Вашкала йыружъёс ӧвӧл

Удмурт Дунне
By Удмурт Дунне Август 1, 2016 15:21
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
никешкин

Россиысь Следствиея комитетлэн Удмуртиысь управлениеныз кивалтӥсез, юстициысь генерал-лейтенант Владимир Никешкин.

Малы следовательёс дышетско… эмъян удыслы?

 

Та арня вискын удыс праздниксэс пусйизы следовательёс. Кызьы соос йыружъёсты эскеро — та сярысь кенешиськомы Россиысь Следствиея комитетлэн Удмуртиысь управлениеныз кивалтӥсен, юстициысь генерал-лейтенантэн Владимир Никешкинэн.

Кузьымен уд гочаты

— Владимир Анатольевич, следовательлэн данэз будэ. Сайтты пыр  тӥледлы ӵемысь вазиськыло одӥг юанэн: кызьы дорады интыяськоно? Кыӵе сӥс пыр пото вуоно ужасьёсты, Москваын кадь югдур шаерамы медаз кылды шуыса — алигес отын кырмизы кузьымъёсты яратӥсь следовательёсты…

— Москваысь учыр мылкыдмес сӧриз. Одӥг ласянь, валамон луиз: та адямиос зэмос следовательёс вылӥллямтэ — вужеръёс гинэ. Асьсэос законэз тӥяны кутскиллям. Ӵапак сыӵеосын йырин калыклэн милемлы осконэз лябӟе. Мукет ласянь, та учыр возьматӥз: Следствиея комитет быгатэ ассэ ачиз чылкытатыны — кырсь ужен вырисьёсты шарае шаплы поттэ.

Котьма ке но, уноез ужасьёсмы чылкытэсь. Нокыӵе кузьымъёсын соосты уд гочаты. Вуоно следовательёсты будэтӥськомы пичиысен. Ижысь кадет классамы ветлэ 20 котыр пинал. Ӵошен пӧртэм ужрадъёс ортчытъяськомы. Азьланяз классъёс усьтыны малпаськомы Вотка но Балезино ёросъёсын. Удмурт кун университетысь юридической факультетысь студентъёс дышетскон висказы дунтэк юрттӥсько следовательёслы.

Дорамы ужаны мылкыд карисьёслэсь нырысь сямзэс тодыны турттӥськомы тест пыр. Бӧрысь соосты эскере полиграф — юанъёслы пӧяськыса валэктон сётыны уд быгаты. Алигес 6 студент дорамы пыраз. 5-сэ соку ик палэнтӥмы. Огез шузимытӥсь суретъёсын кушласькемын, кыкетӥез буёло корт лушкем вузамын, куинетӥез кыл кутон улэ шедьылэмын… Полиграф бӧрсьы экзамен радъяськомы. Собере вуоно следователен синмысь синме кенешо управлениысьтымы пӧртэм ёзъёсын кивалтӥсьёс.

Юн сӥсъяськомы ке но, куддыр витьымтэ учыръёс луыло. Одӥг пияшез кема дасямы, 5-тӥ курсысен ик дорамы кутӥмы. Толэзь тыршиз но абдратӥз: та уж, пе, мынам ӧвӧл. Кошкиз. Толэзь но ӧз ортчы — берытскиз. Валай, шуэ, следовательлэсь тунсыкогес удыс ӧвӧл. Но таӵеослы управлениямы ӧс пытсаське ини.

В. Никешкин њечкыла Следствиея управлениысь выль ужасьёсты.

В. Никешкин њечкыла Следствиея управлениысь выль ужасьёсты.

— Берло 9 ар ӵоже туэ нырысьсэ шаерамы йылэмын адями виён, вӧсь карон, сантэман учыръёс. Тросэз йыружъёс герӟаськемын нылпиосын.

— Зэм, лыдпусъёс туэ бадӟымесьгес. Но таин сэрен куалектоно ӧвӧл. Ог 10 ар талэсь азьло Удмуртиын улон-вылон кышкытгес вал. Соку ар ӵоже 58 сюрс йыруж пусйылӥмы. Туала вакытэ — 28 сюрс. Адями виылон учыръёс 200-лэсь ятыр  люкаськылӥзы. Али —

120 пала. Тросэз йыружъёс лэсьтӥсько кудӟем, шузимем йырын. Соин югдурез тупатон понна курыт юонэн но наркотикъёсын зол нюръяськоно.

Жаляса верано, умойтэм учыръёсы ӵем шедьылыны кутскизы пиналъёс. Талэн мугъёсыз пӧртэм. Тросэз туала мумы-бубыослэн лулсэрзы ляб — вожпотонзэс погыльто пичильток вылэ. Ярам, калыкез утён ласянь милемлы юрттӥсько югдурез утисьёс. Жугиськисьёсты-юисьёсты, наркотикъёсын кушласькисьёсты учётэ султыто. Туннэ отын 4-5 сюрс адями лыдъяське. Кышкыт малпаны, мар дауртысалзы соос, полицейскойёс доразы ӵем ӧй пыраллясалзы ке.

 Пытьыос уг ышо

— Уждэс капчиятэ туала техника. Соин, вылды, туннэ элькунамы вань кышкыт йыружъёс сэрттӥсько-пертчисько?

— Адямиез вӧсь карисьёсты, быдтӥсьёсты шараян ласянь Приволжск федерал округын управленимы азьпал радын. Озьы ке но йылаз-пумаз вуттымтэ уголовной ужъёсмы лачак. Малы?

1990-тӥ аръёсы кунамы но, республикаямы но югдур лэчытомиз. Сомында адями виён учыръёсты пусйылӥмы —

одӥг шӧй дорысь мукетыз доры бызьыса ветлылӥмы. Пӧлысьтызы тросэз — законэз тӥясьёс. Валамон, кырсь уж лэсьтэм интыез рос-прос чакланы, адӟисьёслэсь тыро-пыдо юалляськыны дырмы трос ӧз кыльылы. Тӥрлыкмы но огшоры вал.

Йылпумъямтэ ужъёсмы люкаськизы на соин но — адями ышыку, уголовной уж ӝутӥськомы. Чиптэм-чаптэм ышемъёс шаерамы тырмыт. Адямиез утчан кыстӥське аръёсын. Но одӥг уж но ӝажыосамы тузонӟыса уг кылльы. Кылем арын 112 вашкала йыружез сэрттӥмы. Кылсярысь, 14 ар талэсь азьло мурӝолын 3 пиосмуртэ вииллям. Йыр быдтӥсез соку ӧм кутэ — ӵушылэм ки пытьыосты шараяны ум на быгатӥське вал. Али цианокрилатной камерамы вань. Со пытьыослэсь кузёзэс шаплы возьматӥз. Пиосмуртъёсты вииллям гуртын улӥсь 2 воргоронъёс.

— Кыӵе йыружъёсты тужгес секыт эскерыны?

— Трос кужыммы но дырмы кошке эмъясьёсын герӟаськем йыружъёслы. Туэ та ужпумъя дорамы 65 мурт вазиськиз ни. Кылем арын 34 вал. Ӝутэмын 9 уголовной уж, кылсярысь, Нырысетӥ элькун больницаысь, Вотка но Пичи Пурга ёросъёсысь врачъёс вылэ но мукет.

Адямиез, шуом, пуртэн бышкалтӥзы. Юанъёс уг кылдо: улон быриз пуртэн сэрен. Нош эмъясьёслэсь, трос эскеронъёс лэсьтытэк, умойтэм ужамзэс уд вала. Секыт тодыны: оло висисьлэн иммунитетэз ляб вал, оло 1 эмъюм интые солы 2-сэ сётӥзы…

Врачез дышетонлы кошке ичизэ 7-8 ар. Следовательёслы соослэсь янгышъёссэс шедьтыны 2 толэзь сётӥське. Соин амалтэк вазиськиськомы асьсэлы эмъясьёслы. Зэм, пӧлазы шедьыло сыӵеосыз — тодмозэс утемзы потэ. Соку юрттэт утчаськомы шаермылэн палэнысьтыз. Али куд-ог следовательёсмы выро нимысьтыз таӵе ужъёсын гинэ. Эмъян удысъя тодон-валанзэс муромыто.

 Син но, пель но, ым но

— Кыӵе сьӧд ужъёс тӥледыз тужгес абдратӥзы берло дыре?

— Жаляса верано, соос уно. Кылсярысь, Сарапул ёросысь Ш. воргорон 2008-тӥысен 2011-тӥ арозь мурт ваньбурез капыръям, арлыдоосты сантэмаса возем. 3 муртлэсь улонзэ таласа вуттэм. Кескич вылэм — пытьыоссэ ӧм шедьтылэ, сое адӟись но ӧз сюрылы. 2011-тӥ арын пиосмурт кылтэм, пельтэм, синтэм мӧйы кышномуртэ эриктэмам. Ярам, сьӧсь киос улын песянайлы улэп кыльыны удалтэм ик. Ми чабкиськимы: кызьы солэсь тушмон сярысь юалляськод? Юнме шугъяськиськеммы. Кышномуртлэн чиньыосыз  син но, пель но, ым но вылӥллям. Эриктэмась воргоронлэсь ымнырзэ ӵабъям. Озьы чиньыосыз «тодазы кельтӥллям» сьӧсьлэсь туссэ. Кышномурт юрттӥськемъя кылдӥз гипслэсь йыр. Соя тодмамы Ш. воргоронэз. Со азьвыл трос пол суд улэ шедьылэмын вылэм ини. Кырмимы. Кулытозяз нуналъёссэ ортчытоз кечат-вамат укно сьӧрын. Но та сярысь инвалид песянай ӧз тоды ини — улонысь кошкыса вуттӥз.

1999-тӥ арын В. пиосмурт Шаркан ёросысь пичи дыдыез эриктэмам но вием. Но соку педофилэз кыл кутон улэ кыскыны ӧз луы — доказательствоос ӧжыт вал.  Судъёсы, пӧртэм эскеронъёсы кыскаммы понна воргоронлы государство 50 сюрс манет компенсация тыриз на. Со вакытэ та уксё туж бадӟым вал. Йыртэмасьлы кельшем  кун чотын узырмыны. Малпам: дыдыез быдтӥ шуи ке, пе, уголовной ужез выльысь улӟытозы, судъёсы кыскамзы понна нош компенсация тырозы. Ми шӧдӥм: пиосмурт мае ке но тодэ, но номыр уг вера. Юромо радъямы пресс-конференция. Иворчиослэн юанъёссылы со паймымон валэктонъёс сётӥз. Та бӧрсьы ми капчиен шедьтӥмы доказательствоос. Пӧечиез 15 арлы пытсэт сьӧры келямы.

Ог 5 ар талэсь азьло кырмимы Воткаысь уллёез. Соос 10 адямиез вииллям. Вань кулэмъёс — дальнобойщикъёс-лушкаськисьёс. Мурт ваньбурез бускель улосъёсы вузаны вортто вылэм.

Руль бергатӥсьёсын уллё кескич ужалляз. Пӧлысьтызы огез бадӟым машина доры ведраен матэктэ: эстӥськондэ уд-а сёты? Таиз юрттоно кожа. Машинаысь ваське. Ӵапак соку водителез виё. Куд-огзэ луое сого, куд-огзэ гурын суто. Огполаз шокасьтэм мугор отчы тэрымтэ. Гурез юромо бадӟыматӥллям… Уллёез кырмимы, фураез вузаны вырыкуз.

— Йыртэмасьёсын аръёсын-аръёсын ужаса, жадёно, вылды. Ваньмон дыръязы одӥгъёсыз следовательёс арганэн шудо, мукетъёсыз ву вылтӥ байдаркаен шаермес котыръяло, нош тӥ вожпотондэс кызьы улляськоды?

— Ми яратӥськомы таза улонэз, спортэз. Туэ гужем Испание люкаськылӥзы дуннеысь тылпу кысӥсьёс но полицейскойёс. Отын ортчизы Европаысь полицейскойёслэн 6-тӥ шудонъёссы. Ужрадэ 28 кунысь 5 сюрслэсь трос адями пыриськиз. Россилэсь данзэ утизы 24 улосъёсысь югдурез утисьёс. Пӧлазы вал мон но. Шудэ сьӧрам мынэм:  800 но 1 сюрс 500 метре бызьылонын азвесь но туй медаль басьтӥ. Озьы командамы шудонъёсысь 2-тӥ интыен бертӥз!

Ольга Корепанова

Удмурт Дунне
By Удмурт Дунне Август 1, 2016 15:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<