Яр ёросысь Бердыш гурт: Татын кивалтэ инкуазь

Удмурт Дунне
By Удмурт Дунне Июль 12, 2016 09:18

Флор Васильевлэн гуртаз улэ 1 адями

Тодмо кылбурчилэн Флор Васильевлэн «столицаяз» — Яр ёросысь Бердыше — сюрыны капчи ӧй вал. Сюрес ӧвӧл, выж куашкамын. Юрттӥськиз Яр ёрос администрация — «уазик» сётӥз.

бердыш2

Дусыгурт дорысь выж.

 Кузь сюрес

Вортча администрациын шуизы: Бердыше тӥ огшоры машинаен уд вутске, валлё зориз. Ӧй оскы, уго берло нуналзэ 30 градус пӧсь возиськиз, лымшор палъёсам музъем чаляк шупа. Такеме лыктэмды юнме медаз луы шуыса, Вортча муниципал кылдытэтлэн йырыз Зинира Вершинина жингыртӥз ёрос администрацие, «уазик» куриз. Сюрессы зэмзэ но урод вылэм: «уазикмы» горд сюй колеяостӥ дынгыр-дангыр тэтча, котырак вуос пуко.

— Та сюрес ми палан умой лыдъяське ай, — вера шофёрмы. — Пиналъёсты Вортча школае нуллыкузы, тупатъяло вал, али уг ни. Татӥ ветлыкум, ӵемысь пумитасько пересьёсты: огез Вортчала няньлы мынэ, мукетыз — лампочкалы.

Таяз радэ но пумитамы:  Алевтина Дюкина магазинысь бертэ вылэм. Тыбыраз — аслэсьтыз секыт котомкаез. Логошуре васькыса кылиз. Васёпиез ортчыса, азямы выж кылдӥз. Тэшкамын. Кызьы со вамен потоно? Шофёрмы улоназ мае гинэ адӟемын ӧвӧл ни, лэся — выжез котыр ласянь эскериз, «уазикысьтыз» молотсэ поттӥз, пулъёсты шуккиз. Всё, пе, табере потом!

Вуим Дусыгуртэ. Табере шедьтоно Бердыше нуись сюресэз — юаны нокинлэсь, котыр чус, куашкам коркаос но аналтэм колхоз юртъёс гинэ сыло (берло тодӥм: тол но гужем татын улэ 4 адями), кытчы ке но кыстӥсько электротыл езъёс. Бердышозь, луоз, уго со бӧрсьы гуртъёс ӧвӧл ни. Аналтэм бусыос кызьпуосын, пипуосын шобырскемын — йыромим. Ярам коть, шуэ шофёрмы, бусыосысь кортъёсты утялтыса быдтӥзы ни — бичаса вузазы, машинаен турын пӧлтӥ ветлыны кышкыт ӧвӧл ни. Котыръяським, котыръяським но мырдэм шедьтӥм Бердыше нуись дамбаез (ӝутэм сюресэз). Кыкнапалтӥз ик писпуос чурен будо, шунды сиосты куто, соин сюрес куасьмыса уг вуттылы. Ог иськемез ортчытозямы, пуштӥрлыке зуркаса быриз — нокыӵе американ гурезьёс кулэ ӧвӧл.

Яр администрациысь Миша шофёр олокыџе но сюресъёсты ортчемын ни.

Яр администрациысь Миша шофёр олокыџе но сюресъёсты ортчемын ни.

Ингожын топольёс адӟиськизы — мырдэм но кызьы вуим, лэся, Ф. Васильевлэн вордӥськем гуртаз.

 Вакчи ульча

Мой шур дуре лачмыт со  пуксемын,

Пичи гинэ — куамын корка.

Флор Васильев та чуръёссэ 1969-тӥ арын гожтӥз. Со дырысен ортчиз ни 47 ар. Та куспын Бердыш тодмантэм воштӥськиз. 2012-тӥ арын администрациын лыдъяллям: гуртын улэ 11 адями. Зэмзэ ке, одӥг гинэ — Николай Николаевич Дементьев. Нокытчы ӧз кошкы Шамардан нюлэс, интыязы Межашур, Шамашур, Ухватшур. Татын кивалтэ инкуазь.

Николай Николаевич Дементьев вордӥськемын Шобогуртын. Огвакытэ гуртъёсы калыклы коркаос пуктылӥзы. Озьы Николай Николаевич вуиз Бердыше. Воргоронэз  гуртысьтыз шедьтыны шуг, со ялан сюрес вылын. Ми сое пумитамы, берен Вортчала мыныкумы гинэ — дораз бертэ вал. Сумкаяз — консерва банкаос, колды нянь, кӧмыз куртчылэмын ни. Сюрес уго кузь — ог 10 иськем.

Н. Дементьевлэн радиоез - телефон.

Н. Дементьевлэн радиоез — телефон.

— Вортчала вутскылӥ, — вера воргорон. — Сбербанкын ужасьёс пенсия сётыны кулэ вал, но ӧз лыктэ. Яре вутсконо луиз.

Вортчала мыныны Николай Николаевич ӵемысь капчигес сюресэз быръе — Никольск пыр. Отӥ, пе, ӵашшатӥ потыса, Никольскозь «шаг шагнуть» (ог 3-4 иськем). Отысен куд-ог нуналъёсы Вортчаозь автобусъёс ветло.

— Огнадылы мӧзмыт ӧвӧл-а? — юаськом Николай Николаевичлэсь.

— Мон огнам ӧвӧл, вӧзам гондыръёс уло, — серекъя воргорон. — Ӟеч отын — чус. Мон гуртын уг пукиськы ук, кӧланы гинэ вутскисько. Али но бертыса Васёпие мыно: одӥг адямилы юрттӥськоно, корка котыраз лэсьтӥськоно. Радиоме кылзӥсько. Али но удмуртъёс маке мачко, дыр, — воргорон кисыысьтыз телефонзэ поттӥз но радиозэ лэзиз.

Иворъёсты сак кылзӥсь-кыса, кӧня ке минут чус сылӥз. Николай Николаевичлы «61 ӧвӧл эшшо», валлё ужаз тракторист, сварщик луыса. Бакчаез вань, сугон, ӵужкушман, гордкушман, картош будэтэ. Бакчазэ нокыӵе йырйись нымы-кибы но уг шедьты, луоз: адями ӝужда турын-куар пӧлы ватскемын.

Николай Дементьевлэн коркаез.

Николай Дементьевлэн коркаез — Лесная, 1-1.

— Гожтэт кыӵе адресъя тӥледлы келяно?

— Ма, мон дорозь уз вуы гожтэтты. Лесная, 1-1, — серектэ воргорон.

Николай Николаевичлэн коркаез, гуртэ пырыкумы ик, милемыз пумитаз. Флор Васильевлэн атай юртэз вадьсын сылэ. Сюрес дурын пограмын куасьмем льӧмпу — Васильевъёслэн писпузы. Арлы огпол, пе, вуылэ Флор Васильевлэн пиез Сергей Флорович, Печатья но ивор вӧлмытонъя агентстволэн кивалтӥсезлэн воштӥсез. Инкуазез, пе, фотое пуктылэ.

Пӧйшурасьёслэн шутэтскон интызы.

Пӧйшурасьёслэн шутэтскон интызы.

Ульча кузя шып гинэ мынӥськом, котыр узы зын лӧсъяське, куштэм коркаос турын пӧлысь лушкемак учкыло. Огез корка кӧтурдэс вылаз бекмыльскемын, мукетызлэн ӟезьыез гинэ кылемын на, куинетӥезлэн — льӧмпуосыз но палэзьпуосыз. Шофёрмы шуэ, та палъёсын калык узыр улэ вал. Зэм но, куд-ог  коркаоссы тып-тып пужымлэсь пуктылэмын, бадӟымесь, чебермамын — коть али но ул. Гурт пуме вуыса, мырӟиським корт будка шоры. Со вадьсысь корка сюрес лёгемын. Капкаезлэн вылаз клёнка кыскемын — липет. Учкиськом но — со улын пуктэмын бадӟым котырес ӝӧк, пуконъёс.

— Пӧйшурасьёслэн со котырзы, — вера Николай Николаевич. — Будкаоссы но соослэн ик.

Бердыш бушаз ог 8 ар талэсь азьло. Кин Яре, кин Глазов ёросэ кошкиз — умой улон утчаны. Соос пӧлын Ульяновъёслэн семьязы.

— Ми 8 ар Ӟанкагуртын улӥськом ни, — вера Юрий Ульянов телефон пыр. — Бердышын ми дыръя 14-16 корка вал на. Школае 3-тӥ классозь ветлӥ Дусыгуртэ, собере — Никольске. Пиналлёсын гуртамы секыт улыны луиз. Никольске вутскыны номырин вал. Кин пиналлёсын, всяк кошкизы…

Мария Векшина

Удмурт Дунне
By Удмурт Дунне Июль 12, 2016 09:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<