Эрик Батуевлы сӥзьыса моноспектакль пукто

Related Articles

• Кыӵе пайдаен берытскоз яркыт ужрад? 0 23.Окт
• Кияса ёросысь «Удмурт нылкышно кенеш» арзэс Людмила Кутяновалы сӥзё 0 31.Мар
• Удмуртиын пенсиосъя референдумлы дурбасьтӥсь группа кылдӥз 0 27.Авг

Эрик Батуев кадь адямиос асьме пӧлын ӧжыт.

Удмурт кылбурчилы, писательлы, журналистлы Эрик Батуевлы 23-тӥ куарусёнэ тырмысал 47 арес. Солы сӥземын луоз моноспектакль.

Эрик Батуев сярысь документальной фильм лэсьтэмын, солэн произведениосыз пыртэмын учебникъёсы. Мар кароно на, та йӧно адями сярысь уногес мед тодозы, егитъёс соин мед тунсыкъяськозы шуыса?

— Эрик Батуев кадь адямиос асьме пӧлын ӧжыт. Бумага вылысь гинэ со сярысь, солэсь произведениоссэ медам лыдӟе. Туж потэ, сюлэмамы но со мед кылёз шуыса. Нош со понна мылкыдэз бугыртыны кулэ. Мунё театрысь егит артистлэсь Сергей Антоновлэсь сцена вылын шудэмзэ адӟи. Со вал Япониысь драматурглэн Коки Митанилэн «Академия смеха» пьесаезъя пуктэм спектакль. Малы ке малпай: Сергей быгатоз Эрик Батуевез шудыны, сое усьтыны. Ӵектӥ спектакль лэсьтон борды басьтӥськыны, — шуэ «Удмурт Кенеш» огазеяськонлэн тӧроез Татьяна Ишматова.

Сергей Антонов выль уж борды капчиен басьтӥськиз. «Эриктэм Эрик» моноспектакльлы сюжетсэ ачиз ик гожтӥз. Ачиз ик Эрик Батуевез шудоз. Али репетициос мыно.

— Эрик Батуевлы матэгес луон понна, солэсь лушкем малпанъёссэ шӧдон понна кылбуръёссэ, гожъямъёссэ, интервьюоссэ эшшо огпол пыр-поч лыдӟыса потӥ, — шуэ С. Антонов. — Тодматски пӧртэм адямиослэн тодэ ваёнъёсынызы. Ас пыртӥм поттӥ солэсь котькуд чурзэ. Синвуаськи. Эрик Батуев кулонэн шудэ кадь. Берпуметӥ интервьюаз но верамез вань:  кулонын но маиз ке чеберез вань. Та ик сюжетын валтӥсь инты басьтӥз. Кулонлэн ки улаз улэ, кулон эриксэ тала кадь. Соин но спектакльлы «Эриктэм Эрик» ним сётэмын. Малпай: котыре луэ люканы уно артистъёсты, улонзэ сцена вылын дэмен возьматыны. Но вырӟытоз-а сыӵе уж сюлэмез? Оло, умойгес луоз одӥг адями пыр вакчи даурзэ возьматыны. Экран вылын калыклэн син азьтӥз ортчоз Эрик Батуевлэн быдэс улонэз. Фотоос вылысь адӟомы вордӥськем  гуртсэ, будон вакытсэ, Москваын ужамзэ, ожъёсы вуылэмзэ, тодматском яратонэныз, анаеныз, пумиталом бырон вакытсэ. Котькуд улон вакытэзлы-туспуктэмлы тупась кылбуръёссэ я веранъёссэ утчай. Соос фотографиос воштӥськемъя микрофон пыр чузъяськозы. Со дыре ик чузъяськоз мылкыдлы тупась крезьгур, уногес — крезь. Мон ӧй туртты быдэсак Эрик кадь кариськыны: со кадь ӵышкиськыны, куараме тупатыны. Кышкасько, кызьы меда калык пумиталоз? Тазьы ӧй вал, шуозы кадь. Нош мынам потэ: спектакль шоры произведение шоры кадь мед учкозы.  Кызьы асме Эрик бӧрдытӥз, озьы учкисьёсты но мед бӧрдытоз, соку сюлэмазы кылёз.

Моноспектакль возьматэмын луоз сентябрь толэзь пумын. 16+

Елена Сараматова