Бадӟым, югыт, паськыт — ма со?

Удмурт Дунне
By Удмурт Дунне Сентябрь 1, 2016 12:25
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Журналист эскериз ферма ӝутыны

Алнаш ёросысь «Палэп», «Решительный» но «Родина» хозяйствоосын 3 ферма пуктӥське. Ваньмыз со чакламын 800 скаллы. Берлозэ ӝутонэ мон но киме йӧттылӥ — эскери, капчи-а гид лэсьтыны.

ферма

Алнаш ёросысь «Родина» эштосын 200 йырлы фермаез 3 толэзь куспын пукто.

 Выжыкылысь гид

— Азьвыл егитъёс гуртысь дэмен кошкылӥзы, — шуэ «Родинаен» кивалтӥсь Вячеслав Максимов. — Али выльысь бертӥсез вань. Адями вала: палэнэтӥ ветлытозь,  ас музъем вылад, семьяед вӧзын улод но ужалод. Туэ 3 мурт хозяйствое куриськиз ни, соос комбайнэн, «КамАЗ»-эн ужало. Но туэ 4-езлэн нылкышноослэн пенсие потон арлыдзы вуэ: 2 доярка, скал бызьылытӥсь, пудо эмъясь.  Таос ӧз ужалэ ни ке, шуге-леке вуом.  Егитъёсты котырамы кыскон, ужзэс капчиятон вылысь ик выль гид  пуктоно кариськимы.

Зэм, туала арын гид пуктыны капчи ӧвӧл. Хозяйство ӟеч выжыысь скал басьтыны ог 7 миллион манет тыр кредитэ пыриз. Со тырмиз 60 скаллы. Нош гид 21 миллион манет тыр усиз, лэсьтӥськонэн вырись фирмалы со быдэсак тырымтэ на.

— Малпаськомы вал 400 йырлы гид пуктыны. Но музъемез документъёсъя лэсьтон понна быдэс ар ортчоз. Сомында дырез ыштонтэм вылысь 200 йырлы гинэ кельтыны  чакламы. Сое ӝутон понна вуж кунян гидэз кесяно луимы, — шуэ Вячеслав Максимов.

Гид шуо ке, син шоры соку ик тӧдьы изваскаен буям борддоръёс, лапег липет син шоры пуксё. Но ферма доры вуи гинэ, синъёсы яркытэзлэсь   палёмизы. Макем паськыт но югыт со! Кузьдалаез — 70 метр, пасьталаез — 21. Бордаз ик лэсьтэмын пудо утялтӥсьёслы, скал кыскисьёслы шутэтскон, мисьтӥськон сэрег. Тыл ӧжытгес мед бергалоз шуыса, светодиод лампаос пуктылэмын.

Гидэ пырыкум, татын уж огыр-бугыр пӧзе ни вал: кин ке сваркаен ужа, кин ке пу вандэ. Бригадаен кивалтӥсь Андрей Калинин шуиз: кема изиськоды, ми 7 часысен тыршиськомы ни. Тӧдьы футболкае шоры учкыса, воксё но куаретӥз: тӥ ужаны яке эктыны вуиды? Ма, мыным шуизы вал: кирпич нуллоно уз луы, буяськыны коть яралоды. Сьӧрам перчатки но кутӥ. Тӥни ук скалъёсты думылыса возён корт гумыоссы пумозяз буямтэ на.

— Мон кадь ужасьёсты бригадаяды уд ик кутӥське, дыр?- юасько.

сарамат

Берлозэ ӝутонэ мон но киме йӧттылӥ — эскери, капчи-а гид лэсьтыны.

— Кык-куинь нунал ӵоже ваньмызлы дышыса вуттоды, со понна юромо тодон-валан басьтэмды ӧвӧл ке но. Зэм, нылкышноос пӧламы уг сюрыло: мултэс ненегесь соос, нош воргорон нокыӵе ужлэсь уг кышка. Бригадаысь адямиос уг вошъясько: 9 кузя ми татын, котькудӥз аслэсьтыз ужзэ тодэ, мултэс косъяськонэз ӧвӧл. Собере, таӵе проектъя шаерамы нырысьсэ гид ум ӝутӥське ни — уж волятэмын. Но таӵе ӝог ферма пуктэммы ӧвӧл на — кӧс куазь юрттэ. Эшшо ке хозяйство материал ӝегатскытэк вуттэ.

— Нуналаз кӧня уждун тыриськоды ужасьёстылы?

— Номыр карыса ӧд вуттэ на, дун куриськоды ни? — серекъя. — Шорлыдын быдэн 1 сюрс 500 манет усе.

 Мултэс карон

Киям кисточка но краска вуэм бере корт привязьёсты буяны кутски. Одӥг нюжаез но медаз кыльы шуыса, одӥг интыетӥз ик олокӧня пол маяллясько ук. Кивалтӥсь тыршемме палэнысен учкыса сылэ вылэм. Сюлэмыз ӧз чида, лэся, шуэ:

— Тазьы рос-прос буяны тыршиды ке, ӝыны нунал но уз тырмы тӥледлы. Ужасе 60 метрез ӝыны час куспын буя. Тӥ сямен буяз ке, краска но уз тырмы. Сюлмысь тыршемдылэн пайдаез но уз луы: пуосты юнматъяку, жильыос ошылыку, со ваньмыз ӵабъяськоз на. Соин ик вань ужъёс йылаз-пумаз вуыку, привязьёсты эшшо огпол буяломы. Али вылтӥз гинэ маяллялэ.

Кызьы косо, озьы лэсьты кадь. Но ньӧмыз понна ужаны дышемын ӧвӧл бере, киос нокызьы но уг кылзћсько.

Ӧйтӧд, кӧня дауртысал на буяны. Андрей Калинин дугдытӥз но шуиз: татын кортъёс юнматымтэ на, сваркаен шедьытоно, собере гинэ буяно.

Соку ик пушкын нумыр вырӟиз: мон но сваркаен ужаны быгато! Бригадаысь  пиосмурт но шуиз ук: варить карон аппаратэн йӧттӥськоно гинэ, кортъёс асьсэос ваче лякиськозы. Палэнысен котькуд уж капчи адӟиське вылэм. Йырам маска понэме бере секытэзлэсь чыртые ик пушкам пыриз кадь. Со гинэ мар ай! Мешок изьыям кадь, син азям пеймыт луиз. Осто, маскаын «укно» нергеез миськемын ӧвӧл шат? Маскаез куштыса ик утчай — чылкыт. Нош малы мон номыре уг адӟиськы? Паймемелы пиосмурт вазиз: варитьтыны кутскемды бере ваньмыз адӟиськоз, юромо озьы чакламын. Нош варитьтыны кутскемлэсь азьло кытчы йӧттӥськемдэ ке но валано ук! Маскадэ амалтэк куштэмед потоз. Ӵыжыр-ӵажыр вазьыны, тылгизьыос отчы-татчы пазяськыны кутскем бере шумпотӥ: ура, пӧрме! Нош мар та, аппарат корт борды лякиськиз кадь, сое ӝутыны ки кужым уг тырмы.  Эшшо ке тыл гизьылэсь кышкан кылдӥз: уд сутскы меда? Шугъяськемме адӟыса, маскаез но, тӥрлыкез но киысьтым талазы.

Малпай вал, шуруповёртэн ужаны капчигес. Тӥни ук пиос огез пу кутыса возе, мукетыз сое гумыос борды юнматэ. Но нылкышно киосын шуруповёрт но уг кылзӥськы вылэм. Радызъя ужаны таки ӧй дышы. Бригадалэн мыным нокыӵе уж оскемез ӧз поты ни.

— Гидэз вуттыны арня дыр кылемын. Тӥ котырын туннэ бергамы ке, нокызьы но дыраз гидэз ум вуттэ. Тӥ луӵӵе кышнопалан шыд пӧзьтэ — пайдаез бадӟымгес луоз, — шуиз Андрей Калинин.

Нялтас вераса, фермаез сћё-дано усьтыны медо 2-тӥ сентябре. Ужрадэ пыриськыны чаклало шаерысьтымы вылӥ кивалтӥсьёс но. Алнаш ёрослэн йырыз Виктор Бобров верамъя, хозяйствоос фермаосты ӵемысь 3-4 ар ӵоже лэсьто. Туэ ик кутскыса, туэ ик йылпумъяны — со нырысьсэ. Соин но, лэся, бригада эшшо ӝоггес ужаны тырше. Берозь но йыг-дым вазем куара кылӥське.

Юрттэм потыку, шуак кулэтэм луиськод ке, сюлэм чепыльске вылэм. Котьма ке но, ӧсэтӥ потыкум, выльысь мышкам уӵертӥ на. Малпай: мон но татчы пичи ке но киме вуттылӥ. Табере вӧзтӥз ортчемелы быдэ озьы малпало.

 Пуктӥськон ӧръяське

Вячеслав Максимов скал кыскисе лыктыны дэмлаз, мултэс ум каре, шуиз. Дояркаослы татын 15-20 сюрс манет уждун тыро. Скалъёслэсь мон уг кышкаськы, кыскыны ас вакытаз дышетски. Выль гидлы синмаськи ке но, городын улонлы ик дышиськем ни, лэся.

Вячеслав Михайлович вуоно арын чакла пудоез  думылытэк возёнъя 400 йырлы ферма лэсьтытыны. Сое компьютеръёсын герӟаны медэ. Озьы ужась ӧжытгес кулэ луоз, пудо йырез но йылтыны пӧрмоз. 1992-тӥ арын кивалтыны кутскыкуз, хозяйствоын 200 йыр скал вал. Араз 1 сюрс 800 литр йӧл кыскизы. Кылем арын 6 сюрс 300 литр люкаськиз. Сюдонъя технологиез быдэсак воштӥзы, скал йырзэс 70-лы йылтӥзы.

— Выльдӥськытэк нокызьы уг луы. Азьло вентиляция гинэ но гидъёсын уг ужа вал,  — шуэ Вячеслав Михайлович. — Кунян гидъёсмес но тупатъямы. Зэм, интызы пичигес. Таин валче 3-тӥ арзэ ни ошакъёсмес вузаськомы. Сое утялтытозь, йӧл люктатозь, вузаны капчигес. 10 нуналъем ошпи усе 5 сюрс манет. Мыло-кыдо басьто гуртоос.

Вячеслав Максимов огез пумысен гинэ жаля: Кузилиын но Сям-Каксяын гуртоос пуктӥськемысь дугдӥзы. Али 1-2 корка ӝутӥське. Хозяйство транспортэн юрттэ ке но, егитъёслэн липиськыны мылкыдзы бадӟым ӧвӧл. Кивалтӥсьлэн нош хозяйствоез азинтонъя вань осконэз егитъёслы. Выль комбайн басьтыны мылкыд вань, но рос-прос механизатор кулэ, шуэ. Выляз пуксьыны котькудӥз быгатоз, но оскыны, адямиез чаклатэк, уг луы, пе.

Кин тодэ, хозяйствозэ выльдэмез бере гуртэ, оло, егитъёс но уногес кылёзы. Таин сэрен ик пуктӥськон мытӥ, шуэ В. Максимов. Нялтас вераса, Алнаш ёросын туннэ котькуд хозяйствоын сямен пуктӥсько. Унояз — кунян гид ӝуто я вужзэ выльдо.

— Ёросын азьвыл тамында уг пуктӥсько вал, — шуэ ёросысь гурт удысъя управлениен кивалтӥсь Владимир Медведев. — Удмуртилэн Тӧроез Александр Соловьев ужпум пуктӥз: 2020-тӥ арын шаерамы кысконо 1 миллион тонна йӧл. Та но  вырӟыны косӥз кадь. Собере, пуктӥськисьёслы али бадӟым юрттэт вуэ. Кылсярысь, выль гидын 1 скал инты хозяйстволы 100 сюрс манет тыр усе ке, кун 50 сюрссэ субсидиен берыктэ. Тупатъям гидысь 1 интылы туэысен 25 сюрс манет сётыны кутскизы.  Та ваньмыз хозяйствоосын ужасьёслэсь пуктӥськыны мылкыдзэс ӝутӥз.

Елена Сараматова

Удмурт Дунне
By Удмурт Дунне Сентябрь 1, 2016 12:25 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<