Кызьы будэтоно визьмо нылпи

Удмурт Дунне
By Удмурт Дунне 1 сентября, 2016 12:13
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ижысь П. Чайковский нимо Операя но балетъя театрын шаерысьтымы дышетӥсьёслэн август конференцизы ортчиз. Кыӵе ужпумъёс азязы пукто визьнодасьёс?

 Кусыпъёсты юнматоно

3-26-1

Элькунмылэн осконэз — нылпиос.

Ужрадэ пыриськизы Элькун Тӧро А. Соловьев, Кун Кенешлэн Тӧроез В. Невоструев, Кун Кенешысь Наукая, дышетонъя, культурая но егитъёсын ужан политикая ялан ужась комиссилэн кивалтӥсез Н. Сударикова, дышетонъя но наукая министрлэсь ужзэ быдэсъясь З. Суворова, Удмурт Республикая федерал инспектор         Д. Мусин но мукетъёсыз.

Малпанъёссэ нырысь ик усьтӥз дышетонъя но наукая министрлэн воштӥсез Игорь Белозёров. Нылпиез визьмо, шаплы будэтон понна дышетӥсьёслы но анай-атайёслы валче ужано, шуиз со. Семьяосын кусыпъёсты юнматон вылысь школаосын визь-кенешен юрттэт сётонъя центръёс кылдытъяно.

— Кылем арын элькунысь школаослэн ӟечлыксы пумысен юалляськон ортчытӥмы, — вераз Игорь Николаевич. — Отчы пыриськиз 90 сюрслэсь ятыр адями. 96 процентэз шуизы: школаосмы устоесь. Азьло аръёсы 70 процентэзлэн гинэ таӵе малпанэз вал.

Нылпиосмы но шумпотто. Кылсярысь, Ижысь 80 номеро школаысь Юлиана Ломаева быдэс кунмес паймытӥз — математикая секыт лыдъян-чотанъёсты быдэстэ, бумага но ручка кутытэк. Россиысь покчи классъёсын дышетскисьёс пӧлын тужгес трос лыдӟиське Ижысь 12-тӥ школаысь Григорий Мерзляков. Россиын ортчем физкультурая олимпиадаын 3-тӥ ползэ ини вормисе потӥз Пичи Пурга ёросысь Пугачёво каргуртысь Татьяна Вершинина.

— Элькун Тӧро тужгес усто студентъёслы стипендизы борды ватсаса 5 сюрс манет тыре, — вераз И. Белозёров. — Валлян арын сое 60 пала визь пог басьтэ ке вал, кылем арын 273-ез шумпоттэмын.

 Ужрадъёс ортчытъяно

Историяя, кылъя но литературая Удмурт институтлэн директорез Алексей Загребин нылпиослы вордӥськем шаерез гажан мылкыд пыӵатон ласянь вераськиз.

— Атыкай музъемез яратон арня-толэзь куспын уг кылды — аръёсын вордӥське, — шуиз тодосчи. — Соин ик дышетӥсьёслы вылысьтыз  вылаз ужрадъёс ортчытъяно: урокъёсын котькуд пиналлэсь выжызэ эскероно, нылпиосын ӵош вашкала юртъёсын узыр интыосы потано, войнаын быремъёслэсь шайвылзэс утялтоно…

А. Загребин та дыре тырше элькунмылэн историезлы сӥзем книгаос бордын. Соосты 30 том поттыны чаклало. Огзэ, Алнаш ёрос сярысьсэ, туннэ кие кутыны луэ ини. Тани-тани вордӥськоз Балезино палъёслы сӥземез.

Пиналъёслы вордӥськем шаерез гажан мылкыд пыӵатыны юртто кадет классъёс. Удмуртиын соос 180. Отчы ветло 3 сюрслэсь ятыр нылъёс но пиос. В. Стариков нимо кадет корпуслэн кивалтӥсез Татьяна Караваева шумпотэ: та пӧлысь ӝыныез, пе, вылӥ ожгар дышетскон учреждениосы пыро.

— Кадет корпусмы ужа ини 15 ар. Туннэ дорамы визьзэ муромытэ, кужымзэ кыдатэ 300 пияш. Соослы туала тодон-валан сётыны луонлыкъёсмы вань — стадионмы но, бассейнмы но выль. Пиос ӵем потало палэнэ. Алигес вуылӥзы Севастополе. Отысь Быдӟым ожлэн пытьыостӥз ортчизы. Корпусмылэн 2 гинэ  шуг-секытэз вань: уг тырмо дышетӥсьёс, ӧвӧл кадет классъёсты дышетон пумысен нормативъёс.

 Интернетэз кужмоятоно

Ёросъёсысь школаослэн улэм-вылэмзы сярысь вераз Ува ёрос муниципал кылдытэтлэн кивалтӥсезлэн воштӥсез Надежда Лохтина.

— Али ёросъёс городъёслэсь уг висъясько, — шуиз со. — Нылпиослы муресь тодон-валанъёс сётӥськомы. Шутэтскон вакытсэс ӟеч радъяськомы. Ува ёросын вань, кылсярысь, биатлонъя школа, хореографияя студия, спортъя «Витязь» клуб, утчаськонъя «Штурман» отряд. Мотоен, картинг амалэн ворттылонъя клубмы но ужа. Зэм, «корт валъёсты» анай-атайёс ас уксёенызы басьтоно луо.

Н. Лохтина кивалтӥсьёс-лы вазиськиз, ёрос школаосысь Интернетэз кужмоятыны курыса. Инвалид нылпиосты пӧртэм ужрадъёсы нуон-ваён понна транспорт сярысь но малпаськоно, пе. Роботъёс, пӧртэм электроарбериос кылдытонъя кружокъёслы тросгес коньдон висъяно.

Автобусъёсты выльдоно

Кыл куриз Элькун Тӧро Александр Соловьев. Пусйиз: дышетон удыслы котьку бадӟым саклык висъяське.

— Берло 2 ар куспын 142 спортзалэз выльдӥмы, — шуиз Тӧро, — азьланяз пуктомы 30 выль школа, 38 сюрс пиналлы интыос усьтӥськозы. Озьы 2 сменаен дышетскон шаерамы уз луы ни. 16 школаез куаж-куаж тупатъялом. Та ужъёслы кошкоз ог 25 миллиард манет.

Тӧроез сюлмаськыто школа автобусъёс: 10 процентэз вужмемын. Элькун бюджетысь висъямын 20 миллион манет. Тырмиз со 15 автобус басьтыны. Коньдон вуоз на федерал бюджетысь. Озьы эшшо 5 выль автобус басьтыны луонлык кылдоз.

— Матысь дыре Ижын усьтӥськоз дышетӥсьёслы пуктэм 3-тӥез корка. Азьланяз таӵе юртъёс ӝутомы ёросъёсын но, — люкаськемъёсты лӧпкытӥз А. Соловьев.

Ольга Корепанова

Удмурт Дунне
By Удмурт Дунне 1 сентября, 2016 12:13
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<