Кызьы мытӥм выль дышетскон арез?

Удмурт Дунне
By Удмурт Дунне 2 сентября, 2016 13:49
4 полсае

Ижысь 8-тӥ школае вуиз егит дышетӥсь. А. Ивлева кылем арын Можга педучилищеез горд дипломен йылпумъяз, дышетсконзэ азинтэ УдГУ-ын.

Та сярысь журналистъёслы мадиз элькунысьтымы дышетонъя но наукая министрлэн воштӥсез И. Белозёров.

Книга но, йӧл но вань

1-тӥ куарусёнэ Пичи Пурга, Шаркан, Якшур-Бӧдья ёросъёсысь ог 10 школа ӧсъёссэ ӧз усьты. Отын тупатъян-выльдон ужъёс йылаз-пумаз вуттымтэ на.

Игорь Белозёров верамъя, та пумысен анай-атайёслы сюлмаськоно ӧвӧл. Лэсьтӥськон ужъёс уз люкетэ нылпиосты дышетонлы. Куд-ог школаосын али спортзалъёсты тупатъяло. Озьыен, пиналъёс мугорзэс кыдатозы ульчаын. Куд-ог школаосын столовойёсты выльдо на — нылпиос сиськытэк дышетскозы. Но пиналъёслы кема курадӟоно уз луы — тупатъян ужъёс 5-тӥ сентябрёзь йылпумъяськозы.

95 процентаз школаосын учебникъёс выльдэмын. Талы элькун бюджетысь 100 миллион котыр коньдон висъямын.

— Удмурт кылэн герӟась-кем учебникъёсын но югдур ӟеч. Соос капчиен потӥзы федерал эскеронъёс пыр. 1-тӥ-4-тӥ классъёслы чаклам книгаослэн электрон версиоссы Россиысь улосъёс пӧлын устоосыз радэ шедизы. Соос 2 ӧръя дасямын — удмурт кылэз тодӥсь но тодӥсьтэм пиналъёслы. Оскисько, вуоно арын та учебникъёс пыртэмын луозы федерал списоке, — ивортӥз  Игорь Николаевич.

Берло 2 ар ӵоже гуртъёсысь школаосы 250 егит специалистэз кыскыны луиз. Соос басьтӥзы субсидиос. 1 ар ужамъёс — 40 сюрс манет, бӧрысь — 60 но 80 сюрс манет. Озьы ке но визьнодасьёс уг тырмо на. Ёросъёс кулэясько 162, городъёс — 400  дышетӥсьлы.

Азьло аръёсы сямен ик, туэ но 1-тӥ-5-тӥ классъёсын дышетскисьёслы — сыӵеос элькунамы 53 сюрс — дунтэк йӧл но печення люкылозы. Ёросъёсысь школаосын та вӧзы пӧсь сиён ӵектозы на. Начар семьяосысь 1-тӥ-11-тӥ классэ мынӥсьёс дунтэк нуназеялозы.

Инженеръёсты будэтоз школа

Шаерамы пиналъёслэсь ваньмон дырзэс радъянэн выре 184 огазеяськон. Отчы пырисько 150 сюрслэсь ятыр нылпиос — вань покчиос пӧлысь 67 процентэз.

Туэ гужем пӧртэм лагерьёсын тазалыксэ кыдатӥз, тодон-валанъёссэ муромытӥз 50 сюрслэсь ятыр пинал. Талы элькун бюджетысь кошкиз 324 миллион манет.

Матысь аръёсы пӧртэм кружокъёсы, секциосы но студиосы ветлӥсьёслэн лыдзы 75 процентозь будоз. Со понна али шаерамы усьтӥськыло выль центръёс. Кылсярысь, кылем арын ужзэ мытӥз «Технотроника». 1 сюрс 123 покчи инженеръёс отын роботъёс бичало, выль арбериос кылдытъяло.

— Туэ Ижысь 21 номеро школаын вуоно инженеръёсты дасянъя классъёс усьтӥмы, — ивортӥз дышетонъя но наукая министрлэн воштӥсез Игорь Белозёров. — Отын кылдытӥмы техникая профилен ужась школаослы огъя инъет. Та удысъя тодон-валанъёссэс муромытозы 8-тӥ-11-тӥ классъёсы ветлӥсьёс.

Ольга Корепанова

Удмурт Дунне
By Удмурт Дунне 2 сентября, 2016 13:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<