«Вуоноысь инженеръёс» форум йылпумъяськиз

Удмурт Дунне
By Удмурт Дунне 18 июля, 2016 13:03
инженеръёс

300 пала командаос пӧлысь нырысетӥ интые потӥзы Комсомольск-на-Амуреысь Ю. Гагарин нимо авиационной заводысь егитъёс

16-тӥ пӧсьтолэзе форумез сӥё-дано ворсазы. Туннэ «Чекерилысь» кошко берпуметӥ делегациос.

— Промышленность, оборонной комплекс бордын Россилэн но дуннелэн азьлань сюрессы. Мон тодӥсько, тӥ быгатоды йыртӥянъёсты сэрттыны-пертчыны, бадӟым ужпумъёсты радъяны, — егит инженеръёслы вазиськиз Россиысь Машина лэсьтӥсьёслэн огазеяськонзылэн тӧроез, Кун Думаысь промышленностья комитетлэн кивалтӥсезлэн нырысетӥ воштӥсез Владимир Гутенёв. — Милям 6-тӥ форуммы уг йылпумъяськы, вис гинэ каре. Уго уг быро калыкен, кивалтэтэн ми азе пуктэм ужпумъёс.

— Инженер асьме экономикаын валтӥсез луэ. Вуз карон уг, азинлыко технологиос асьме кунмылы азьлань вамыштыны луонлык сёто, — вераз Удмурт Элькунысь Правительстволэн Тӧроезлэсь ужзэ быдэсъясь Сергей Фефилов.

10 нунал ӵоже мар гинэ та форумын ӧй вал! 30-лэсь ятыр ужрадъёс: котырес ӝӧкъёс, висьытӥсь ужпумъёсъя ченгешонъёс, мастер-классъёс, лекциос, визь сынан, спорт шудонъёс… Инженеръёс пумиськылӥзы Москваысь вуэм актрисаен Любовь Руденкоен, «Брангуртысь песянайёсын».

Форум ӵоже пӧртэм предприятиосысь егитъёс куспазы вожвылъяськизы. Лыдэ басьтӥськиз пӧртэм ужрадъёсы пыриськемзы, котырес ӝӧкъёсты радъямзы, пӧртэм ужпумъёсъя вераськонъёсы пыриськемзы. 300 пала командаос пӧлысь нырысетӥ интые потӥзы Комсомольск-на-Амуреысь Ю. Гагарин нимо авиационной заводысь егитъёс, кыкетӥ интыын — Москваысь «Росэлектроника», куинетӥ луиз Санкт-Петербургысь судноосты лэсьтонъя корпорациысь команда.

Кытын ортчоз форум вуоно арын, тодмо ӧвӧл на. Асьсэ дорын куноосты пумитан понна нюръясько пӧртэм улосвылъёс.

Сергей Захаров

Туспуктӥз А. Горбунов

Удмурт Дунне
By Удмурт Дунне 18 июля, 2016 13:03