Юыса улӥсь муртэ кин-о чидалоз?

Удмурт Дунне
By Удмурт Дунне Июль 15, 2016 16:10
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
034003,Игринский район,музей сибирского тракта,этапный пункт,тюрьма,стол,посуда

Мукет уяз Семон нош ик ӝӧк улысь ӵаштыртэмез кылӥз.

Семонэз ужысьтыз но уллязы, кышноез но дорысьтыз кошкиз. Коньдонэз быриз бере, юись эшъёсыз но дораз пырамысь дугдӥзы.

— Инмарлэсь, оло, юрттэт куроно, со уга асьмеды чида, — лушкем гинэ ас понназ сипыртӥз Семон.

Валесысьтыз султыса, выж вылэ пыдесъяськыса, мудор азяз вӧсяськиз со. Инмарлэсь коньдон курыны ӧз возьдаськы, юрттэмезлы ӧз ке но оскы.

Секытэн ортчиз нунал. Вуиз уй. Таяз уе Семон умме усьыны ӧз быгаты.

Ӵаштыртэм кылӥськиз. Шыръёс бызьыло, луоз, малпаз воргорон. Нош ӵукна султыса, ӝӧк улысь синйылтӥз… сю манетэз.

Ас синъёсызлы оскытэк, Семон сое ӝутӥз. Дӥсьсэ усьтыр-табыр дӥсяз, ураме потӥз. Бускельзэ, Помка Васяез, адӟыса, гульымез тыр кеськиз:

— Улӥськом! Тани тыныд коньдон, мын бызьылы лавкае.

— Уг тырмы коньдонэд, Семон! — секыт мылкыдын вазиз Вася.

— Ма, валамон ӧвӧл шат: аслэсьтыд йылэты!

Мукет уяз Семон нош ик ӝӧк улысь ӵаштыртэмез кылӥз. Отын комак  до-ол! гинэ Семон шоры учке вылэм, нош ныр улаз — сю манетлык.

Воргорон, оло, лобыса ик кеносэ потӥз, отысь кырым тыраз ю тысь вайиз, ӝӧк улэ кисьтӥз.  Ӝоген комак ю тысь дуре вуиз но кышкатэк сиыны кутскиз.

Табере ӵукналы быдэ сю манетлык ӝӧк улын кылле.

Комак но Семон туж матысь эшъёс кадь луизы: огез уйлы быдэ коньдон вае, нош мукетыз йыдыен утялтэ.

Гуртоос паймемзэс ог-огзылы вераны ӧдъязы:

— Нош та Семон ужатэк но нуналлы быдэ лавкае бызьылэ. Инмысь шат усе солы коньдон?

Семонлэн мылкыдыз лӧптэмын. Улон — майбыр.

…Ӝоген комак дугдӥз коньдон вуттылэмысь. Семон кема тэльмыриз на, юрттэт курыса. Кема-а, ӧжыт-а дыр ортчиз, калыке вӧлмиз ивор: Помка Васькаослэн 3 сюрс манет коньдонзы гулбечысьтызы ышем. Соослэн улон интызы Семонэн одӥг липет улын, квартираоссы гинэ нимаз. Соин но, вылды, Семонэз лушкаськись карыны выризы. Но кызьы калыкын шуо: не пойман — не вор.

Но та учыр паймымон азьланьтӥськиз: Семон Инмарлы оскыны кутскиз, юэмысь воксё куштӥськиз. Кылӥськиз, кышноез но дораз берытскем ни шуыса.

Николай Трубачев

Туспуктӥз А. Горбунов

Удмурт Дунне
By Удмурт Дунне Июль 15, 2016 16:10 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<