Валъёстэк мӧзмыт

Удмурт Дунне
By Удмурт Дунне 2 августа, 2016 13:06

 

Л. Николаева кема аръёс ужамын колхозын.

Алнаш ёросысь Абышгуртын улӥсь Любовь Николаевалы та нуналъёсы 85 арес тырмиз. Вань улонзэ колхозын ужамын, яратэ валъёсты. Соос шоры туннэ но гочаса учке. 

— Эх, амалы ке луысал, буш вал вылэ пуксьыса, ворттылысал, — шуэ Любовь Алексеевна. — Жаль, арлыды ачиз сярысь тодаз вайытэ. Мон егит вакытэ ваньмаз сямен гуртъёсын вал вордӥзы. Дядяе войнаысь сӧсырмыса бертӥз. Паллян суйзэ ӝуткамез ӧз луы, озьы но фермаен кивалтӥз. Дышетскон ар йылпумъяське гинэ, колхозэ ужаны потӥсько вал. Ялан пастухай: я парсь возьмай, я — кунян. Дядяе шуылоз вал: пичиысь ужад ке, кужмо луод. 4-тӥ классэз быдтыса, ужаны кутски ни. Парсь сюдӥсьёслы юрттӥськи. Вань ужез киын лэсьтоно вал. Ву гинэ кӧня нуллӥськиз. Нуназезэ нюлэскысь пу вайылӥмы парсь сиён пӧзьтыны, нош уйёсы толэзь югытъя со пуэз вандылӥмы. Со вакытэ парсь гидысь выжъёсты миськылытӥзы. Ӧжытак будысагес, ыжъёсты, валъёсты сюдӥ.

Любовь Николаева Казакгуртын вордскемын. Куке сое Карабаен огазеяллям, гуртазы трос вал вайиллям, нимаз гид пуктӥллям. Пудозы возь вылэ пегӟыку, егит нылаш, ужпи вылэ пуксьыса, уллёез берыктыны быгатылӥз. Вал вылын со воргоронъёслэсь но сэзьгес возиськылӥз. Вал вылын ворттылонъя ӵошатсконъёс, пе, со вакытэ ортчытъясалзы ке, одӥгзылы но ӧй келясал, дыр.

23 аресаз Люба бускель Абышгуртэ Пётр Николаевлы бызиз. Татын но со фермаын ужаз. Кузпалэныз ӵош 3 пи но 3 ныл вордӥзы, соосты пичиысен ужаны дышетӥзы. Жаляса верано, кузпалыз улонысь вазь кошкиз, бадӟым пиез но та дуннеын ӧвӧл ни. Любовь Николаева чипы-курег вордэ, бакчазэ утялтэ. Толалтэзэ гинэ Абышгуртын ик улӥсь Таня нылыз доры выже.

— Нэнэймылэн али 18 внукъёсыз но 26 правнукъёсыз ни, — вера Татьяна Васильева. — Пенсие потыса но, трос аръёс ӵоже пуртыын сиён пӧзьтылӥз, колхоз столовоймы ӧй вал бере. Ческыт пӧрамзэ туннэ но тодазы вайылӥсьёс вань на. Собере 6-7 арзэ Алнашысь нянь нуллӥз валэн.

Николаевъёс 30 ар пала вал вордо ини. Котьма ужез быдэстыны капчи, шуо, чаляк гинэ кыткиськод но кулэ интые ворттӥськод.

Татьяна Васильевалэн 5 пиосыз. Ӵужаезлэн, анаезлэн валъёсты яратэмзы юнгес паласькем Степанлы. Ёросын ортчылӥсь Гербер дыръя валэн ворттылонын котьку но вормонъёс басьтылӥз. Та вакытэ семьяеныз Утчан гуртын улэ ке но, ӵукналы быдэ яратоно валъёсыз доры — Сьӧд Ошмес гуртэ — ужаны ветлэ. Ӵапак отын англи выжыысь валъёсты вордо. Егит мурт таин гинэ уг буйгатскы: котькуд пятница нуналэ Казане ветлэ. Отын быдэс Россиысь жокейёс (вал вылын ворттылӥсьёс) люкаськыло, соосты дышето нимо-дано тренеръёс.

Людмила Сурчакова  

 

Удмурт Дунне
By Удмурт Дунне 2 августа, 2016 13:06
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<