Шаерамы 6 процентсэ сиён-юонэз фермеръёс потто

Удмурт Дунне
By Удмурт Дунне 4 августа, 2016 12:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Аналтэмзэ ӝутӥсьёс

Россиын фермеръёс асьсэлэсь нуналзэс пусъё 2006-тӥ арысен. Миым Кияса палан быдэс шаерысьтымы фермеръёс праздниказы люкаськизы ке, туэ — Алнаш музъем вылын.

Фото Поздеева_06, гурт

Алнаш ёросысь «Молодая гвардия» эштосысь ужасьёсын кенешон.

Пудо уллёез утё

Шаерамы туннэ ужбер-гатӥсьёсын валче 1 сюрс 398 фермер лыдъяське. Таос ог 133 сюрс гектар музъемез утялто. Удмуртиысь вань бусыос пӧлысь та ог 13 процентэз. Туэ гинэ фермеръёс бусыоссэс 10 сюрс гектарлы паськытатӥзы, кылем арен ӵошатыса, та 8 процентлы уногес.

Правительстволэн Тӧро-езлэн воштӥсез Сергей Токарев верамъя, миым Удмуртиын вань люкам урожай пӧлысь фермеръёс 13 процент ю тысь, 17 процент картошка, 6 процент бакча сиён поттӥзы. Со сяна, 4,7 процент йӧл кыскизы. Кылем арын фермеръёс поттӥзы 1,7 сюрс тонна сӥль, 34,5 сюрс тонна йӧл, 11 тонна ыж гон.

Фермеръёс шаерамы 1990-тӥ аръёсы кылдыны кутскизы. Соку уноез 5 гектар гинэ басьязы. Али 1 сюрс гектар вылын ужасьёс но вань ни. Кылсярысь,  Алнаш ёросын 57 фермер 16 сюрс 304 гектар музъемез гыре-кизе, районысь бусыос пќлысь та 30 процентэз. Азьло уноез музъем ужен выро вал ке, берло дыре мыло-кыдо басьтӥсько пудо вордон борды. Ёрос администрациысь гурт удысъя управлениен кивалтӥсь Владимир Медведев верамъя, фермеръёс 764 скал, 1 сюрс 150 мукет векчи пудо возё. Азинтӥськыны юрттонъя грант утӥсьёс арысь аре йыло но йыло. Туэ 2 мурт грант басьтӥз.

Шаерамы пудо йырзэс будэтыны малпась фермеръёс вань. Уноез — семьяен ужась я али гинэ гурт удысэ кыстӥськись фермеръёс. Таослы уго кун ласянь юрттэт вуыны кутскиз. 2012-тӥ арысен фермеръёслы грант висъяське.  Со дырысен 165 фермер конкурс пыр потӥз, таос пӧлысь 131-ез — кутскись фермеръёс. Вожвылъяськонын вормемзы понна Гурт удысъя но сиён-юонъя министерство  таослы ог 300 миллион манет тыр грант висъяз ни. Таин валче кутскись фермеръёс 341 техника, 221 йыр сюро таза пудо, 1 сюрс 152 ыж но 19 парсь басьтӥзы. Семьяен ужась фермеръёс 5 ферма ӝутӥзы, тупатъязы-выльдӥзы 21 гидэз. Лыдпусъёс сокем ик бадӟымесь но, оло, ӧвӧл. Но Кун Кенешлэн Тӧроез Владимир Невоструев верамъя, туннэ фермеръёслы бадӟым оскон: кытын хозяйство куашкамын, отчы соос кутско. Нош арлы быдэ шорлыдын ог 5 хозяйство банкрот кыле.

Юрттэт тырмыт ӧвӧл

Яр ёросысь Александр Вахрушев ӵапак хозяйство куашкам бере фермер луиз.

— 2010-тӥ арын 9-тӥ апрельысен фермер лыдъяськисько, — шуэ Александр Вахрушев. —  Ёросамы уноез фермере пото ни, районысь вань хозяйствоос сярысь уногес урожай люкаськомы, йӧл кыскиськомы. Пудо вордон бордысен кутскимы, кузпалыным 12 скал солэсь азьло ик возиськомы вал ини. Кин тодэ, оло, фермер ӧй кариськысалмы, но хозяйство куашказ бере, кытчы пырод? Малпай: кытын ке но всё равно ужано, коньдон инмысь уг усьы. Одӥгъёсыз банкрот кылем хозяйстволэн гидъёсаз пудо вордо, соослы пуктӥськоно ќвќл ни. Нош мон кадь куанеръёсызлы котькуд кирпичсэ-кортӵогзэ аслыд утчано. Каль (али) комбайн сяна, мукет техникамы вань ни. Тысь куасьтон но шертон комплекс кулэ на. Грант утыса, субсидия басьтысалмы ке, трослы капчи луысал. Но юрттэт басьтыны секыт — аслад одно ик луыны кулэ кӧня ке сю сюрс манетэд. Нош кытысь со луоз пичи фермерлэн? Туннэ 50 скалмы. Гидъёсмес выльдыны малпаськомы. Ми пудо сиён гинэ но валэн пыртаськомы, кыедзэ но валэн поттаськомы на. Кыед ворттӥсь транспортёр пуктыны медӥськомы. Соку ужасьёсы но капчиен шокчозы. Дӥням 5 мурт тырше. Вуоно арын 100 йырлы ферма ӝутыны чакласькомы. Музъеммы уг тырмы, котырысь но басьтыны шуг. Каль 430 гектар музъеммы. Кыкетӥ арзэ ни 100 гектар вылэ ю тысь кизиськомы, гектарысьтыз 15 центнер басьтыны чакласькомы.

Туала вакытэ фермеръёс туж шаплыесь, куд-огез ёрос Кенешъёсы депутатэ но быръемын. Тросэз — егитъёс. Но фермеръёс радэ султӥсьёс арысь аре ичигес кылё. Оло дӥсьтонзы уг тырмы, оло музъемен ужамзы уг поты, оло бадӟымгес юрттэт возьмало. Шаерысьтымы Фермеръёслэн огазеяськонэнызы кивалтӥсь Михаил Лебедев верамъя, саклык тырмыт ӧвӧл.

— Туэ 15 кутскись фермерлы быдэн 1,5 миллион манет сётъязы. Куд-ог улосвылъёс 3 миллион манетэн висъяло, — шуэ Михаил Лебедев. — Азьланяз, кун юрттэтэз бадӟыматытэк, фермеръёслы шуг луоз азинтӥськыны. Кеч вордон дунтэмгес усе бере, дыр вуэмын та удысъя программаос кутыны. Соку фермеръёс но уногес йӧл поттыны кутскозы. Со сяна, соослы луонлык сётоно вуззэс меӵак калык доры вуттыны. Туннэ со перекупщикъёс пыр лэсьтӥське, фермеръёс таин сэрен трос ыштонъёс адӟо.

Та малпанъёссэ Михаил Лебедев фермерлэсь нуналзэ сӥё-дано пусъён ужрад дыръя но вераз. Удмуртилэн Тӧроез Александр Соловьев люкаськем калыкез оскытӥз: юрттэт али тырмыт ӧвӧл ке но, фермеръёс пумысен сюлмаськемысь ум дугдэ.

Ужрадэ 22 ёросысь 150 фермер пыриськиз. Унозэ пусйизы данъян грамотаосын но таукаронъёсын. Дэмен люкаськон, ог-огеныд тодматскон, ог-огедлэсь ужаны дышетскон бадӟым пайда вае. Куноос понна Алнаш возь вылын пуртыосын ӝук пӧзьтэмын вал, радъямын ёрос йырлэн призэз понна валэн ворттылонъя ӵошатскон, туала техникаен тодматскон. Вуоно арын Фермерлэн нуналыз ортчоз Шаркан ёросын.

Елена Сараматова

Удмурт Дунне
By Удмурт Дунне 4 августа, 2016 12:30 Updated