02 ивортэ: Губиясьёс йыромо, анай пӧяське, ноутбук гочатэ

Удмурт Дунне
By Удмурт Дунне Сентябрь 26, 2016 13:36
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кузё кузьымтэк кылиз

 Сарапул ёросысь Дулесово муниципал кылдытэтлэн йырыз 160 сюрс манет кузьым басьтэмез понна кырмемын.

Следствиея управление ивортэмъя, 55 аресъем кивалтӥсь доры Сарапул городысь 2 адямиос вазиськиллям. Пудо вордон, бакча емыш будэтон понна музъем кесэг куриллям. Кузё соглаш кариськем. Но со понна огезлэсь 60, мукетызлэсь 100 сюрс манетсэс курем. Кузьым басьтыкуз, кивалтӥсь кырмемын вал.

Пусъёно: берло 2 ар ӵоже шаерысьтымы 3 муниципал кылдытэтъёслэн йыръёссы вылэ Уголовной кодексысь 290-тӥ статьяя — кузьым басьтон — ужъёс ӝутэмын вал. Та статьяя кыл кутон улэ кыскемъёслы чакламын 1-3 миллион манет тыриськон, кивалтӥсьлэн пуконэзлэсь мозмытон, 5-10 ар пытсэт сьӧрын пукон.

Пӧечи анай

Дэри ёросысь 30 аресъем нылкышно вылэ уголовной уж ӝутэмын. Интернетэ  алдаськыса ялон сётэм: пиме йӧнатон понна уксё люкасько.

Егит анай ялонзэ ивор вотэсэ 2014-тӥ арын июнь толэзе пуктэм. Ар но ӝыны ӵоже солэн счётаз калык коньдонзэ келям.

Пӧяськонэз шараяны выризы югдурез утисьёс но следовательёс. Кышномуртлэн, зэм но, 3 аресъем пиез вань, но нокыӵе секыт висёнэн со уг курадӟы. Пӧечи анайлэн куриказ 38 адями шедем. Соос 640 сюрс манетсэс пиёкез йӧнатонлы сётӥллям.

Та вакытэ уголовной уж келямын судэ. Нылкышно 6 арлы пытсэт сьӧры шедьыны быгатоз.

 Калыклэсь уксёзэ капыртӥз

Ижысь «Эксперт» управляющей компанилэн 30 аресъем кивалтӥсез калыклэсь 3,7 миллион манетсэ капыртэм.

Та компания шоркарысь Ворошилов, Драгунов Оружейник урамъёсысь, Машиностроительысь коркаосты тупатъяса-чакласа возьылӥз. Кылем арын 1-тӥ январьысен 30-тӥ июлёзь та юртъёсысь калык «Экспертлы» уксё келяз тыл, шуныт, ву понна — ваньзэ-ӧвӧлзэ 3,7 миллион манет. Но «Т-плюс», «Ижводоканал», «УКС» огазеяськонъёсы коньдон ӧз вуы.

Али кивалтӥсь вылэ ӝутэмын уголовной уж. Солэн ваньбурез — машинаез, Дэри ёросысь 20 участокез — арест улэ шедемын.

 Ноутбук гочатӥз

Балезино палъёсысь 15 аресъем пияш Чебаны гуртысь пиосмуртлэсь ноутбуксэ лушкам.

Югдурез утёнъя министерство ивортэмъя, пияш Чебаныысь пиосмуртэн тодмо вылэм. Соин ик коркалэн усьтонэз кытын кылле шуыса, со тодэ вал. Озьы нуназе шорын пияш мурт юртъерын кузёяськем.

Туннэ 7 сюрс манет сылӥсь ноутбук воргоронлы берыктэмын. Пияш вылэ ӝутэмын 158-тӥ статьяя — мурт ваньбурез лушкан — уголовной уж. Та статьяя кыл кутон улэ кыскем муртлы чакламын 6 ар кечат-вамат укно сьӧрын пукон.

Губиясьёс йыромо

Сарапул но Глазов ёросъёсын губиясьёс ышылӥзы.

Глазов палъёсысь 43 аресъем кышномурт тэльын йыромиз. Спасательёслэсь куараоссэс кылзыса, со сикысь потыны быгатӥз. Сарапулын ышиз 69 аресъем пиосмурт. Губиясез утчаны юрттӥз эшез — воргоронэз сике огназэ кельтэм. Ышем мурт 2 час куспын шедьтэмын вал.

Спасательёс индыло: губияны мыноно  эшъёсын, яркыт дӥсен, сьӧре кутоно телефон, компас, фонарик, пурт, тыл поттон но куртчон.

 Утчаськон

Магаданысь югдурез утисьёс вазисько шаерамы улӥсьёслы.

Судъя приставъёслэн Магадан улосысь управленизы утча Шмагин Сергей Васильевичез (вордскемын Магадан городын 2012-тӥ арын 10-тӥ мартэ) но Лысюк Василий Павловичез (вордскемын Магадан улосысь Ольск ёросысь Армань каргуртын 1972-тӥ арын 23-тӥ июне). Та воргорон С. Шмагинлэн атаез луэ.

Кин та адямиосты пумитаз яке адӟиз, жингыртоно таӵе номеръёсъя:

8 (4132) 65-41-70 — Магадан городысь дежурной часть, 8 (4132) 64-96-78, 8-914-851-60-97 — полициысь розыскъя отдел.

Ольга Корепанова

Удмурт Дунне
By Удмурт Дунне Сентябрь 26, 2016 13:36
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<