Кыдан арня

Удмурт Дунне
By Удмурт Дунне 20 сентября, 2016 15:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
0111181centr-patrioticheskogo-vospitaniya-v-pirogovomolodezhpodrostoksoldatsluzhba

Армилы дасяськоно пиналысен.

Россиысь улосъёс пӧлын Удмуртиын гинэ ужа армилы дасянъя центр. 10-тӥ классэ ветлӥсь пиос отын мугорзэс, лулпушсэс кыдато, визьзэс муромыто. 

Дэри ёросысь Пероггуртысь центр укша ожгар частьлы. Ож дӥсен, ыбылӥськон тӥрлыкен пиос бызьыло. Котырак чильк-вальк миськем ож техника сылэ: ЗИС-3 пушка, «Град», «Оса» машинаос… Алексей Ныров, центрлэн кивалтӥсез, валэктэ: али пиослэн ӵошатсконзы мынэ — возьмато, автоматэз макем ӟеч сузяны, бичаны быгато.

Пиос шоры синмаськыса учкыса сылыны Алексей Владимирович ӧз сёты. Дыртытӥз центразы — юртмылы но, шуэ, синмаськыса быроды. Уг алда вылэм. Пиослэн изён интыоссы армиын выллем лач-лач утялтэмын. Валес котыръёссы утюгаса тыремын кожалод — одӥг кисыризэ но уд синйылты. Классъёсын, сьӧросъёсын, мисьтӥськон интыосын чылк-чылк.

— Арнялы быдэ центр выль 120 пиосты кутэ, — валэктэ А. Ныров. — Туннэ дорамы лыктӥзы Ижысь Первомай ёросысь 10-тӥ классэ ветлӥсьёс. Пиос татын 5 нунал уло. Ӵукна 6-ен султо, ӝыт 10 часын кӧлыны выдо.

2 нунал ӵоже пиос ож удысэн герӟаськем лекциосты кылзо. 3 нунал тодон-валанъёссэс уж вылын возьмато. Ӝытъёссы но пайдаё ортчо. Татчы пумиськонъёсы вуыло пӧртэм ожъёсы пыриськылэмъёс, Следствиея управлениын ужасьёс, ОМОН-ысь но СОБР-ысь, патрулья но постъя службаысь воргоронъёс.

0111216centr-patrioticheskogo-vospitaniya-v-pirogovomolodezhpodrostoksoldatsluzhba

Шонер ыбылӥськыны мед дышозы центрамы.

Тол шорозь сборъёсы ветло школаосысь пиос. Бӧрысь центр ӧсъёссэ усьтэ техникумъёсын но ссузъёсын дышетскисьёслы. Ар куспын татысь кыдаса потэ 3 сюрс 500-лэсь ятыр адями.

— Туала армилэн бадӟым шуг-секытэз — солдатъёс ог-огенызы кусып тупатыны уг быгато, — вера Алексей Владимирович. — Асьме пиослы удалтӥз: сурон сапег дӥсямзылэсь азьвыл татын дышетско эшъяськыны, ужпумъёсты ӵошен сэрттыны-пертчыны. Телефонэн яке планшетэн пукыны дырзы соослэн чик ӧвӧл. Та арбериосын йырин ик адямиен вераськыны быгатонлыксы лябӟемын.

Классъёс интые кылдытэмын ротаос, взводъёс. Одӥг классын дышетскисьёс пӧртэм взводъёсы шедё. Озьы каремын юромо: пиос асьсэлы выль эшъёс мед шедьтозы.

А. Ныров чаклам ини: гуртысь пиослэн кужымзы, пе, тросгес. Нош туала ож техникаез ӟечгес валало городысь пиос.

— Эшъяськыны курадӟем сяна, тросэз шугъясько пӧртэм упражнениосты быдэсъяны. Кылсярысь, подтягиваниез. Вань сыӵеосыз — огпол но ӝутӥськыны уг быгато. Понедельнике бызьыло-тэтчало — вторнике быдэс мугорзы висе. Сыӵеослы валэктӥськомы: армиын эшшо но секыт йӧтоз. Татын соосты жаляськомы. Ум радъяське, кылсярысь, марш-бросокез — бадӟым песьтэръёсын, ыбылӥськон тӥрлыкен 5 иськеме бызьылонэз.

Центре пиос вуо, медосмотр ортчыса. Центрын вӧсь луыны шедьто — эмъясьёс вӧзазы. Висисьёслы чакламын 2 шуныт, шулдыр палата. Татчы, пе, ӵемгес шедьыло кынман висёнъёсын.

Центрын визьнодало отставкаысь офицеръёс. Пиосты ыбылӥськыны дышетэ биатлонъя дано тренер Алексей Завьялов. Удысаз 20 арлэсь кема тырше ини.

— Котькуд уроклы дасясько 5 винтовка, — вера Алексей Иванович. — Зэм, армиын соослы мукет ож тӥрлык сётозы. Но шонер ыбылӥськыны мед дышозы центрамы.

А. Завьяловлэсь кылъёссэ йыраз лач-лач кельтыны выре Ижысь 55 номеро школаысь Константин Кудрявцев. Пияш улонзэ армиен герӟаны чакла. Центре вуытозяз, та сярысь ӧз ик малпаськылы.

— Татын мылкыды воштӥсь-киз, — вера пияш. — Школаын физкультура урокъёсмы арняяз 2-3 пол гинэ луыло. Нош татын — котькуд нунал, ичизэ — 3 час. Ческыт сюдо но — нуналаз 5 пол.

Константинлэн малпанъёсыз зэмалозы, оскытэ  А. Ныров. Угось дышетскемзы соослы 2 полэс пайдаен берытске: тазалыксы юнма, визьзы муроме.

Ольга Корепанова

Удмурт Дунне
By Удмурт Дунне 20 сентября, 2016 15:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<