Мар мон курысал Кызлэсь

Удмурт Дунне
By Удмурт Дунне Август 11, 2016 08:48
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
лекомцева

Фестивалез радъяз ӟучомем удмурт нылмурт Евгения Лекомцева.

Кызьы ортчиз удмурт кылъя нырысетӥез фестиваль

Кез ёросысь Мыркчиньыпи гуртын «Яратоно удмурт кыл» фестиваль ортчиз. Удмурт кылэз дышетыны пӧртэм арлыдъем адямиос люкаськизы. Одӥг арня куспын соос кылэн но, культураенымы но тодматскизы.

Радъян

Фестивалез радъяз ӟучомем удмурт нылмурт Евгения Лекомцева. Туэ со вуылӥз Чувашие, «Хавал» лагере. Чувашъёс тодматӥзы Женяез асьсэ амалэнызы: кылзэс дышетыны быгатэ котькуд мылкыд карись. Со понна одӥг арнялы огдышемъя улонлэсь пегӟоно: шур дуре кӧчоно, пу коркаосын яке палаткаосын улыса, дырез ӵош ортчытоно, вераськоно… Озьы  шутэтскон сямен кылэз дышетоно.

Удмурт кылэз гажасьёс понна таӵе инты луиз Кез ёросысь «Живица» кунокуа. Кызь арлэсь кема корка-азбарен кузёясько Лекомцев кузпалъёс. Екатерина Семёновна но Пётр Александрович мыло-кыдо пыриськизы фестивалез радъянэ, нош Женя нылзы тунсыко программа малпаз. Фестиваль огазеяз Кез ёросысь калыкез но лыктэм куноосты, озьы ик чуваш опытэз но удмурт куронъёсмес. Умой пӧрмиз!

лагерь, удмкыл

Дышетскон

Фестивальлэн огез валтӥсь ӧрез — удмурт урокъёсты ортчытон. Удмурт кылэз дышетыны мылкыд карисьёс ӧжыт ӧй вал. Соосты кӧня ке группалы люкыны луоз. Нырысетӥез — палэнысь лыктэмъёс. Москваысь Мария Шнайд тунсыкъяське пӧртэм кылъёсын, яратэ киужез. «Фин-угор посткроссинг» проект пыр удмурт кыл шоры ӝимиз. Туэ нылаш Ижкаре магистратурае пыре — такем кыдёке вуттӥз сое анай кылынымы тунсыкъяськон. Шумерля городысь Наталья Григорьевских пиеныз ӵош трос аръёс ӵоже чуваш лагере ветлэ. Удмурт эшъёсыз гочатӥзы Кезэ лыктыны. Та муген ик «Яратоно удмурт кыл» лагере вуиз Роман Андреев — егит кинорежиссёр но путешественник. Дорамы со великен лыктӥз, ортчиз 600 иськемлэсь уно!

удмкыл1

Фестивальлэн огез валтӥсь ӧрез — удмурт урокъёсты ортчытон.

Мукетыз группа — ӟучомем удмуртъёс. Татын трос пиналъёс. Сьӧлталась Иза Мамеева кык нунокъёссэ вайиз: Самира но Денис кылэз валало, но уг верасько. Кыдёке мынонэз ӧвӧл: «Живицаысь» Лиза, Катяпайлэн нунокез, шуген вераське. Жаляса верано, ёрос центръёсын удмурт кыл ыше-быре. Ачиз Катяпай но удмурт кылэз выльысь дышетӥз 50 аресаз. Соин ик Женя нылыз но удмурт кылын уг вераськы. Фестиваль егитъёслы вырӟет сётӥз.

Эшшо огез группа — Удмуртиысь ӟучъёс. Ваньмыз удмуртэз соос понна али ке но экзотика, озьы ке но та адямиос берытскизы ини асьме пала. Удмурт кун университетысь дышетӥсь Пётр Корольский туж умой вала кылмес, но вераськыны уг дӥсьты. Ижысь лӧпшо пиос Илья Жуйков но Лёша Темников удмурт кыллэсь чузъяськемзэ ярато, азьланяз удмурт нылъёсын кусып тупатыны мылкыд каро…

Валамон, та пӧртэм муртъёслы кылэз дышетыны пӧртэм группаос кылдытӥм. Нылпи садэ ветлӥсьёсын шудӥз логопед Оксана Крылова, ӟучомемъёсын вераськиз Кез ёрос библиотекаысь Ольга Серебренникова, кутскисьёсызлы лад-лад валэкъяз Артём Федоринчик (со ачиз но туэ гинэ дышетӥз ай удмуртэз, со полиглот).

удмкыл

Удмурт кылэз дышетӥзы пӧртэм амалъёсты кутыса.

Шутэтскон

Кызьы тунсыко кароно лагерез? Кылъя урокъёс гинэ мӧзмыт потозы. Юрттӥз куазь: пылаським, бакча сиёнъёсын гусъяським, гуртэ но нюлэскы поръяны потам. Со сяна, дорамы куное ветлӥзы аспӧртэмлыко но визьмо адямиос.

Туж тунсыко вал Кез ёросысь Олып гуртысь шаерчилэн Александр Ивановлэн мадиськемез. Со уйпал удмуртъёслэсь осконъёссэс, нюлэсмурт сярысь мадёнъёсты вераз, дышетӥз сусыпулэсь дэмдоръёс лэсьтыны. УдГУ-ысь Валентин Кельмаков профессорлэн лекцияз Кезысь дышетӥсьёс люкаськизы: кылзӥськизы удмурт гожъяськонлэн кылдэмез сярысь. Яркыт пытьы кельтӥз Вячеслав Ар-Серги — «Кам вылын» книгаеныз тодматскеммы сяна, учкимы на сценариезъя пуктэм «Алангасарлэн вужерез» киноез. Уйпал ёросъёслэн историзы но топонимиказы сярысь веразы УдГУ-ысь тодосчи Пётр Корольский но Дэбесысь Сибыр трактлы сӥзем музейысь Павел Роготнев. Удмурт литературае зымим, тодосчи Александр Шкляев но кылбурчи Богдан Анфиногенов вуылыку. Суредан дуннее — Менять Валёрлэн адӟытоназ. Удмурт калык дӥськутэн но модаен тодматӥзы Дарали Лели но Полина Кубиста, дизайнэн — «Намер» студия. Удмурт кыллэн обществоын кутӥськемез сярысь вераськиз Сергей Бехтерев. Кырӟазы-шулдыртӥзы Анастасия Иванова, Аня Камали, Ильф, Кезысь «Мертчан» ансамбль но Никита Ильин, Яр ёросысь Вортчаысь «Бесерман крезь» но Мария Корепанова.

удмурт

Куное ветлӥзы аспӧртэмлыко но визьмо адямиос.

Ченгешон

Тунсыко ченгешонъёс пуромылӥзы, куд-ог куноосмы вераськыку. Радионуись но стендап возьматӥсь Вера Зорина юмор удыслэн шуг-секытъёсыныз тодматӥз. Соку ик юан кылдӥз: вань-а удмурт юмор? Кызьы сое узырмытоно? Ӟучомем Вера ноку но кылылымтэ Анатолий Ушаковез. Табере ныллэн мылкыдыз вань егит удмурт комикъёсты стендаплы дышетыны. Вераськон жанр туж уг тырмы удмурт дискотекаосын но, пусйизы люкаськемъёс.

Мукетыз висьытӥсь юан — кык яке солэсь тросгес кылъёсын вераськон. Туала вакытэ Россиын билингвъёс тырмыт гинэ, соос верасько ӟуч но удмурт (яке пор, бурят, башкир) кылъёсын. Тэшкылиосты могамзы понна логопедъёс бере кылисьёс пӧлы пырто. Та шонер ӧвӧл! Кык кылын вераськись пинал нырысь мога ке но, берло вала: таиз удмурт кыл, таиз ӟуч, соосын нимаз вераськоно. Нош улонын тазьы луэ: пиналэн удмуртэн вераськемысь дугдо — ӟучсэ суралоз… Ваньзэ тае милемлы мадиз Римын улӥсь удмурт тодосчи Лариса Широбокова. Шуг-секытъёс Италиын но вань: ӟуч-итальян семьяосысь пиналъёс дугдо ӟуч кылын вераськемысь. Озьы итальян кыл мукет кылъёсты ворме. Нош суро семьяос Европаын трос. Адӟиськом, югдур котькытын огкадь.

дарали

Удмурт дэрем сярысь

Азьланез

Мае мон валай «Яратоно удмурт кыл» фестиваль бере? Выльысь валай, удмурт кыл адямиослы тунсыко шуыса. Эшлыко омыр котькинлы кыл пушкы зымыны юрттэ. Адямиослы кулэ эрико, выль дышетскон кабъёс. Огшоры вераськон клуб кылдытыны — мар татын шугез? Удмурт кылъя курсъёс кутскисьёслы гинэ малпамын. Нош кызьы выль тодон-валан басьтоно? Одно ик кылдытоно удмурт кылэз умойгес тодӥсьёс понна группа.

Вуоно арын ми выльысь ортчытом «Яратоно удмурт кыл» фестивальмес. Оскиськом, калык тросгес люкаськоз. Лагере котькин пыриськыны быгатэ — котькинлы тунсыко уж сюроз.

Уйпал удмуртъёслэн улэмзы туж тунсыко вылэм. «Живицаын» зэмос музейын кадь улӥськод, татын кебит но, кеносъёс но вань, коть мунчое пыр, коть вашкала дэремъёс мерта. Чувашиысь Саша пияш озьы ик шуиз: нокытын но такем ческыт сиськеме ӧй вал на (пияш вегетарианец, но туж синмаськиз перепечлы). Тужгес но яркытэз — Тортымысь сю аръем черке но Мудоркыз доры ветлэммы. Алён гурт вӧзысь вӧсь интыын будэ вашкала кыз, со котырын музъем туж кӧс (соин ик та палъёсты Кез шуиллям, лэся). Со кызлы ми ваньмы йыбырттӥм, сӥльын ӝук пӧзьтыса, табань пыжыса, куяським.

[vsw id=»3F2MEZKgRSo» source=»youtube» width=»425″ height=»344″ autoplay=»no»]

Со кызлэсь мон курысал: удмурт кыл котьку улэп мед кылёз.

Мария Шнайд, филолог:

— Мон лагерьын кӧня ке нунал гинэ ортчытӥ, но со куспын миллион ар ортчиз кадь. Адӟи, кызьы перепеч пӧрало, ачим но кӧня ке юрттӥськи. Тодматски туж умой адямиосын. Лэсьтӥм сусыпулэсь ибырвесь (м-м-м, сусыпу зын!), учким удмурт но ӟуч кылъёсын киноос, визьмес сынам лингвистической задачаосын. Со сяна, тодӥм фелинотерапия — коӵышъёсын эмъяськон сярысь!

Наталья Григорьевская, журналист:

— Нырысетӥез фестиваль туж ӟеч пӧрмиз! Котькуд нунал пӧртэм яркыт ужрадъёс ортчизы. Тунсыко но меӵкыт лекциос — котькыӵе темалы. Юан кылдэ: малы мурт кылэз дышетод? Мон малпасько, мукет калыклэсь кылзэ но культуразэ тодыса, мургес валаськод аслэсьтыдзэ, чувашсэ. Кылъёсмы куспын вань трос пӧртэмез, ӧжыт ӧвӧл огкадез, но валтӥсез — выль эшъёс, капчи сямо, мыло-кыдо, лякыт адямиос! Тау!

Дарали Лели

Туспуктэмъёс: vk.com/udmkyl_camp

Удмурт Дунне
By Удмурт Дунне Август 11, 2016 08:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<