Керӟегъяськонэз быдтэ спорт

Удмурт Дунне
By Удмурт Дунне 9 сентября, 2016 14:02
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Терроризмен нюръяськон нуналэ — 3-тӥ сентябре — Ижысь «Динамо» стадионын «Экстриму — да, экстремизму — нет!» фестиваль ортчиз.

ehkstremizm-3

Самбо мугорез но, сямез но кыдатэ.

Ужрад нырысьсэ радъямын вал ке но, калыкез люканы быгатӥз — 3 сюрслэсь ятыр адями отчы вуиз. Стадионэ пырыса, тросэз кошкыны ӧз ӵыдэ — нуназе бере 4 часысен кутскыса, уйшорозь отӥ поръязы.

Фестивалез усьтӥз мугорез кыдатон культурая, спортъя но егитъёсын ужан политикая министр Игорь Краснов:

— Лек малпанъёсын улоно ӧвӧл. Керӟег мылкыдэз быдтоно, спортэн вырыса! — шуиз со.

Собере, байкеръёсын ӵош мотоциклэ пуксьыса, кышкатэк ширтӥз стадион кузя. Та бӧрсьы ужрадэ лыктэмъёслэн мугоръёссы юзыр-кезьыр луизы: паркурен вырись егитъёс оп! шуытозь ӝужыт борддоръёсы кечырскылӥзы, слэклайн амалэн тунсыкъяськисьёс кыскем гозы вылтӥ кутӥськытэк ветлӥзы. Ярам, быгатонлыксы волятэмын — нокин ӧз усьы, вӧсь ӧз луы.

Собере стадионэ егитъёс пазьгиськизы. Огпалаз самбоя, боксъя, дзюдоя, роликен ворттылонъя мастер-классъёс усьтӥськизы. Мукет палаз интыяськизы джамперен (корт пружиналэсь дасям пыдкук) тэтчасьёс, турникын мугорзэс куасаллясьёс — воркаутъёс, пейнтболэз, фитнесэз яратӥсьёс… Татчы ик пуксизы эмъясьёс но — мылкыд карисьёс быгатӥзы дунтэк ВИЧ-инфекцилы эскериськыны, шонер сиськонъя тодон-валан басьтыны.

Фестивалез узырмытӥзы югдурез утисьёс. Нылпиос, синъёссэс вошъятэк, учкизы БТР-80, «Тигр» кужмо машинаосты. Омонысь но спецназысь сӥлё-виро воргоронъёс возьматӥзы, та машинаосын ворттылыку, кызьы ыбылӥськоно, террористъёсты пазьгоно, астэ утёно. Полицейскойёсты воштӥзы рок-группаосысь усточиос. Стадион тыр жингрес гуръёссэс кисьтӥзы.

Ӝыт пал егитъёс дыртӥзы Ялан ӝуась тыл доры. Террористъёс ки улын быремъёсты буре вайыса, сяська тугоко понӥзы…

Фестиваль 1 нуналэн ӧз йылпумъяськы. Кыстӥськоз со 10-тӥ сентябрёзь. Та дыр ӵоже егитъёс дунтэк ветлыны быгатозы пӧртэм спортъя кружокъёсы но секциосы. Озьы сюлэмзылы тужгес кельшисьсэ быръёзы.

Кружокъёслэн, секциослэн ужан радлыксы сярысь тодыны луоз vk.com/extreme_yes сайтысь. 10-тӥ сентябре шоркарысь Эшъяськон монумент дорын ортчоз шулдыръяськон. Отын данъян грамотаосын пусъёзы фестивале тужгес мыло-кыдо пыриськисьёсты. 6+

Ольга Корепанова

Удмурт Дунне
By Удмурт Дунне 9 сентября, 2016 14:02 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<