Быръён: Оско гуртысь адямилы

Удмурт Дунне
By Удмурт Дунне 23 сентября, 2016 10:13
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
takyan

Пичи Пурга ёросысь Т. Векшина егит ке но, быръёнъёслэсь уг палэнскы.

Быръён нуналэ Пичи Пурга ёросысь Пуро гуртын клуб дорын ӵукнаысен ик куаш вазиз. Кагазъёс дасямын 309 бырйись понна — Пуроын но Пуропочинкаын  улӥсьёслы.

8 час ӵукна. Калык резь-куаж ваське клубе. Нылкышноослэн одӥг киязы — йӧлэн ведра, мукетаз — паспортсы. Вузкаронние йӧл васькытон сямен куаразэс сёто. Мукетъёсыз, ужаны мыныкузы, кожо клубе. Ярам, клуб вӧл-вӧл. Одӥгъёсыз штора сьӧры ватскон висъетэ пырон понна кузь черодын сыло, мукетъёсыз кандидатъёс сярысь верасько, куинетӥосыз коридорын кандидатъёс сярысь ивортонъёсын тодматско.

Шӧдӥське, 4 бюллетень пӧлысь сюлэмзылы матын 2-ез. Со муниципал но ёрос Кенешъёсы быръён — соин но муниципал Кенеше кандидатъёсын бордгазетэз пыр-поч учко. Отын 11 адямиослэн туспуктэмъёссы. Ӝыныез гинэ — Пуроысь но Пуропочинкаысь. Гуртоослы тодмо кандидатъёс пӧлын — дышетӥсьёс, колхозын ужасьёс… Соос Кенеше бырйисько калыксы понна ӟечсэ лэсьтон вылысь.

— Гурт шоры — Маш нюке — нылпиослы футболэн, лаптаен, волейболэн шудон инты лэсьтоно, толалтэзэ хоккейной коробка но кисьтыны луоз, — дэмлаз вал огез кандидат — Пуро гуртысь спортсмен Иван Машев.

Солэн малпанэныз гуртоос кемалась тодмо ни — Аксакшур муниципал Кенеше (Пуро но Пуропочинка та муниципал кылдытэтэ пыро) мынӥсьёс пӧлын И. Машев тужгес трос куара бичаз — 64,4 процент.

Нуназе бере ширтӥ Аксакшуре. Кырын «Мынам Удмуртие» радио шудэ, куншетъёс тӧлъя сэзъясько. Татысь быръёнъя комиссиын возьмало 537 адямиез. Ӝыныез, пе, ветлӥзы ни. Азьлань улонзы сярысь тросгес сюлмасько, лэся, пенсионеръёс но егитъёс. Кызьы верало комиссиын пукисьёс, соос бырйисьёс пӧлын тросгес вал. 18 аресъемъёс улоназы нырысетӥ быръёнъёсы ваньзы сямен ветлӥзы.

Муниципал кенеше быръемын 11 адями, 4-ез — Пуро палась, 7-ез — Аксакшурысь. Кызьы вера Аксакшур муниципал кылдытэтлэн йырыз Э. Тихонова, матысь 5 арзэ азьланьтӥськоз сюресъёсты тупатъян, гурт чебергес луоз, озьы тросгес туристъёс вуылозы, оло. Со сяна, оскон вань, матысь дыре выль школа кылдоз шуыса. Проект вань ни. Нош школалэн кивалтӥсез А. Ушаков   быръемын Пичи Пурга ёрос Кенеше.

Оглом Пуроын но Пуропочинкаын куаразэс сётӥзы 65 процентэз бырйисьёс, Аксакшурын но Аксакпочинкаын — 81 процентэз.

* * *

Пичи Пурга ёросын 44 интыын куара сётон ортчиз. Лыдпусъёс шумпотто. Асьсэлэсь мылкыдзэс шараязы ог 60 процентэз бырйисьёс. Тросэз, открепительной удостоверение басьтыса, мукет азьын куара сётӥзы.

—  Быръёнъёс туэ секытэн, но со дыре ик гань-гань ортчизы. Ужрадлы дасяськон ӝег вал, малы ке шуоно пӧртэм ёзъёсы бырйим. Со понна дорамы 1 гинэ ӝожтӥськон вуиз, — вера Пичи Пурга ёросысь быръён комиссиен кивалтӥсь Э. Ермичев. — Азьвылэныз ӵошатыса, туэ быръёнэ калык тросгес вуиз. Уго Кун Думае сяна, бырйимы тужгес матысь властез — гурт но ёрос Кенешъёсты.

Мария Векшина

 

Удмурт Дунне
By Удмурт Дунне 23 сентября, 2016 10:13
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<