Новосибирскын — «Шудбур»

Удмурт Дунне
By Удмурт Дунне Август 2, 2016 14:18
шудбур

Дэбес ёросысь «Шудбур» ансамбль вуылӥз «Шуд, арганэ» фестивале.

Алигес Новосибирск улосын ортчиз Г. Заволокин нимо «Шуд, арганэ» 4-тӥез калыккуспо фестиваль. Отчы пыриськиз Дэбес ёросысь «Шудбур» ансамбль но.

Дэбес ёросысь культурая но туризмъя «Сибирь тракт» центрысь «Шудбур» ансамбльлы туэ 5 ар тырмоз. Егит арлыдыз шоры учкытэк, та коллективез тодма но яратэ Удмуртиысь учкись. «Шудбур» аслыз синмаськытӥз «Элькуновидение — 2015» вожвылъяськонын но, «Играй, гармонь» программа Удмуртие вуылыку но. Ансамблен кивалтэ крезьгурчи Алексей Тронин.

— «Шуд, арганэ» калыккуспо фестивале ӧтён вуиз оштолэзе. Ӟеч адямиос юрттэмен, сюрес вылэ коньдон шедьтӥмы, — вера «Сибирь тракт» центрлэн кивалтӥсез Эльвина Будина. — Фестивале Россиысь но солэн палэнысьтыз 100-лэсь уно коллективъёс пыриськизы, Удмуртиысь вал «Шудбур» гинэ — кырӟасьёс Наталья Крылова, Алексей Тронин, арганчиос Анатолий Ложкин но Максим Михайлов (Максим воштӥз висьыны усем Николай Кардапольцевмес). Фестиваль дыръя ик «Играй, гармонь» передачалэн съёмкаосыз ортчизы. Уно кырӟам-верам, тунсыко коллективъёсын тодматскем сяна, ми паймимы Анастасия Заволокиналы. Со уйин 2-3 часозь но съёмкаосын вал, вазь ӵукна нош ик пыд йылаз бызьылэ ни. Передачаез дасяны, пе, трос, дыр кулэ, соин ик «Шудбурлэсь» но мукет ансамбльёслэсь кырӟамзэс адӟыны луоз, вылды, Выль ар бере гинэ. Озьы ик паймытӥз на      Г. Заволокинлэн кылдытэм «Частушка» ансамблез. Татын кырӟало коллективысь шудӥсь-кырӟасьёслэн нылпиоссы но внукъёссы. Сцена вылэ потӥзы 4 аресысен 25 аресозь егитъёс, Анастасия но Захар Заволокинъёслэн пиналъёссы но. Ваньзы туж чебер адӟисько.

«Шуд, арганэ» фестивальын дэбесъёс кырӟазы «Шудбур» но «Шуд, арганэ» кырӟанъёссэс. Кыкезлэсь ик кылъёссэ гожтӥз Эльвина Будина, нош крезьгурзэ — Алексей Тронин.

Галина Семёнова

Туспуктӥз Валерий Нуиахметов

Удмурт Дунне
By Удмурт Дунне Август 2, 2016 14:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<