Кызьы нылпилы дышетскыны юрттоно?

Удмурт Дунне
By Удмурт Дунне 2 сентября, 2016 14:31
школьники

Маде нылпиостылы, кызьы тӥ юмоке усьылӥды, кыӵе янгышъёс лэсьтылӥды но кызьы вормылӥды со учыръёсты.

Мар яра, мар уг яра

Кызьы тэшкылиез школалы капчиен дышетоно, умой-а, нылпи котыр ласянь адӟем карымон луыны тырше ке? Та сярысь кенешиськом Ижысь нылпи психологен Наталья Малковаен.

— Наталья Витальевна, тодон-валан дуннее дћсьтытэк вамышто, дыр, 1-тӥ классэ мынӥсьёс?

— Озьы. Вераны кулэ: школаын пинал куинь «пагӟаез» ортче — 1-тӥ классэ вамыштыкуз, 5-тӥ классэ потыкуз, 10-тӥ классэ выжыкуз.

Тужгес секыт тэшкылиослы. Соос али гинэ нылпи садэ ветлӥзы, шудӥзы, изизы, вӧзазы котьку вал воспитатель. Табере дышетсконо, дорысь уж лэсьтоно. Лыдӟиськыны-гожъяськыны быгатыса, школае мыно ке, туж умой. Но со уг возьматы на, пинал школалы дась шуыса. Со дышетӥсез кылзыны но валаны мед быгатоз. Озьы ик висъяны мед быгатоз «яра», «кулэ» но «уг яра» кылъёсты.

5-тӥ классэ потӥсьёс асьсэды пичиесь ӧвӧл ни кожало. Табере соосты одӥг гинэ дышетӥсь уз визьнода ни, кылдо выль предметъёс но. Но таин валче куд-ог нылпиос дӥсьтӥсьтэм, кема малпаськись луо. Соослы, 1-тӥ классэ вамыштӥсьёслы сямен ик, анай-атайёслэн юрттэтсы кулэ. Тодӥськом: дорысь уж сётӥське пиналлы, сое анай-атайёс лэсьтыны кулэ ӧвӧл. Озьы ке но, 5-тӥ классэ потыкузы, нылпиос шугъясько ке урок лэсьтыны, 2-4 арнязэ юрттоно соослы — вӧзазы пуконо, валэктоно.

Мар шугъяськытэ 10-тӥ классэ выжемъёсты? Класс выльдӥське, тросэз 10-тӥ классэ уг ни мыно. Сыӵе дыръя шоро-куспо дышетскись пинал но лябъёс радэ кыльыны быгатэ. Эшшо тросэз 10-тӥе мынэмъёс арзэ шутэтсконо кожало: 9-тӥ классэз умой йылпумъязы, нош 11-тӥе ӧз вуэ на. Татын чидась но визьмо луоно анай-атайёслы, пиналлы валэктыны быгатоно, та аре но тыршоно шуыса. Пиналъёслэн школа ужъёсынызы тунсыкъяськыны кулэ. Ньӧмыз понна гинэ юано ӧвӧл: кыӵе ужъёсыд? Нылпиос шӧдо но валало: зэмзэ ик-а тӥ сюлмаськиськоды со сярысь.

Ноку но эн ӵошатэ нылпидэс мукет пиналъёсын. Школалы дышон вакытаз солэсь пичи вормонъёссэ но синйылтэ, ушъялэ. Эн курлалэ дышетӥсез но школаез пиналды азьын. Одӥг педагог но нылпилы уродзэ уг сӥзьы. Озьы ик мон вунэтыны косысал «Кыӵе отметка туннэ басьтӥд?» юанэз. Тӥ юалэ: мар выльзэ со туннэ тодӥз, малы паймиз, кинэн эшъяськиз…

— Нылпимылы «5»-ёслы гинэ дышетскыны сӥзиськом. Шонер-а со, оло, ӵапак та бордысен кылдэ отличниклэн  комплексэз.

— Котькуд анай-атайлэн потэ, солэн пиналыз визьмо мед луоз, умой мед дышетскоз шуыса. Но котыр ласянь адӟем карымон но котькинлэсь умой луыны тыршон сям пиналлэн тазалыкезлы кышкытлык кылдытэ. Пинал мумы-бубыезлы котькуд нунал возьматыны, оскытыны выре, со умой, со ваньзэ шонер лэсьтӥз шуыса. Озьы, ачиз но валатэк, аслыз но, эшъёсызлы но бадӟым  куронъёс пуктэ.  Басьтом таӵе учыръёсты. Одӥг нылаш «4» басьтӥз но шумпотӥз, нош бускелез, «4»-ез адӟыса, зар-зар бӧрдӥз. Малы? Аслыз укыр бадӟым куронъёс пуктэ. Яке школаын пинал «5»-ёслы дышетскиз, университетэз йылпумъяз, котькыӵе ужрадъёсы пыриськиз, нош улонын ас интызэ ӧз шедьты. Со кельшымтэ ужын тырше, семьяяз ялан керӟегъяське, мылкыдыз котьку урод… Малы? Солэн котькинлэсь умой луэмез потэ, аслэсьтыз шекъёссэ но мукетъёслэсь янгышъёссэс уг быгаты вунэтыны, тупатыны. Со дышемын ӧвӧл «усьылыны», быдэс улонзэ, котькуд нуналзэ экзамен сётэм кадь улэ.

Та комплекс кылдэ пиналлы саклык тырмымтэ дыръя: куке сое ушъяло, «5» басьтыкуз яке кыӵе ке конкурсын вормыкуз гинэ. Таӵе сям кылдэ на, анай-атайёс нылпизэс мултэс чакласа возё ке. Пинал ялан кылэ: «тон озьы карыны кулэ», «тон милемыз возьытэ вуттыны кулэ ӧвӧл», «ми умой дышетским, нош тон эшшо умойгес быгаты»… Озьы пинал ассэ йырйыны кутске, со кышка янгышаны, сереме кыльыны. Анай-атайёс ӵемысь уг валало: асьсэос умой дышетскизы ке, со уг возьматы на, пиналзы но сыӵе ик луыны кулэ шуыса. Со мукет, со тӥ ӧвӧл. Соин ик туж-а меда кулэ пиналдэс отличник карыны?

— Мар кароно, таӵе сям нылпиослы медаз пыӵа шуыса?

— «Мон тон быдӟа дыръям ик сыӵе визьмо вал», «мон «5»-ёслы гинэ дышетски», «мон котьку кылзӥськись но адӟем карымон пинал вал»… Та интые маде нылпиостылы, кызьы тӥ юмоке усьылӥды, кыӵе янгышъёс лэсьтылӥды но кызьы вормылӥды со учыръёсты. Тодэ ваёнъёсты пыр ик вералэ, тодон-валан люкан, эшъяськон кусыпъёс шумпотон вайыны кулэ, отметкаос шоры учкытэк. Сётэ нылпиостылы шутэтскыны, изьыны дыр, эн кышкалэ, соос азьтэмгес уз луэ, дышетскем бере нылпи кужым люканы кулэ.

Галина Семёнова

Удмурт Дунне
By Удмурт Дунне 2 сентября, 2016 14:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<