Быдэ вуонъя «Эру» шулдыръяськон ортчиз

Удмурт Дунне
By Удмурт Дунне 2 августа, 2016 14:59
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Шаркан ёросысь Зар-Вишурысь Н. Кожевников но Н. Баранова пу пильыло.

Шаркан ёросысь Зар-Вишурысь Н. Кожевников но Н. Баранова пу пильыло.

Карнанэн ву ворттон, пу пильылон, черсӥськон  туала вакытэ вуно ини. Но Шаркан ёросысь Зар-Вишур гуртэ люкаськем егитъёс ваньмызлы талы выльысен дышетскизы быдэ вуонлы сӥзем «Эру» шулдыръяськонын.

Азьвыл дыръёсы, быдэ вуэмез эскерыса, удмурт пиналъёс понна ортчылэм «Эру» шулдыръяськон. Та сям-йылолэз улӟытыны малпазы «Шунды» огазеяськонысь егитъёс. Кыкетӥ арзэ ни пӧртэм ёросъёсысь но улосвылъёсысь егитъёс люкасько Шаркан ёросысь Зар-Вишур гуртэ.

— Талэсь азьвыл «Эру» шулдыръяськонэ ми вет-лӥмы вал Грак ёросэ. Ужрадэз радъяны соку шарканъёс юрттӥськизы. Соин ик ми сое дорамы ортчытыны ӵектӥм,  — вера Зар-Вишур культурая юртлэн кивалтӥсез Ольга Широбокова. — Конкурсъёс туж тунсыкоесь вал, соос егитъёсты эшъяськытӥзы, удмурт сям-йылолъёсты тодазы вайытӥзы. Уго кытысь адӟод на пу пильылэмез, карнанэн ву нуллэмез. Нош черсӥськон егит нылъёс понна — со воксё экзотика!

Перепеч пӧран.

«Эру» шулдыръяськонэ туэ вуизы Вавож, Алнаш, Эгра, Якшур-Бӧдья, Шаркан ёросъёсысь, Башкириысь Татышлы ёросысь 8 командаос. Соос ог-огенызы тодматскизы, удмурт лулчеберетэз но сям-йылолъёсты тодэмзэс возьматӥзы, пересьмон пыжизы, гурт кузя станциосъя бызьылӥзы. Паръёс куспын ортчиз «Кык дыдыкъёс» ӵошатскон. Пиос пуклёк зӥръязы, пу пильылӥзы, нылъёс  карнанэн ву ворттӥзы, пу люказы, черсӥськизы.

— Давай, давай! — чир потто висисьёс.

— Карнанэн ву нуллэм бере киос куалекъяло, — верало черсӥськись нылъёс.

Командаосын тодматскон.

2 минут куспын тужгес но кузь шорт сӥньыс черсӥз Шаркан ёросысь Зар-Вишур командаысь Надежда Баранова — 93 сантиметр. Озьы ке но тужгес шаплыосыз луизы Вавож ёросысь Виктория Меньшикова но Игорь Иванов.

— Милям Партчи школамы удмурт бере, туж потэ «Шунды» огазеяськонэ пыриськеммы: пиналъёсмы котькытын асьсэзыз возьматыны быгато. Но пичияк ӝуткано луэ. Удмурт эктонъёсты эктоно луоз шуыса, тодӥзы но ваменскыны кутскизы, — вера Партчи школаысь валтӥсь вожатой Яна Меньшикова. —  Командамес люкамы Кионгурт школаысь пиналъёсын ӵош, репетицие люкаськылӥзы Партчи школае. Паймим: пиналъёс  чаляк эшъяськизы но зол команда кылдытыны быгатӥзы. Огъя командаен ми 2-тӥ луим.

2 минут куспын тужгес но кузь шорт сӥньыс черсӥз Шаркан ёросысь Зар-Вишур командаысь Надежда Баранова — 93 сантиметр.

Огъя командаос куспын ӵошатсконын 1-тӥ инты басьтӥзы Шаркан ёросысь зар-вишуръёс. Кызьы вера Ольга Широбокова, та ужрадэ пыриськыны гуртысьтызы мылкыд карисьёс туж трос, соин ик быръё тужгес быгатӥсьёссэ но етӥзъёссэ.

3-тӥ луиз Башкириысь команда. «Удмурт Кенеш» огазеяськонлэн кузьыменыз пусъемын вал Алнаш ёросысь 2 дыдыкъёс — Н. Самсонова но Д. Александров.

Пӧсь куазь шоры учкытэк, егитъёс ӝытсэ эктыны но кылизы на.

Мария Векшина

Туспуктӥзы Мария Турова но Влад Степанов

Удмурт Дунне
By Удмурт Дунне 2 августа, 2016 14:59