Маяк Зинапай

Удмурт Дунне
By Удмурт Дунне 4 августа, 2016 10:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
Зинаида Титова.

Зинаида Титова.

Пичи Пурга ёросысь Баграш-Бигра гуртын ӟег нянь кадь ик лякыт сямо но сабырлы удмурт нылкышно улэ — Зинаида Титова. Зинаида Яковлевна кема аръёс ӵоже ужамын ёросысь «Маяк» газетын. Трос кужымзэ но тодон-валанзэ сётӥз литератураен тунсыкъяськись нылпиослы. Никвлад Самсонов писателен џош «Пурга гуръёс» (бӧрысь «Пурга кизилиос») литобъединение кылдытӥз. Удысаз ӟеч тыршемез понна Зинаида Яковлевна  пусъемын «Удмурт Республикаысь культура удысысь дано ужась» нимын. Ужысь ветеран ӝоген 75 арессэ пусъёз.

— Кылэме вань, ёросады но, Бигра гуртады но тӥ шоры гажаса но яратыса, луоз, Маяк Зина шуыса вазиськыло. Солы вожды уг поты-а?

— Малы со понна вожез поттод? Кабзэ со «маяк» кыл аслам нимы кадь ик потэ ини — сомында аръёс џоже «Маяк» газетын ужамын бере. Скалмес гинэ но Маяк шуылӥзы. Ма, Зина апай но шуисез вань, уката ик пичиос но ӵыжы-выжыослэн нылпиоссы. Зинаида Яковлевна шуыса но вазиськисез вань.

— Нош гуртады выжыдэс кызьы шуо вал?

— Вордӥськи мон Баграш-Бигра гуртысен ог 4-5 иськемын туж чебер Куреггуртын. Со монэ ужаны но улыны, удмурт кылэз но калыкез яратыны дышетӥз. Нимысьтыз выжы ниммы ӧй вал кадь.

Пичи дыры сием потыса ортчиз, ноку вал нуныяськыса улыны. Тятямы Яков Алексеевич войнае быриз. Мемее Юлия Анисимовна, со 96 аресозь улӥз, пересьмытозяз Лякопезлэсь бертэмзэ возьмаз. Азьло гуртысь гуртэ чиганъёс ветло вал ук, весь соосын тунаськылӥз. Умойзэ мед вералозы шуыса, лэся, курегпуззэ но, ыж гонзэ но, сӥль-вӧйзэ но соослы ӧз жалялля. Мемеен тятя 3 пинал вайыса вуттӥллям ик. Онисья апае пичиысен Курчум-Норьяын, нюлэс кораса, улӥз. Утыр бертэ но нош кошконэз вуэ вал. Солэсь тазьы кырӟамзэ тодӥсько на:

Меми, чаед пӧсь вылэм ук,

Кызьы ымме ӧй суты.

Мон тынад нылыд ук,

Кызьы жаль уг потӥськы?

Дышетӥсьлы синмаськон аръёс (Зина - сюрсо дэремен, паллян паласен ньылетћ).

Дышетӥсьлы синмаськон аръёс (Зина — сюрсо дэремен, паллян паласен ньылетӥ).

Пот нянь сиыса, будӥмы, дӥськутлы но туж ёрмылӥмы. Соин, дыр, Терентей агае но туж чурыт вал. Одӥг пол со мыным кирза сапег басьтэм. Эшъёсы резинкалэсь нулло ни вал. Со понна кема нуллод, уд пӧськыты, шуиз. Ву мульы (чебер) луон вакытэ но, кӧттырытэк но чебер дӥсяськытэк, утыр ышиз-быриз. Узы-боры бичаса, 8 иськеме Огырчи базаре вузаны пыдын нуллӥськом вал. Ведраосмы секытэсь. Одӥг пол мемей шуэ, нянь басьтыса, берт, ява. Нош мон, чеберез валаны кутскем маке, вань уксёелы открыткаос басьтӥ. Весь соосты учкыса, бертӥсько, сыӵе чебересь пото, нокызьы кӧты уг тыры. Басьтэм вузме мемее адӟиз но ну, коказ ке коказ монэ. Мукетъят озьы ик Огырчиысь, маке вузаса, дыр, мемеен бертӥськом вал. Сиеме потыса, ӟигары быриз, аналски, уг луы ни вамыш но лэсьтэме. Гуртысьтымы ик Устинья апай азямы сюриз. Солэн кисыяз пӧлыпум быдӟа гинэ куасьмем нянез вылэм. Сыӵе со мыным ческыт потӥз, катьяськи, али ке но со няньлэсь ческыт шӧмзэ уг вунэтӥськы. Няньлэн ма быдӟа кужымез вылэм!

Гуртамы покчи классъёсты дышетӥз Наталья Тюрюмкина. Сыӵе мон сое яратӥ, со кадь луэме потылӥз: чебер, егит, визьмо. 6-тӥ но 7-тӥ классъёсты Баграш-Биграын пырпотоно луи. Весяк гуртэ пыдын бертылӥм. Бадӟым классъёсы ини Пичи Пурга черкогуртысь школае вамыштӥм. Татысь но 8 иськемез весяк пыдын бертылӥм. Сюресмы пырак шай вылтӥ потылӥз. Кӧшкеман дыръёс но луо вал, дыр, но кытчы пырод, чидамы. 3 ар огпалась огпала озьы ветлӥмы.

Пичи Пургаысь школае вуи но ӟуч сямен умой-умой уг валаськы. Ма, азьло гуртысь нылпиос ӟуч кылэз ӧм тодылэ ук. Одӥг пол ӟуч кылъя урокын «мать» кылэз падежъя вошъяны косӥзы. Мар карыны валатэк, пукисько, озьы но, тазьы но турскисько — уг пӧрмы. Мон татын туж турттӥ ини дышетскыны, трос лыдӟиськи.

Чеберез валан вакыт.

Чеберез валан вакыт.

— Кин тӥледлы гожъяськон мылкыд пыӵатӥз?

— Дас классэз йылпумъяй но документъёсме Можга педучилищее сётӥ. Отын мон туж шумпотыса дышетски. Милемыз ай Римма Ивановна Данилова но дышетӥз. Солэн кузпалыз Григорий Данилович литературной кружок нуылӥз. Кыкназы ик соос удмурт кылын туж чебер вераськизы. Гожъяськон удыс борды кыстӥськисько вал бере, мон но кружоке гожтӥськоно кариськи. Али ке но Римма Ивановнаез адӟисько ке, мылы-кыды ӝутӥське, вань умоез но ӟечез тодам лыктэ. Жаляса верано, Григорий Данилович улонысь вазь кошкиз.

— Педучилище бере ик-а «Маяк» газетэ вуиды?

— Ӧй ай, ӧй. Отчыозь Брангуртысь школаын дышетӥ, педучилище монэ со гуртэ келяз. Егит дыръя тачак вал юасьёсы но, курасьёсы но. Ёросысьтымы Чурашур гуртын практикаын дыръям но егит пиос шорам учкылӥзы гинэ. Но оломалы Баграш-Бигра гуртысь пилы синмаськи, 1962-тӥ арын Чайникова фамилиме Титова кари. Я, бызи ке бызи ай но, Биграысь школаязы интызы вылымтэ. Соку мон Уча школае интыяськи. Озьы нуналлы быдэ сьӧрлось гуртэ ветлоно  луиз. Отын ужакум ик, вордскизы Таня нылы но Сергей пие. Солань-талань ветлӥсь машинаосы весь уд пуксьы ук, нунал потэм сюрес вылын сылон секытэн сётӥське, куазь но олокыӵе но вошъяське. Мопедэн ворттылыны дышетски. Ай мугоры соку чиед вал, руль сьӧры пуксисько но, возьмаськонэз-мар ӧвӧл, тур гинэ Учае ширтӥсько. Ми доры соку удмурт кыллы но литературалы дышетӥсь Михаил Абрамов вуиз. Ачиз, пе, Миндэрысь. Кема ик дышетыса ӧз вутты, сое «Маяк» газетэ ужаны басьтӥзы. Михаил Александрович ик монэ газет уже лӧпкытъяз, ойдо, пе, мон сьӧры. Мынӥ ук, мынӥ, нош аслам сыӵе школаын ужаме потэ, пиналъёсты дышетэме. Кӧня ке ужаса, берен школае мыно шуыса, малпай.

«Маякъёс»  арлы быдэ потазы гуртоослы юрттӥськыны.

«Маякъёс» арлы быдэ потазы гуртоослы юрттӥськыны.

1-тӥ сентябре, нылпиос школае мыныку, одӥг гинэ тӧдьы кофтае вал, сое дӥсясько но, писпуос сьӧры ватскыса, нылпиос шоры бӧрдыса учкисько. Али ке но озьы ик шоразы учкисько, тани-тани школае мыно кадь потӥсько.

Редакцие вуыса, нырысь ик корректор луыса ужай, газет бамысь янгышъёсты утчай. Кема ик дыр ӧз ортчы, кылысь кылэ берыктӥсе пуктӥзы. Татын уже умой пӧрмиз, лэся, собере монэ удмурт кылъя газетэн кивалтӥсе пуктӥзы — редакторлэн воштӥсез луи. Быдэсак выйи та уже — 33 ар отын тырши. Школае мынэме потэмен, одӥг пол кошкыны куриськонэн пырай ик вал редактор доры, но со мыным «басьты со заявленидэ» шуиз. Редакторъёсын но (соос вошъяськылӥзы), типографиысь кивалтӥсен Валерий Васильевен но тупаса ужамы. Кылысь кылэ берыктон отделын ми 3 кузя вал: мон, Лидия Борисова но Наталья Лекомцева. Али но эшъяськиськом,  ӟеч кусып возиськом. Кивалтӥсе пуктэмзы бере вылӥ тодон-валан басьтыны кулэ луоз, шуизы. Ужан вискам Удмурт кун университетысь удмурт филология факультетын дышетски.

— Тӥ Никвлад Самсоновен ӵош ёросысь гожъяськись нылпиос понна «Пурга гуръёс» литобъединение кылдытӥды. Тӥледыз Пичи Пургаысь гожъяськон удысэ кыстӥськись нылпиослэн кыкетӥ анайзы шуыны луэ.

— Улонын кызьы кулэ озьы ачиз пӧрме. Улосчимы, кылбурчи но журналист Кирилл Ломагин, «Советской Удмуртия» газетын ужакуз, Пичи Пурга ёросын нылпиосын нокыӵе кружокъёс уг ужало шуыса, кылмес юаса выллем, бадӟым статья гожтэм. Соку Нина Фоминична Михайлова роноын ужа вал. Ойдолэ, шуэ, та ужез кызьы ке но интыысьтыз вырӟытом. 1989-тӥ аръёсы вал со. Редакциямы гуртъёсысь нылпиос соку ветло ни вал: кин кылбурзэ лыдӟе, кин гитараен шудэ. Одӥг пол Яган-Докьяысь нылпиос дорамы вуизы. Соосын пумиськыны ӧтимы гожъяськисьёсты Владимир Голубевез, Николай Кондратьевез но Василий Никитинэз. Пукиськом, нылпиослэсь кылбуръёссэс кылзӥськом. Ӵапак со вакытэ Кирилл Ломагин но Никвлад Самсонов дорамы пыризы, Курчум-Норья гуртэ, пе, командировкае потамы. Нылпиослэсь быгатонлыксэс адӟыса, воксё паймизы, Никвладлэн мылкыд ӝуатскиз, таосты вуоно толэзе нош ик ӧтёно, шуиз. Собере милемыз занятиосы мукет школаосы ӧтчаны кутскизы. Гожъяськыны мылкыд карись нылпиосмы пумен тросгес но тросгес луизы. Со ик тӥни литературно-творческой кружокмылэн кылдэмез луиз.

Внучка берыктэ егит дауре.

Внучка берыктэ егит дауре.

Тау шуэм потэ со вакытэ роноен кивалтӥсьлы Геннадий Пупыдовлы. Ёросысь школаосысь нылпиосын ужаны мылкыд кареммы пумысен вазиськеммылы пумит ӧз луы. Бӧрысь кӧня пумиськонъёс ортчытъямы!  Писательёсты, журналистъёсты но тодмо адямиосты дорамы ӧтчаллямы.  Одӥг пол Можга педучилищее калык кылбурчилэн Николай Байтеряковлэн литературно-творческой кружоказ но ветлӥм. Сыӵе милемлы отын кельшиз, нылпиос ӝутскем мылкыдын бертӥзы. Ужмы трос люкаськиз, отӥяз нылпиослэн кылбуръёсынызы но веросъёсынызы «Пурга гуръёс» бичет поттӥмы. Азьланяз малпанъёсмы эшшо но бадӟымесь на вал. Но Владимир Яковлевич улонысь шӧдтэк шорысь кошкиз. Вылез книгамы потыса ӧз вутты ни. Писпу тулыс сяськая ке, емышез сӥзьыл быгыльске. Милям но тыршеммы юнме ӧз луы, литературно-творческой кружоке ветлэм нылпиосмы республикаысьтымы пӧртэм журнал-газетъёсын ужало ини: Елена Панфилова, Ольга но Елена Никитинаос, Алёна Ионина, Светлана Пикулева, Элина Кумачёва, Женя но Ирина Михайловаос, Жанна Рыбакова но Светлана Долганова.

— Кузпалды валалляз-а тӥлесьтыд уждэс?

— Кузпалы Николай Андреевич нырысь ик Баграш-Бигра шор ёзо школаын физкультуралы дышетӥз. Дышетскемез соку солэн ӧй вал на. 34 аресказ Удмурт кун университетэ очно амалэн дышетскыны пыриз. Мон гуртэ 3 нылпиосын кыли. Ку та Коля доре бертоз ини шуыса, весь укное учкыса, пукисько вал. Егит дыръя ог-огедлэсь мӧзмоно но ук ай. Дышетсконзэ быдтыса, историк луиз, кема аръёс ӵоже дышетӥз Гожня школаын. Коляен 53 ар ӵош улӥськом ини. 3 нылпи будэтӥм. Пиосынымы малы ке ӧз удалты, Сергей но Андрей висьыса улонысь туж вазь кошкизы. Таня нылмы Пичи Пурга черкогуртын улэ, почтаын ужа, 4 пиналъёсыз солэн. Ваньзы нуныкайёсмы быдэ вуизы ини. Ми Лена внучкаенымы одӥг азбарын улӥськом. Соос городысь татчы бертӥзы, выль юрт пуктыны малпало. Кык пинал вайизы ини. Милемыз шумпотто Милана нылзы но Амир пизы. Эмеспимы туж умой, киыз зарни, котьмар лэсьтыны быгатэ. Со Абхазиын вордскемын, выжыезъя грузин.

«Маяк» газетлэн редакцияз  кылысь кылэ берыктӥсь.

«Маяк» газетлэн редакцияз кылысь кылэ берыктӥсь.

Кузпалы монэ ӧй ке валасал, секыт луысал, дыр, улыны. Азьло газетъёслэн тиражъёссы туж бадӟымесь вал. Газет поттон нуналъёсы ужано луылӥз уйшорозь но. Ай ваньмыз соку киын лэсьтӥськылӥз, клишеосын ужаллямы. Гуртэ маин сюрем соин бертылӥ. Висмы пичи ик ӧвӧл — 7-8 иськем луоз. Вылаз ик, ялан общественной ужен выроно луиз, партие но пырылӥ. Соин ик ӵемысь уж бере кыльылоно луылӥз на. Газетчилэн ужез ялан сюрес вылын ук, калык пӧлын — материал утчано, доре  бертыса, сое чебер гожтоно, номере вуттоно. Гурт котырысь уж котьку кыкетӥ интые кыльылӥз. Одӥг пол Кечол гуртэ потӥ. Сиеме но, юэме но потыны кутскиз ини. Сюрес дурын машинаосты дугдытъяса сылонъям кема гинэ дыр ортчем, лэся. Дорам кышномурт вуиз но, «Маяк» газетысь шуыса, киям сылалтэм кияр но шорем нянь сётӥз. Сиёнэз сыӵе ческыт кошкиз!

Шутэтскыны потыса но, туж секыт вал мыным газет ужлэсь люкиськыны. Сюлэм ялан калык пӧлы кыстӥськылӥз. Соин но, дыр, Пичи Пургаысь шаертодонъя музеен кивалтӥсь Валентина Зорина монэ дораз ужаны ӧтиз но, шумпотыса мынӥ. Эшшо 2 ар отын тырши на.

— Тӥ лыдӟиськытэк улыны уд быгатӥське, дыр?

— Кызьы сотэк. Со мынам улонэ. Газеттэк адями пашмоз. «Удмурт дуннеез» но сыӵе шумпотыса возьмасько, йырысеныз пыдозяз, шуэм сямен, лыдӟыса потӥсько. Дырыз дыръя уг ке вуы, мӧзмыны кутскисько. Озьы ик «Маякез» но яратыса лыдӟисько. Воксё паймисько куд-ог семьяослы, номыр но кулэ ӧвӧл соослы: газетлы но уг гожтӥсько, библиотекае но уг ветло. Огшоры улонэз уло, ваньбур поттон понна выро. Ми узырмыны ноку ӧм выре, мармы вань, солы шумпотӥськом. Калыкен керетыса уг ветлӥськы, ас поннам кыштыр гинэ улӥсько, инкуазен эшъяськисько. Будосэз ишкалтыкум, адямилы сямен, «вождэ эн вай» шуыса, вазиськисько.

Инкуазьлэсь чеберзэ адӟытэк улыны сюлмы уг чида. Возь вылэ но вуисько, шур дуре но васькасько. Куддыръя со чеберез керттӥськонэ кутӥськод, яркыт пужы пӧрмытӥськод, мукет дыръя кылбур чуръёс вордско.

Баграш-биграосын  пудо возьман сямен.

Баграш-биграосын пудо возьман сямен.

— Гожъямъёсыныды книга поттыны мылкыдды ӧвӧл-а?

— Мон али ӵапак со бордын ужасько. Кылбуръёсы но трос люкаськемын ини, улэм-вылэме сярысь гожъямъёсы но тырмыт. Нылпиослэн нылпиоссы мед тодозы улэм-вылэмме.

— Вань-а быдэсмымтэ малпанды?

— Али ке но мылкыды интыяз пуксемын ӧвӧл — туж потэ вал удмурт газет поттэме. Но куд-ог дыръя быгатылӥ ик аслэсьтым лэсьтылыны — Владимир Голубевлэсь «Доре бертон» повестьсэ быдэсак печатлай, удмурт нылпиослэн гожъямъёсынызы сэрег усьтылӥмы.

Котьма ке но мон асме шудо шуисько, ужаны празднике кадь ветлӥсько вал, кутӥсько но, удмурт дэремме дӥсяса, возьдаськытэк уж дурам пукисько, тур гинэ Пурга кузя ветлӥсько. Ма, али но озьы ик карисько. м

Любовь Тихонова

Удмурт Дунне
By Удмурт Дунне 4 августа, 2016 10:00 Updated