаны кулэ шуыса. Нош городлы со кулэ вал ни. Мылкыдме валазы Ижкар администрациын. Лэсьтӥм «Иж — крезьгуро кар» проект. Собере вылысьтыз вылаз выль проектъёс. Мынам данъяськонэ вань — «Магия звуков Сибирского тракта» проект. 2006-тӥ ар. Удмуртиысь Сергей Кунгуров, Америкаысь Патрик Хейзл. Удмуртиетӥ ортчись Сибирь тракт кузя экспедиция. Вуоно араз — бичам фольклор материалэн (бигер, ӟуч, удмурт, бесерман кырӟанъёсын) филармониын концерт. Солэсь золгес концертъёс мон ӧй лэсьтылы на.

Али эшъёсы шуо: ойдо тазэ, созэ проектэз улӟытом. Тани, шуисько, мелэ, кузьмасько. Ӵемысь сыӵе мылкыды луэ: мон со проектэз кылдытӥ, но сётӥсько мукет киосы. Со шонер. Малы весь одӥг интыяд пукод? Проектэдлы мукет адями выль улон сётоз.

«Иж-Женева», «Чайковскийлэн дораз», «ПарИжевск»… Проектъёсты Удмуртиез усьто дуннелы, нош дуннеез вутто Удмуртие. Секыт, дыр.

— Ӧвӧл. Мон адямиослы усьтӥськисько. Ижысен Ярозь но берен сюресэз ортчытозямы, кылсярысь, водителен — тодмотэм адямиен — эш кадь люкиськисько ни. Мон малпасько, мар тон адямиослы сётӥськод, сое ик берен басьтӥськод. Потэ, тонэ мед яратозы шуыса — яраты ачид, со бордын кышномуртлэн шудэз! Кузьмаськыны одно ик кулэ.

Пересьмеме уг поты, озьыен, весь мар ке выльзэ утчано. Али байкеръёсын тодматски — «Иж» мотоциклъёслэсь вордӥськем нуналзэс пусъён ужрадын, ветлӥ конструкторлы П. Можаровлы синпелет усьтонэ. Нош Женеваын Удмуртилы сӥзем презентация лэсьтыкум, пумиським Можаровлэн ӵыжы-выжыеныз. Озьы ик кылдо кусыпъёс.

Мон ӧвӧл дышемын весь одӥг интыям пукыны. Тани али гинэ Женеваын улӥ, утыр Иже вуи ни. Мон эркын ӵӧж, лобась тӧл, пӧртэм культураосты ог-огенызы герӟась, вурись. Куддыръя ожгарчиен но асме шӧдӥсько. Куке Женеваын нюръяськисько учкисе-кылзӥсе понна. Куартолэзе ортчытӥм 2 концерт, люкаськиз 50 адями, но кӧня уксё, кужым кошкиз со понна. Отын, татын кадь, ялон ошыса, 500 учкись уг лыкты. Кулэ юромо агентствое но журналистъёслы вазиськыны, яке Интернетын туж зол ужаны, яке туж тодмо адями луыны.

Шумпотӥсько, Ижын ачим кадь эшъёс шедьтӥ шуыса — Александр Русских, Катя Хабибуллина — ог-огместы ми, пал кыл гинэ вераса, валаськом. Тани ӵапак тӥледын пумиськон азьын удмурт-француз эшъяськонъя огин кылдытӥм. Удмуртиын, Швейцариын, Франциын ужрадъёс ортчытъялом, университетэз, киноклубез, та темаен вырись мукет юртъёсты юрттӥсе бордамы кыском. Малпай ни Женеваын «Леман ты котырын ӟуч ӝытъёс» ортчытъяны. Леман (ми со вӧзын улӥськом) Швейцария но Франция вискын интыяськемын. Ужпуме — огазеяны Россиысь Францие но Швейцарие улыны лыктэм адямиосты.

vnukenyz-utskina

Шумпоттэ внук.

— Пӧртэм культураос куспын улӥськоды. Кинэн асьтэдыз шӧдӥськоды?

 Ӟуч но удмурт калык — со мынам семьяе. Мыным матын удмурт, ӟуч кырӟанъёс — соосты мынам песянае, анае кырӟаллязы. Кунгож сьӧрын мынам семьяе ӧвӧл. Карт — со эш, тонэ валась адями, агай, атай, куддыръя нылпи но. Арлыд будэмъя сое золгес шӧдӥсько:  яратон пӧрмытске зэмос мур гажанлы. Кунгож сьӧрысь культура — со книга кадь. Мон сое лыдӟисько, но, жаляса верано, матысь ӧй тодматскы на — ваньмыз азьланяз. Бен, соосты тодматӥ ни удмурт, ӟуч культураосын, но ачим соослэнэныз ӧй на. Мон отын нюръяськисько ай.

— Проектэн вырон туж трос кужымез басьтэ. Кызьы шутэтскиськоды?

— Бакчае потӥсько, мунчоын яратӥсько зыраськыны кофеен, йӧлвылын — ароматерапия. Соку аслым ачим сяська кадь потӥсько — мыным туж кельшо сяськаос. Буйгатскисько, мар ке шлач! гинэ пилиське ке. Азьвыл пияла банкаосты сэрпаллясько вал, берло дыре уг ни. Лек мылкыды уггес кылдылы ни, лэся. Егит дыръям картэлэн вал кӧжыен тырмытэм песьтэрез — груша. Сое мыжгасько вал.

— Шуиды вал, 30 арес — со кышномуртлэн сяськаян вакытэз, соку луэ на янгышъёс лэсьтыны, нош 50…

— Будэтэм, кисьмам емышъёстэ бичан. Кылдэмезлэсь мар ке выльзэ пӧрмытыны, пӧзьтэм компотлэсь выль джем лэсьтыны. Мынам шыкысам емышъёсы туж пӧртэмесь: чырсэз но, гольтресэз но… Мынам улонэ — со аслам рецептэя лэсьтэм пӧрам. Мынам туж трос салатъёсы, кудъёссэ мон ачим малпай. Кышкано ќвќл экспериментъёс лэсьтылыны.

50 арескам валай: одӥг улэм арме но уг жаляськы, одӥг адямиез но уг курласькы. Кӧня ке ар талэсь азьло мон мукет сямен шуысал: тани та яратонэз мон улонысьтым ӵушылысал, та адямиез адӟеме уг поты. Эше шуиз: кинэ тон пумитад, соослы одно ик тау карыны кулэ, соос инмысь лыкто ук.

— Улонады ваньмыз ялан вошъяське. Али нош ик сюрес вожын уд сылӥське-а?

— Кырӟаме тросгес потэ. Азьвыл малпасько вал, проектъёс куспын кырӟалляло шуыса. Но проектъёсын вырон трос кужымме но дырме басьтэ. Валасько, та удысын мон липетозям вуи ни. Котькыӵе фестиваль лэсьтыны быгато. Нош кырӟанын мар ке но ыштэмын ни.

Проект — со уксё, спонсор, трафик, транспорт, иворчиосты шедьтон. Пфф… Кырӟакум мон сокем зол уг сюлмаськиськы вал, учкисьёсын мылкыды капчигес луэ.

Театр кылдытысал, выль крезьгуро группа. Солэсь ятыр: Женеваын усьтэме потэ Ӟуч культурая юрт — огдырлы проект ӧвӧл, со нуналлы быдэ тып-тып ужась луоз.

— Эшты Патрик Хейзл вераз, кунгож сьӧрын тӥ Удмуртиын кадь тодмо луысалды ке, миллионер луысалды ни.

— Шуд коньдон бордысь уг поты, со мылкыд бордысь кылдэ. Мон ӧй кырӟасал ке, проектъёс ӧй лэсьтылысал ке, ӧй адӟысал дуннеез. Тросэз артистъёс, оло, мынэсьтым 3 поллы тросгес коньдон басьто. Мон ӧй басьты квартира, машина, но… мынам дуннее узыргес.

Мукет ласянь, мыным туж кулэ миллион, тодӥськоды-а малы? Мынам пие семьяеныз ипотека басьтӥз, солы, нунокелы юрттысал. Дуннеетӥ концертъёс сётъяса, ветлысал. Куарае вань на али.

utkina1

Кузпалэныз ӵош.

Калыклэсь юанъёс:

— Кызьы кузпалэныды, Швейцариысь Жерар Ламаршен, тодматскиды?

— «ПарИжевск» фестивален йырин. Соку  Вероника Булычева, Сарапул ёросысь Кигбаевоысь нылаш (улэ Парижын), дэмлаз лэсьтыны калыккуспо проект. Мон ужасько вал Эшъяськон юртын. Ижын концерт ортчиз, мынӥм Женевае. Нырысетӥ репетиция дыръя ик Жерарен тодматским. 3 арня ортчыса, сьӧрам лыктӥз, Ижкаре. Мон, пе, чиньыедлэсь быдӟалазэ уг тодӥськы, соин ик браслет вайи, пичи бриллиантъёсын.

Солэн аслаз фирмаез, финансовой консультант луэ.

— Швейцариын марлэсь йырды пороме?

— Отын сомында сыръёс, ческыт винаос, гурезьёс, пӧртэм сяськаё лудъёс. Йыры пороме, тюльпанъёс, рапс быдэс луд тыр сяськаяськыку.

Но мыным уг тырмы лымы, кезьыт куазь, бакчаен вырон но мунчо! Отын бакчаоссы туж пичиесь (1 сотка быдња), туэ нырысьсэ отчы картошка мерттӥ — 25 пуд, тыква, укроп, базилик, сяська. Шалемы дортӥ пичи шур визыла, ойдо, шуисько, мунчо пуктом. Веник но нокытысь бичаны ук, Удмуртие бертылыкум, сьӧрам вайисько.

— Пиды но пытьыостӥды мынэмын кадь, кырӟаны яратэ.

— Кырӟа, барабанэн шудэ, аслаз панк-рок группаез вань. Толэзь талэсь азьло пыриськиз раклы пумит благотворительной концертэ. Со али, мон кадь ик, сюрес утча. Ужа программист луыса. Но шӧдӥсько: сюлэмызъя ӧвӧл.

— Кызьы пусйыны малпаськоды котырес юбилейдэс?

— Вордӥськем нуналам, 24-тӥ куарусёнэ, зоопаркын дунтэк концертэ пырисько. Со радъяське дортэм пуныослы-коӵышъёслы юрттон понна. 20-тӥ шуркынмонэ филармониын ортчоз бадӟым концертэ. Отчы пыриськозы матысь адямиосы, кунгож сьӧрысь но шаерысьтымы эшъёсы.

Мария Векшина

Туспуктэмъёс Н. Уткиналэн архивысьтыз

Удмурт Дунне
By Удмурт Дунне Сентябрь 24, 2016 08:56
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<