Выль кужымен выль вырйылэ

Удмурт Дунне
By Удмурт Дунне 15 июля, 2016 12:01
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

камушка символКылем арня пумын Сигаево черкогуртын юр-яр вал. Выльдэм стадионын бызьылӥзы гурт спортсменъёс.

 Паймытъязы

Стадионысь сюресъёслэн ӟечлыксы спортсменъёслэн вормонъёссы вылын шӧдӥськиз. Нырысь нуналаз ик выль рекордъёс пуктӥзы. Паймытӥзы кузьдалае тэтчасьёс 7 метрлэсь кыдёке лобӟеменызы. Мукет нуналъёсаз но Гурт шудонъёслэн рекордъёссы выльдӥськизы.

— Спортсменъёс выль вормонъёсынызы паймытъязы, — шуэ Гурт шудонъёслэн валтӥсь судьязы Вячеслав Вичужанин. — Нырысь ик шумпоттӥзы бызьылӥсьёс. 5 иськемез котькинлэсь ӝог ортчиз Дэри ёросысь Константин Васильев. Азьвыл аръёсын ӵошатоно ке, рекордэз выльдӥз 26 секундлы. Бӧрысьгес 100 метре бызьылӥсь воргоронъёс абдратӥзы. 8 (!) мурт финиш гожез 11 секундлэсь вазь ортчиз. Таӵеез одӥг Гурт шудонъёсын но ӧй вал на. Озьыен, спортсменъёс ӵошатсконъёслы золгес дасяськыны кутскемын.

Кивалтӥсьёс но асьсэос спортсменъёс серекъяса шуо: одӥг пол бадӟым ӵошатсконэ пыриськем мурт пыраклы спортэн черла. Спортсменъёс таӵе ужрадын ог-огзылы синмасько, семья кылдыто, нуныоссы вордскыса но, ас ёроссы понна очко ваён сярысь сюлмасько. Туэ но егит анайёс вуэмын вал Дэри, Пичи Пурга, Ува, Можга ёросъёсысь.

Кызьы уд данъяськы батыръёсын! Сигаевоын ортчем нырысетӥ Гурт шудонэ пыриськыса, туннэ но ас быгатонлыкъёсынызы егитъёсты паймыто. Со гира ӝуткась Коляос. Таяз учыре но кыкназы ик медальёс басьтӥзы: Пичи Пурга ёросысь Николай Семёнов — азвесьсэ, Дэри ёросысь Николай Мамонтов — туйзэ. Пусйыны кулэ, Н. Семёнов, гужем шудонъёсы сяна, ваньмаз сямен тол шудонъёсы пыриське. Отын но вормонъёсыз лыдъяса быдтонтэм.

Яр ёросысь механизатор А. Дементьев луиз дзюдоист.

Яр ёросысь механизатор А. Дементьев луиз дзюдоист.

Аслаз арлыдыныз нош ик паймытӥз Глазов ёрослэн командаысьтыз Пётр Арафаилов. 1944-тӥ арын вордӥськем воргорон кужымзэ эскере полиатлонын. 40 пол турникын ӝуткаськиз. Вань 49 полиатлонистъёс пӧлын, егитъёсыз но лыдэ басьтыса, турникын ӝуткаськонъя вожвылъяськонын 14-тӥ интые потӥз. Огъя зачётын 4-тӥ интые кылиз.

Солэсь трослы ӧз кыльы Кизнер ёросысь 60 аресъем Евгений Ветров. Ваньмаз Гурт шудонъёсы пыриськемын, нырысь аръёсаз, пе, семьяеныз ветлэм. Бӧрысьгес Ольга нылзы пыдын бызьылӥсьёс пӧлын чемпион луэм. Нылпиоссы будэм бере Евгений ас понназ пыриське: пыдын бызьылӥз, ыбылӥськиз, дуатлонын кужымзэ эскериз, нош берло аръёссэ — полиатлонын. Тазалыкезлы уг ӝожтӥськы, серектӥз: винтовкаен золгес эшъяськыса, вормонозь но ӝутскыны луоно на.

 Шумпотон но синвуаськон

Спортын котьма луэ: кинлы ке удалтэ малпамтэ шорысь медаль басьтыны, нош кин ке сое берпуметӥ секундаз но келяны быгатэ. Кылсярысь, 100 метре бызьылонын тросэзлэн воргоронъёслэн вормон басьтон мылкыдзы стартысен ик адске вал. Фальстарт люкетӥз финалэ шедьыны Сарапул ёросысь Николай Караваевлы, Юкаменск ёросысь Николай Злобинлы но Вотка ёросысь Владимир Злобинлы.

Воргоронъёслэн эстафетазы но учкымон пӧрмиз. Тужгес кужмо 5-тӥ забегын ӧжытак гинэ туй медальзэ ӧз келя Дэри команда. 3-тӥ этапын бызись Алексей Беляевлэн пыд сӧнырез кыстӥськемен, 4-тӥ этапын сылӥсь эшез доры со пал пыд вылаз тэтчаса вуиз.

Яр ёросысь команда но та нуналэ ӝоже усемын вал. Нылъёслэн эстафетазылэн берпуметӥ этапаз спортсменъёс бодызэс умой ӧвӧл сётӥллям — басьтӥллям. 3-тӥ-5-тӥ инты понна нюръяськись командаез ӵошатсконысь воксё палэнтӥзы. Нылъёс синвуаськизы. Со понна яръёсты вормонэныз буйгатӥз дзюдоист Алексей Дементьев.

— Гурт шудонъёсы 4-тӥзэ вуи, — шуэ Алексей. — Сигаевое потон азьын гинэ ёросысь кивалтӥсьёс вазиськизы, дзюдо амалэз, пе, «ӵоксано» вал, одӥг спортсменмы уг окмы. Та амал сярысь кылэме но, адӟеме но ӧвӧл, шуисько. Одӥг уй, пе, вань на, Интернетын бугыръяськыса, дзюдоен тодматскыны. Косӥзы бере, кылзӥськоно кариськи.

Дэри ёросысь Малыхъёслэн семьязы пыриськоз Россиысь Гурт шудонъёсы.

Дэри ёросысь Малыхъёслэн семьязы пыриськоз Россиысь Гурт шудонъёсы.

Сигаевое вуыса, механизатор медаль басьтэм спорт-сменъёслы вожъяськыны ӧдъям, пьедестал вылэ, пе, одӥг пол ке но султылоно вал. Нырысетӥ нуналаз вормисе потэм спортсменъёслэсь гадязы ошем медальзэс куртчыса оскалтэм, оло, вормонзы паласькоз шуыса. 3-тӥ интые потэмез бере Алексей Дементьев оске: вуоно ӵошатсконэ сое одно чортозы.

Сигаевоысь Саратове

1992-тӥ арын сямен ик, туэ но Гурт шудонъёсын вормисе потӥз Дэри ёросысь бадӟым команда. 2-тӥ но 3-тӥ группаосын (санэ басьтэмын ёросын улӥсьёслэн лыдзы) висъяськизы шарканъёс но юкаменскъёс. Гужем вожвылъяськон йылпумъяськиз гинэ, гурт спортсменъёс вуоно стартъёслы дасяськонзэс мыто. Толалтэ куно пумитанлы дасясько Якшур-Бӧдья черкогуртын улӥсьёс, нош гужемзэ — сюмсиос.

Матысь нуналъёсы, 15-тӥ-21-тӥ июле, Саратовын ортчозы Россиысь Гурт шудонъёс. Таяз учыре шаермылэсь данзэ утёзы Дэри, Эгра, Кизнер но Кез ёросъёсысь командаос. Со сяна, Дэри ёросысь Малыхъёслэн но Балезино ёросысь Наговицынъёслэн семьяоссы.

— Спортсменъёс сяна, та ӵошатсконэ пырисько на турнасьёс, скал кыскисьёс но механизаторъёс, ваньмыз-ӧвӧлэз 39 мурт, — шуэ Удмуртиысь сборной командаосты дасянъя центрлэн кивалтӥсез Ольга Скобкарёва. — Гурт удысын ужасьёслэсь данзэс утёз Юкаменск ёросысь команда: Ёжгуртысь турнасьёс Марьям Арасланова но Виктор Дементьев, Засековоысь скал кыскисьёс Галина но Снежана Ившинаос, Юкаменскысь механизаторъёс Сергей Малых но Алексей Невоструев.

Валентина Емельянова

 

Удмурт Дунне
By Удмурт Дунне 15 июля, 2016 12:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<