Зинаида Рябинина: Сю сюрес — ваньмыз милям!

Удмурт Дунне
By Удмурт Дунне Июль 8, 2016 14:42
рябинина

«Удмурт дунне» газетлэн валтӥсь редакторез:

Кылем арня пумын Казаньын ортчиз улосвыл газетъёслэн форумзы. Отчы люкаськизы выжы калыкъёслэн кылъёсынызы газет  поттӥсьёс но.

Зэмзэ вераса, ужрадэ пыриськыны мон нырысь-валысь  туж пумитъяськи — кызьы бигеръёсын ӵошатскод кадь, но организаторъёс шуизы: тӥляд сыӵе тунсыко проектъёсты вань,  милемды но дышетэ…

Собере пуки кылзӥськыса Татарстанлэсь азьвыл президентсэ Минтимер Шаймиевез — кызьы радъяське бускель улосын патриотизмез пыӵатон, мукет  бигер эшъёсты — макем кӧй-вӧй соос ужало, учкиськод, кызьы конкурсъёсын вормись журналистъёслы быдэн 100 сюрс манет премия люкыло,  но уд валаськы, мар тон татын кариськод.

Бертӥськод но ваньзэ вунэтӥськод: одӥг номерез гинэ лыдӟытэк кельтэмысь, кияд мӧзмыса кутӥськод «Удмурт дуннеез» — ух, кыӵе тунсыко репортаж Флор Васильевлэн гуртысьтыз! Быдэс гуртын гондыръёсын артэ одӥг гинэ адями улэ! Жаль, та гуртын будэмъёс со сярысь ӧз но лыдӟе, дыр… Со понна та выллем   гуртъёслэн адӟонзы тунсыко  мукетъёслы — толон гинэ  тодмо луиз: Россиысь Печатья но  ивор вӧлмытонъя агентствоен  ортчытӥськись  «Россиысь патриотъёс» конкурсын «Ми — Россиын улӥсьёс» номинациын «Сю сюрес» проект понна дипломен пусъемын «Удмурт дунне» газет! Зарни-азвесь медаль ӧвӧл ке но, туж шумпотымон: Россиысь 71 газетъёс пӧлын висъяськон — бадӟым вормон, лыдъяськом. Шонерзэ вераса, ужъёсмес конкурсэ келякумы, милям валтӥсь  малпанмы вал — Журналистъёслэн калыккуспо клубзы мед адӟысал, Россиысь национальной кылъёсын  потӥсь  газетъёс кырӟан-веран сярысь гинэ уг гожъяло —  анай кылын гожъяськись журналистъёс быгато пӧртэм сюлэмшугъяськытӥсь ужпумъёсты ӝутыны! Зэм, тыршеммы ӵемысь кыле лыдӟытэк-адӟытэк-ужрадъёс кутытэк.

Меӵак вераса,  сю ар тырмонмы азьын сю гуртэз ортчыса,  та  ужмес йылпумъяны малпаськом вал, но табере малпан вань: оло, сюрсозь вуттоно? Кин кожоз на куштӥськем азе, гуртысь потэм удмурт иворчи сяна? Оло, депутатэ кандидатъёс?  Зэм, кузьмано соослы та  списокмес, но гуртъёсты  улӟытонлы оскон ӧвӧл  — укыр ӧжыт  куара отын…

Удмурт Дунне
By Удмурт Дунне Июль 8, 2016 14:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<