214 сюрс 800 семья будэтэ 337 сюрс нылпи

Удмурт Дунне
By Удмурт Дунне 30 сентября, 2016 14:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Шаерамы лыдъяське ог 214 сюрс 800 семья. Татын будо 337 сюрс нылпиос. Туэ 8 толэзь ӵоже вордӥськиз 14 сюрс 465 пинал.

053195detikolyaskasemya

Кузпалъяськисьёс кулэсмо, нош трос нылпиё семьяослэн лыдзы йылэ.

Трос нылпиос вордӥськемъя Приволжск федерал округын Удмуртия басьтэ 3-тӥ инты. Азьпалан Татарстан но Пермь улос.

Калыкез утён, семья но демография политикая министр Ольга Корепанова верамъя, семьяослэн бадӟым луэмзылы шумпотоно. Со вакытэ ик егитъёс уггес дырто анай-атай кариськыны. Вань вордскем нылпиосты учконо ке, 64 процентаз учырын со кыкетӥ но со бӧрсьы вордскем пиналъёс.

— Жаляса пусъёно, кулэсме выль кылдӥсь семьяослэн лыдзы,  — шуэ Ольга Андреевна. — Али бызён-басьтон вакытазы вуэмын 1990-тӥ-1992-тӥ аръёсы вордӥськемъёс. Соку ӧжыт нылпи вордӥськиз вал. Та но шӧдӥськытэк уг кыльы. Со дыре ик йылэ трос нылпиё семьяослэн лыдзы. Али соос 18 сюрс 309 кузя лыдъясько. Миым ог 1 сюрс 480-лы ичигес вал. Таин валче улон инты пумысен шугъяськонъёс йыло. Улон интызэс умоятон вылысь трос нылпиё но ёрмись семьяослы туэ 20 миллион манет тыр субсидия висъяны чакламын. Семьяос асьсэос чаклалозы, та коньдонэн пуктӥськозы я дась юртъер басьтозы. Кылем арын 45 семьялы субсидия сётӥськиз. Черодын туннэ 1 сюрс 586 семья. Туэ чакласькомы ог 47-езлы юрттэт висъяны. Нырысь ик санэ басьтомы 5 но солэсь трос нылпи будэтӥсьёсты.

Улон интызэс умоятыны малпась семьяослы 20 арлы 5 процентъем займ но сётӥське. Зэм, субсидия басьтэмын ни ке, пичиятэм кредит нокин уз висъя.  Туэ 36 семья капчиятэм кредит басьтӥз ни. Черодын эшшо 1 сюрс 156 семья. Со сяна, 2,5 сюрс трос нылпиё семья муниципал кылдытэтъёсын дунтэк музъемлы султэмын черодэ. Таос пӧлысь 1 сюрс 794-ез кесэг басьтӥз ни.

— Кыкто нылпи ваемъёслы огпол сётӥське 15 сюрс манет, куиньмоос понна — 20 сюрс манет. Берлоосызлы, 5 арес тырмытозязы, вордӥськем нуналазы сётӥське 20 сюрс манет, — шуэ Ольга Корепанова. — Семьяослэсь тазалыксэс утён пумысен но сюлмаськемысь ум дугдӥське. Начар семьяосысь анайёсты санаторийёсы интыяськомы, нылпиослы лагерьёсы путёвка сётӥськомы.

Елена Сараматова

Туспуктӥз А. Горбунов

Удмурт Дунне
By Удмурт Дунне 30 сентября, 2016 14:20 Updated