Ужгур куара уг шыпыта

Удмурт Дунне
By Удмурт Дунне 2 августа, 2016 13:23
DSC_2777

П. Сыропятовлы буре ваён пулэз усьтон.

Та нуналъёсы Алнаш ёросысь Улын Сыръезь гуртын  Пётр Сыропятовлы буре ваён пул усьтӥзы.

Пётр Нестерович ёросамы гинэ ӧвӧл, быдэс элькунамы тодмо адями. Со  Удмуртиысь гурт удысысь дано ужась, ужысь но ожысь ветеран, Ленин но «Знак Почёта» орденъёслэн кавалерзы, усто кивалтӥсь.

П. Сыропятов вордскемын Улын Сыръезь гуртын. Дышетсконзэ йылпумъямез бере, Быдӟым ож кутскон азьын, сое армие басьто. Ожмаськемез понна пусъемын «За Победу над Германией» медален. 1948-тӥ арын Пётр Нестерович партие пыре. 1962-тӥ арын Сыръезьысь Ильич нимо колхозэн кивалтыны кутске, отын со 24 ар ӵоже ужа. Кивалтон вакытаз пуктэмын выль гидъёс, 2 квартираен коркаос, школа, нылпи сад, 18 квартираен улыно-вылыно  корка, администрацилэн юртэз. Бусыосазы со вакытэ, ю-нянь сяна, трос картофка но етӥн будэтӥзы. Азинсконъёсыз понна Ильич нимо колхозэз Удмурт АССР-ысь Гурт удысъя министерство Горд знамяен 6 пол пусйылӥз.

Буре ваён пулэз усьтон нуналэ, кыӵе ке адӟытонын сямен, гурт администрацие мынон сюрес кузя уно техника дугдэмын вал: грузовой машинаос, комбайнъёс. Митинге ёрос кивалтӥсьёс, Пётр Нестеровичлэн ӵош ужам эшъёсыз, ӵыжы-выжыосыз, кузпалыз, нылыз, внукъёсыз но правнукъёсыз, гуртоосыз лыктӥллям. П. Сыропятовлэсь яратоно кырӟанъёссэ быдэстӥзы «Азвесь гырлы» но «Выль ӟардон» ансамбльёс.

Пётр Нестеровичлы буре ваён пулэз усьтонэ пыриськизы Алнаш ёрос муниципал кылдытэтлэн йырыз Алексей Семенов, ёрослэн йырыз Виктор Бобров,  «Писеевское» эштосэн кивалтӥсь Николай Михайлов, Сыропятовлэн нылыз Марина Кубашева (кузпалъёс Галина но Пётр Сыропятовъёс 4 нылпи будэтӥзы).

— Пётр Нестерович гань-гань кӧлыны быгатоз. Солэсь кутскем ужзэ кризис вакытэ ми утьыны быгатӥмы. Али выльдӥське техника, пудо гидъёс, — вераз «Писеевское» эштослэн тӧроез Николай Михайлов. — Арысь аре ӟеч емыш бичаськом, уждунэз будэтӥськом.

Та нуналэ П. Сыропятовлы 90 арес тырмысал. Ужрадэ люкаськемъёс со сярысь трос ӟеч кылъёс веразы. Пусйизы зэмлыко но чурыт куронъёс пуктӥсь, визьмо, адямилыко, кыл кутыны но азьланьзэ адӟыны быгатӥсь луэмзэ. Пӧламы 15 ар ӧвӧл ни ке но, Пётр Нестеровичез али но ӟеч кылъёсын тодазы ваё. Сыръезь администрацилэн юртэз борды П. Сыропятовлы буре ваён пул шуккон сярысь ӵектонэн потӥз гуртысь ветеранъёслэн огазеяськонзы Е. Андреева кивалтэм улсын.

«Прогресс» СПК-лэн тӧроез Виктор Лебедев пусйиз, асьмеос ӵемысь, пе, Вашкала Египетлэсь историзэ вордскем гуртмылэн, черкогуртмылэн, ёросмылэн историезлэсь умойгес тодӥськом. Табере тани дано улосчизылэн но нимыз  историе кылиз. Пётр Сыропятовез дунъяса но гажаса, люкаськемъёс мемориал доры сяська понӥзы. Пулэз усьтыку, сюрес дурын сылӥсь вань техника, салютын выллем,  куара сётӥз — сигналить кариз.

Елена Рябина

Удмурт Дунне
By Удмурт Дунне 2 августа, 2016 13:23
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<