Юлия Разина: 50 — шурдыт но чебер…

Удмурт Дунне
By Удмурт Дунне Июль 15, 2016 13:15
Ю. Разина улон шоры учке нылпи синмын.

Ю. Разина улон шоры учке нылпи синмын.

Россиысь Писательёслэн огазеяськонзылэн ёзчиез Юлия Разина зарни юбилейзэ пусйиз


Юлия Разина лыдӟись кие вуттӥз ни нылпиослы но мӧйыослы кык бичетсэ — «Шундылэн кӧкыяз» (2007-тӥ ар) но «Шыпыртӥсько…» (2013-тӥ ар). Ӟуч но бигер классикъёслэсь кылбуръёссэс  удмурт кылэ берыкъя.

 Куинь верос

— Юлия Николаевна, зарни юбилей — со улон сюреслэн огшап люкетэзлы йылпумъян. Ортчем сюрестэс чакласа, маизлы шумпотӥськоды?

— «Ӝыны даур», «юбилей», «зарни» — кылъёсыз ик огшорыесь ӧвӧл ук! 50 арес — со укыр бадӟым кадь потэ вал, кышкыт, шурдыт но лэсьтэм ужед понна калык азьын кыл кутон. Табере валасько: 50 арес — со улонлэн пумыз ӧвӧл на, тросэз та вакытазы гинэ улыны кутско ай! Мон ас сюрестӥм вамышъясько, ас шӧдонэя улӥсько!

Али мон ас мылкыдыя улӥсько: маин вырисько, со ноку но уг акыльты, ас ужелы адямиос гинэ ӧвӧл, ачим но шумпотӥсько. Татчыозь улӥ, сое-тае ужаса, «озьы кулэ» шуыса: ӝегатскытэк кыӵе ке но ужлы дышетсконо, семья кылдытоно, дыртоно, шаплы-шаплы выроно… Асме гажан сярысь малпаськыны маза ӧй сётылы: улонэд ортче, адямиослэсь бере эн кыльы!

Мынам аслэсьтым шӧдонме, лул-сюлэмме кортнаме уг поты. Трос кужымме но дырме быдтӥз мурт визез кылзӥськыса улэме. Одӥг адямилэн но улонэз янгышъёстэк уг пӧрмы, дыр. Мар карод, куд-ог мыдланес вамышъёсме, ужъёсме тупатэме уг луы ни.

— Кыӵе малпанды улонэ ӧз пыӵа, марды быдэсмемын ӧвӧл на?

— Малпасько, куинь быдэсмытэк кылем дартъёсы — соос отысь, Можга ёросысь Нышиын ортчем покчи дырысьтым. Кылсярысь, армиын служить карон сярысь «веросэ». Киросапае кунгож сьӧрын военчастьын ужа ке вал, мыным со туж адӟымон кадь йӧтылӥз. Огпол кылӥ пиослэсь вераськемзэс, кызьы ляб тазалыко муртэ призывной пунктысен берен дораз келяллям. Аслам тазалыке лябгес вал бере, кутски утчаны сое юнматон амал. Агае квартираямы лэсьтӥз турник, ӝуткаськыны дышетӥз, куд-ог пиосмылэсь уно полгес ӝуткаськисько вал! Армие ӧй мыны ке но, тазалыке юнмаз.

8-тӥ класс бере ӝот-ӝот асме утчаны кутски. Маин гинэ ӧй выры! Пионеръёсын вожатой луыса мылысь-кыдысь тырши: мар ачим быгатӥсько, 8-9 аресъем пиналъёсты дышетыны тыршылӥ. Со понна, лэся, дышетӥсь луыны дэмлало вал…

Огзэ колхоз бусыез милемлы, нылпиослы, сётӥзы — гордкушман будэтӥсь бригада кылдытӥзы, отчы монэ бригадире пуктӥзы. Киям сажень кутыса, участокмес мертаса, огнам тубисько бусые. Нокин уг кылы шуыса, ну кырӟасько!

9-тӥ классын дышетскыкум, гуртысьтымы клубен кивалтӥсь Александр  Балобанов вокально-инструментальной ансамбле кутӥз, синтезаторен шудыны дышетӥз. Нош крезьгурен дышетӥсе Татьяна Балобанова мыным кырӟан бырйиз. Мылкыды воксё лӧптӥз: иське, пӧрмытӥсько ук, артистэ ик мыным мыноно! Но школаез йылпумъян азьын огез дышетӥсе шуиз: «Ну, это несерьёзно!» Аслым ачим но, гажано дышетӥсьёсылы но оскемысь дугдӥ кадь. Нокинлы вазиськыны ӧй дӥсьты ни, но ас поннам малпаськи: «Ярам, артистэ монэ точно уз басьтэ, но, иське,  дышетӥсе но мон соос косэмъя уг мыны».

Эшшо огез малпанэ — пичи дыръям книга вылысь авторлэсь нимзэ тодэме бере атаелы шуи: «Папа, мон но писатель луо, ява!»

Тӥни озьы, огез ке но «веросэ» быдэсмоно кадь…

Киросатайёс но анайёс

— Быдэсмиз, луоз, 3 кылбур бичет поттӥды  ини бере. Озьы ик тӥ берыктон ужен выриськоды.

— Мыло-кыдо берыктӥ Анна Ахматовалэсь но Михаил Лермонтовлэсь кылбуръёссэс. Соос мыным туж кельшо. Озьы ик басьтӥськи бигеръёслэн дано кылбурчизы Муса Джалиль борды. Таиз но уже сюлэмыя.

— Ӵуказе нуналлы азяды кыӵе ужпумъёс пуктӥськоды?

— Соос быронтэм: нылпи литература ӧрысь медам пота ни, гожъяськон темаосме паськытатоно но муромытоно, амалъёсме волятоно, кыре-буре потано… Одно ик покчиос доры сюрес шедьтыны кулэ — соосыз удмурт дуннее пыртоно. Угось покчиосмы, анай кылынызы вераськыса, лыдӟиськыса, будӥзы ке, быдэ вуыса но удмурт луэмысь уз дугдэ.

— Тӥляд поэзиды тросэзлы кельше. Кылбуръёсты пумысен асьтэос ма верасалды?

— Валамон, ваньмызлы кылбуръёсы кельшыны уз быгатэ. Адямиос ведь пӧртэмесь, куд-огез кылбурез воксё кулэтэм каре. Кык кылын гожъяськисько бере, лыдӟисьёсы но пӧртэмесь. Соин ик Интернетын ӟуч кылбуръёсы вӧлмемын, нош удмуртъёсыныз гуртъёсы потасько, лыдӟисьёсын улэпкын вераськисько.

— Гуртын улыкуды, ӟуч кылын кылбураллямды, нош Ижкаре вуыса, удмуртомиды?

— Егит дыръям туж пайми «акростих» амалэн гожтэм ӟуч кылбурлы. Собере ачим гожтыса утчай но — кельшиз, возьдаськи ке но, ватыса ке но, дырын-дырын гожъяй. Иже лыктэме бере адӟи, кызьы кузпалы, тодосчи Альберт Разин, удмурт праздникъёс но конференциос радъя. Мыным отысь пыӵаз анай кылме гажан мылкыд. Альберт Алексеевич  дэмлаз газет-журнал бамъёсын печатласькыны. Со ик удмурт кылбуръёсылы «киросатай» луиз. Нош «Удмурт дунне» газетэн но «Кенеш» журналэн ӟеч кусып тупатыны юрттӥз кылбурчи  Татьяна Чернова. Кылбурет удысын мылкыдме юнматӥзы но нырысетӥ лыдӟисьёсы луизы кылбурчиос Ольга Бородина, Людмила Кутянова, литературовед-критик Зоя  Богомолова. Ижысь усточи нылпиослэн школа-интернатысьтызы  библиотекаын ужакум, удмурт писательёслы сӥзем ужрадъёсы ӧтчалляй Пётр Захаровез, Вячеслав Ар-Сергиез, Сергей Матвеевез. Куд-ог кылбуръёсме соослы возьматъяны дӥсьтылӥ. Соос гожъяськыны мылкыдме бурдъязы. Собере УдГУ-ысь «Вуюись» кылбуран студиен кивалтӥсь Татьяна Зайцева, кылбурчиос Виктор Шибанов но Анатолий Перевозчиков кутскем удысме азьланьтыны ӝутказы. Отӥяз Удмуртиысь Писательёслэн союззылэн правлениез дэмлаз мыным асьсэ радазы  пырыны, берыктэм ужъёсы удалтэмын шуыса.

— Тӥ уно аръёс ӵоже Удмурт кун университетысь философия кафедраен герӟаськемын вал. Алигес уждэс воштӥды. Маиныз бордаз кыскиз Удмурт филологияя, финно-угроведениея но журналистикая институт?

— Профессоръёс Анатолий Петраков но Ольга Бушмакина ӝуткало вал социальной философилы сӥзем диссертация гожтыны. Соослэсь кылзӥськыса, философияя экзаменъёс сётъяй, статьяос гожъяй, но мон «висисько» ни вал удмурт темаосын но проблемаосын. Ярам ай, шӧдтэк шорысь удмурт факультетэ ӧтизы но, быдэсак  удмурт ӧре выжи. Удмурт филологияя, финно-угроведениея но журналистикая институтысь магистратураын тодон-валанме будэтӥсько. Туж шумпотӥсько, нош ик уже книгаосын герӟаськиз шуыса.

— Тӥляд Софи нылды быдэ вуэмын ини. Со кин луиз, кыӵе удысэз бырйиз?

— Софимы Удмурт кун университетын дизайнере дышетскиз. Со нылпиослы но нылкышноослы дэремъёс но пӧртэм дӥсьёс малпа.  Та вакытэ иллюстрация дася нылпиослы кылбуръёсын книгаелы.

— Вождэс эн вае, меӵак таӵе но юан сётэме потэ: кузпалыныды аресъёсты пӧртэмесь: маиз татын умоез но аламаез?

— Тросэз та пумысен милесьтым юаллясько, адямиос угось мукет муртэ асьсэя дунъяны-чотаны дышемын. Ма, яратон аресэн герӟаськемын шат?!

Любовь Тихонова

Удмурт Дунне
By Удмурт Дунне Июль 15, 2016 13:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<