Ар кутске сентябре

Удмурт Дунне
By Удмурт Дунне Сентябрь 2, 2016 14:52
DSC_0008

С. Танаева.

Cветлана Евгеньевна Танаева ужа Педагогикая элькун колледжын. Удмурт кыллы, шаертодонлы визьнода. Со Россиысь шор профессиослы дышетон удысысь дано ужась, 2000-тӥ арысен кивалтэ колледжысь музеен.

— Светлана Евгеньевна, мар тӥ понна 1-тӥ сентябрь?

— Мон понна выль ар кутске 1-тӥ сентябре — выль осконъёс, выль малпанъёс. Тодон-валан нунал мукет ласянь но дуно — та нуналэ вордӥськемын пичиез Женя нылмы.

«Советской Удмуртия» газетын ужась кузпалы Николай Танаев со нуналэ дежурить карыны кемдӥз — асьтэос тодӥськоды, газет соку арняяз 6 пол потылӥз, ужано луылӥз берозь. Лиля сузэре кунояны вуиз. Кӧтулы вӧсь луэмен, сузэрелэн картэз артысь ӝог юрттэт сётонъя станцие мынӥз. Отын дыртӥллямтэ. Лыктыны вырытозязы, мон нуныме кухняын вордӥ, гогымумыез луиз Лиля. Собере ини «скороен» кык пиосъёс вуизы но паймизы: мар, пе, табере милемлы кароно?

10-2-1

Пичи дыр.

Дышетскон ар вуэмен, мылкыды котьку сямен ӝутскемын. Педучилищеын ужаны кутскеме дырысен 29 ар луиз ни. Йылпумъяй Удмурт кун университетысь филологияя факультетысь удмурт ёзэтэз. Распределениея шедисько вал «Советской Удмуртия» газетэ — специализацие журналистика вал, практикаме «Удмуртия» издательствоын ортчи, газетлэн редакцияз но ӵемысь вуылӥсько вал. Уже интыяськыны отчы ӧй дӥсьты: адӟылӥ, кыӵе йӧно пиосмурт журналистъёс газетын тыршизы. Инты вал Ижысь педучилищеын, отчы ик мыноно кариськи.

— Уд жаляське-а, журналист ӧд луэ шуыса?

— Али малпасько, кузпалыным кыкнамы но журналистъёс луысалмы ке, командировкаосы потанъёсын семья улонамы  трос шуг-секытъёс кылдысалзы: нылпиосты садикысь басьтоно, школае,  кружокъёсы нуллоно. Нош дышетӥсь луыса пичи дыръям ик шудӥсько вал.  Аслам йырам малпам нылпиосты ӟуч кылын диктант гожтытӥсько, собере янгышъёссэс эскерисько,  журналэ оценкаос пуктылӥсько. Со вакытэ   распределениея городысь трос ӟуч дышетӥсьёс лыкто вал Можга ёросысь Бадњым Кибьяысь школаямы. Соос милемлы туж визьмоесь, йӧноесь потылӥзы. Чебер дӥськутэн, чебер причёскаен. Ыммес усьтыса ик, учкылӥмы шоразы.

Ӟуч кылъя но литературая дышетӥсьмы Галина Герасимовна Скобелева туж зол вал. Чебер вераськыны дышетылӥз, литература произведениосты лыдӟыны мылкыдмес лӧпкытъялляз. Классэнымы но кивалтӥз ӟуч кылъя дышетӥсь Юлия Викторовна Швецова. Нош удмурт кылъя дышетӥз Ольга Александровна Тарасова, туж дано дышетӥсь. Радъяз литературно-творческой кружок, отчы ветлыны кутски. Ми, кружоке ветлӥсьёс, вожмаськыса сямен гожъяськимы «Дась лу!» газетэ. Отысь корреспондентъёс но вуылӥзы школаямы. Редакцилэн ыстэмезъя ик Сьӧд зарезь дурысь «Орлёнок» лагерьын шутэтски. Берпуметӥ классъёсын дышетскыкум, журналист луэме потыны кутскиз. Сыӵе мылкыдын ик пыри вал университетэ. Тани классысьтымы Люда Филиппова (Сурчакова) али Алнаш ёрос газетын ужа,  параллельной классысь Вова (Валера) Сидоров — «Удмуртия» кун телерадиокомпаниын. Но мон дышетон удысэ мынэме пумысен уг жаляськы.

Анай-атаеныз, сузэръёсыныз. 1998-тћ ар.

Анай-атаеныз, сузэръёсыныз. 1998-тћ ар.

— Анай-атайды кыксы но эмъян удысын ужамын, нош тӥ, куинь сузэръёс, бырйиды нылпиосты визьноданэз.

— Мамае, Августа Макаровна Кузнецова, Можга ёросысь Бадӟым Кибьяысь участокъя больницаын валтӥсь медсестра вал. Папае Евгений Николаевич  фельдшер луыса ужаз, рентгенолог но вал. Сокращение шедьыса, энергонадзорын ужаз, отысь ик пенсие потӥз. Соос, Можгаысь медучилищеын тодматскыса, семья кылдытӥзы.

Ӵыжы-выжыосмы тросэз медицина удысэн герӟаськемын. Мамамы шуэ ик вал: огды ке но эмъясе мынэ. Пиналъёс висьыку, аслам тазалыке лябӟыку гинэ, малпан лыктылэ ик: оло, враче дышетсконо вылэм. Гужемзэ укол пуктыны но мама доры бертӥськом. Шораз учкисько но, вань висёнъёс бордаз лякиськемын кадь, сокем со ваньзэ сюлэм бордаз басьтэ. Малпасько, эмъясе мынысал ке, мон но сыӵе ик луысал. Нош нылпиос пӧлын ачид но егитомиськод кадь. Школаен ӵошатыса, педколледжын шыпытгес, дорамы лыкто ни улон сюрессэс валаса быръемъёс.

Пичиез сузэре, Оксана Евгеньевна Рысьева, гуртысьтымы ик школаын внеклассной ужъёсъя завуч луыса ужа. Йылпумъяз Удмурт кун университетысь историяя факультетэз. Паймисько солэн творчество ласянь быгатонлыкъёсызлы. Нылпиослэн сюлэмъёсазы олокызьы гинэ усьтон шедьтыны быгатэ. Пӧртэм конкурсъёс, акциос ортчытъя. Анай-атайёсты но бордаз кыскыны быгатэ. Соос куремъя ик классэн кивалтон борды но  басьтӥськиз. Классэныз Можгала киное но, катоке но, бассейнэ но ветло, пӧртэм ужрадъёсы пырисько.

Студентъёсме но Бадӟым Кибьяысь школаям нуллэме вань. Отысь нылпиослэн ансамбленызы тодматскизы, кивалтэ соин покчи классъёсты дышетӥсь Валентина Васильевна Кононова. Кырӟазы-веразы, шудонъёс ортчытӥзы. Бертыса студентъёсы шуизы: ойдолэ азьланяз но гуртъёсы поталомы. Мукет дыръя но гуртъёсы потаммы вань.

Шоретӥез сузэрмы, Лилия Евгеньевна Кузнецова, УдГУ-ысь филфакез ик быдтэмын,  но ӟуч  ёзэтсэ. Дышетскыкуз бызиз, пинал вайиз но нылпи садэ ужаны интыяськиз. Воспитательысен нылпи садэн кивалтӥсь дорозь будӥз. Ужа Ижысь 102 номеро садикын. Заведующиймы милям ӟеч психолог, туж вала адямиосты. Керӟегъяськыкум монэ но индылэ. Соин вераськыса, мылкыд но љутћське. Со тодэ, кызьы ужано котькуд пиналэн, кызьы вазиськоно анай-атайёслы. Котькуд нылпиезлэсь быдэсак нимтулзэс, вордскем нуналзэс тодэ, анай-атайёссылы но нимтулзыя вазиське. Нылпи садзы пӧртэм конкурсъёсы пыриськылэ, вормонъёс басьтылэ. Одӥг аре студентъёсме со доры но практикае нуллӥ.

Студент вакыт.

Студент вакыт.

— Светлана Евгеньевна, куинь нылъёс пӧлысь тӥ самой бадӟымез, кыӵе апай вал тӥ соос понна?

— Сузэръёсме мон  зол визьмалляй пичи дыръязы. Милям песянайёсмы ӧй вал — нэнэй-дядяй, ӵужай-ӵужатай ваньзы ик вазь кулэмын. Мон семьяямы бабушка интыын вал. Бертӥсько ке, мама али но шуэ: бабушкамы бертӥз.

Мамамылэсь кылзӥськы-тэк уг луы вал, со ми азе чурытэсь куронъёс пуктылӥз. Бадӟымез шуыса, ваньзы понна мыным йӧтылӥз. Лиля мынэсьтым 3 ареслы пичи, со туж ик уг кылзӥськы вал, нош Оксанаез монгес будэтӥ — таиныз висмы 7 ар. Вордӥськиз, 1-тӥ классын дышетскыкум. Пинал возьмано шуыса, монэ ӧз лэзе ни продлёнкае кыльылыны. Сыӵе кылеме потэ вал эшъёсыным ӵош!  Пиналъёс урамын шудо, бызьыло, туп џыжало, нош мон,  нуны возьмаса, пукисько. Оксаналы али но серекъяса шуисько: тон мынэсьтым пичи дырме лушкад, шудыны ӧд сёты. Школаын домоводство урокмы вал. Борщ, харчо пӧзьтыны дышетӥзы, тортъёс пӧраллямы. Сузэръёсме но дышетӥ тодэм-валамелы. Шуо, тон, пе, милемды пӧраськыны дышетӥд. Доразы мынӥсько ке, монэ олокыӵе но ческыт пӧрамъёсын утялто.

Ми сузэръёсынымы кенешыса, ог-огмылэсь марлы ке но дышетскыса, улӥськомы но ужаськомы.

— Марлы дышетӥськоды педколледжысь студентъёсты?

— Ужаны кутскыкум, ӟуч кыл но литература, культура речи предметъёсты нуи. Дошкольной отделение кылдэм бере отын удмурт нылпи литературалы но удмурт кыллы дышетӥ. Туэ куинетӥ арзэ нуо удмурт кылын вераськон курсэз. Дышетон удыс азе выль пуктэм куронъёсъя элькунысьтымы ваньмаз ик шор профессиослы дышетон учреждениосын одно ик нуиськыны кулэ улосмылэн историезъя но литератураезъя часъёс яке удмурт кылын вераськыны дышетон курсъёс. Колледжмы дася нылпи садын ужасьёсты, покчи классъёсын дышетӥсьёсты но физкультуралы дышетӥсьёсты. Выль стандартъёсъя ваньмыз удмурт кылэз дышетыны кулэ, дипломазы зачёт мынэ. Студентъёсты удмурт кыллы дышетӥсько, кунгожсьӧр кыллы сямен.

Азьло аръёсы колледжамы тросгес городысь нылпиос дышетскизы, берло дыре ӝыныез пала гуртъёсысь вуо. Но удмурт кылэз тодӥсьёс пӧлазы ӧжыт. Кылем арын дошкольной отделениез йылпумъямъёс пӧлын  4-5 адями гинэ удмуртэз тодэ вал. Но со нылъёс вылэ пыкиськыса ужаны капчигес вал. Мукетъёсызлы юрттыны быгато шуыса, соослэн асьсэлэн но асваланзы будӥз. Нырысетӥ араз ик школьной группаын зол нылъёс вал Пичи Пурга, Якшур-Бӧдья ёросъёсысь, Киров улосысь ӟуч ныл умой вераськыны кутскиз. Семестр пумын юасько: кыӵе амалэн зачётэз радъяломы? Чай юон ортчытом, пе. Кин ке удмурт сиён пӧраз но со сярысь вераз, кин ке кылбур лыдӟиз. Удмурт дӥськутэн пӧрмытскемъёс дӥськут сярысь веразы. Брангуртысь песянайёслэсь кырӟанзэс но быдэстӥзы. Умой дышетскисьёс группаын вань ке, соос сьӧры мукетъёсыз но кыстӥсько.

Удмурт кыллы дышетон борды басьтӥськыкум, туж кышкай вал. Группаын 25 адями, кызьы соосты, удмурт кылын ноку вераськымтэ адямиосты, кыллы дышетод?   Соин ик пӧртэм амалъёсты уже кутоно луэ. Кельше студентъёслы аффрикатаосты веран бордын ужан. Кылем арын колледжамы ялэмын вал методической пособие дасянъя конкурс. Мон дасяй «Вераськиськом удмурт кылын» пособие, куинетӥ инты басьтӥ. Та уже табере юрттэ урокъёсме нуыны. 2000-тӥ арысен кивалтӥсько колледжысь Удмуртиысь калыкез дышетон удыслэн историезлы сӥзем музеен. Тунсыко мед луоз шуыса, урокъёсме музей ужен герӟаны турттӥсько.

Семьяеныз. 2001-тӥ ар.

Семьяеныз. 2001-тӥ ар.

Музеймы бадӟым ӧвӧл, валтӥсь фондэз ог 300 пала, 1 сюрс  пала — юрттэт материалъёс. Вань кылем даурысь 20-тӥ, 30-тӥ, 40-тӥ аръёсы потэм учебникъёс. Ботаника, география, арифметика учебникъёс куке но удмурт кылын потӥзы — соосын  но тодматскыны луэ. Удмурт шаерысьтымы дано дышетӥсьёс сярысь татысь троссэ тодод-адӟод. Удмурт гожъяськон кыллэн кылдэмезлы сӥзем нимаз стендмы но вань. Историен герӟаськем материалъёс трос. Пиналъёс та музеямы асьсэос ик экскурсоводъёс луыны дышетско. Люкам материалъёс юртто студентъёслы шаертодонъя эскерон ужъёсын но вырыны. Котькуд аре пыриськиськом шаерамы но солэн палэназ ортчылӥсь пӧртэм конкурсъёсы, семинаръёсы, конференциосы — дипломъёсмы альбом тыр люкаськемын. Жаляса верано, туж ӧжытэз студентъёс шаертодонэн герӟаськем утчаськон ужъёсын выро.

Шумпотӥсько, кӧня ке ар вис луэм бере туэ мыным классэн кивалтон сётћзы. Тодо, кыӵе уже кыскыны луысал на созэ яке тазэ студентэз. Гожъяськыны мыло-кыдоос понна усьтыны луысал литературной кружок но. Оскисько, студентъёсын 1-тӥ курсысен тодматскыса, мылкыдзэс бугыртыны быгато пӧртэм ужъёсы. Крезьгуръя дышетӥсенымы Людмила Владимировна Зеленинаен  нылпи садын ужасьёс понна удмурт кырӟанъёсын «Крезьгуро корка» сборник дасямы, нотаоссэ гожтӥз Юрий Толкач. Пӧртэм авторъёслэн сяна, аслам гожтэм кылбуръёсы но отын вань. Но коньдон ӧвӧлэн рукописьмы кылле. Малпанмы вань удмурт ансамбль кылдытон сярысь. Мылкыд ӝутӥськемын, группаысьтым пиналъёсын рос-прос тодматсконэз гинэ кылиз на.

10-2-3

Студентъёсын ӵош.

— Светлана Евгеньевна, секыт вакытъёсы мар буйгатэ сюлэмдэс? 

— 6  ар ортчиз ни кузпалы улонысь кошкем бере. Азьло аръёсы туж яратӥсько вал, огнам кыльыса, шутэтскыны. Табере огнын кылён мон понна шимес. Уг яратӥськы кино учкыны, уката ик мелодрамаосты, шулдыръяськонъёсы ветлыны. Шудо семьяосты адӟыса, туж мӧзмыт луэ. Яратӥсько книга, газет лыдӟыны, театре ветлыны. Вань мынам сюлэмме буйгатӥсьёсы, нылъёсылэн нылпиоссы. Женя нылылэн семьяеныз ӵош улӥськом. 2 аресъем Данис внукеным мӧзмыны дыр ӧвӧл.

Туэ гужем мон кык арнялы  ныл дырам берытскылӥ кадь. Бертонмес тодо ке, папамы укно дорысь уг кошкылы, сюрес шоры учкыса, пуке. Нош туэ бертонме ӧй вера, студент дыръям сямен автобусэн вуи. Папа монэ укноетӥ адӟем но, Кузнецова Света бертэ, пе. Мамае воксё паймем: кин-о со сыӵе, тодмо теннисистка-а, мар-а? Ныл дыр фамилие йырысьтыз потэм. Гуртын вӧл-вӧл, сюлэм ик ырак луэ. Бакчаын уж но тырмыт. Городэ вуыса, кык арнязэ ӵужанай луыса ужай, внукъёсыным  пуки.

— Огдыре Наташа Танаевалэн нимыз шаерамы туж чузъяськиз.

— Наташамы гимнастикая Россиысь ӵошатсконъёсы но пыриськылӥз. Спортэн эшъяськемез тазалыкез вылын шӧдӥськыны кутскиз. Я пыдыз шуккиське, я быдэс нуналэн сютэм ветло, сюрлыэз но висьылыны ӧдъяз. Врачъёс шуизы: азьланяз со тазалык вылын зол шӧдӥськоз. Озьы гимнастикае ветлэмысь дугдӥм, школаын дышетсконзэ йылпумъятозяз, «Металлург» культура дворецысь эктонъя ансамбльын солистка вал. Шуылӥз: аслэсьтым нылме гимнастикае уг сёты. Соняезлы 4 арес тырмиз но, гимнастикае сётӥз. Нылыз аслэсьтыз но шумприч. Туэ азьвыл тренерзэ пумитам, шуиз, пе: тон кадь гимнастка та дырозь республикаямы ӧз кылды на.

Наташамы ИжГТУ-ын дышетскиз, налоговой инспектор луыса ужа. Нош Женямы  йылпумъяз УдГУ-ысь Кунгожсьӧр кылъёсъя институтэз, компьютеръёсъя одӥгаз компаниын англи кылысь берыктӥсь луыса ужа. Семьяосынызы арнялы быдэ сямен вуыло Дэри ёросысь Казьмас гуртысь нэнэймы (Колялэн анаез) доры юрттӥськыны.

Лия МАЛЫХ

 

 

 

Удмурт Дунне
By Удмурт Дунне Сентябрь 2, 2016 14:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<