Уваын — бокс, Можгаын — егит туристъёс, Ярын — КВН

Удмурт Дунне
By Удмурт Дунне 8 июля, 2016 13:23

Пичи Пурга

Шутэтско но пумен дышетско

Пичи Пурга ёросысь Вуж Мӧнья, Гожня но Уром школаосысь нылпиос «Учительская газеталэн» проектэзъя толалтэ но гужем каникулъёсы кык арнялы экспедицие потало.

Туэ толалтэ соос Москвае вуылӥзы. Нош та нуналъёсы Пенза улосын шутэтско.

— Пензае Россилэн пӧртэм сэрегъёсысьтыз 34 делегация лыктэмын, — вера Уром школаысь физикаен дышетӥсь Геннадий Петров. — Ваньмыз-ӧвӧлэз 25 улосысь 220 адями. Ми Удмуртиысь 6 кузя вуимы. Нуналъёсмы тунсыко но пайдаё ортчо: инкуазез эскеронъя но шаертодонъя мастер-классъёс но урокъёс сётъяськом, кыре-буре потаськом, инкуазен тодматскиськом. Ваньмы палаткаосын кӧласьком. Экспедицимы йылпумъяськоз научно-практической конференциен.

Можга

Тужгес етӥзъёсыз

Керамик гуртэ ёросысь 15 муниципал кылдытэтъёсысь егитъёслэн 15 командаоссы туризмъя фестивале люкаськылӥзы.

Спортэз яратӥсьёс пӧлын пӧртэм пумо ӵошатсконъёс радъямын вал. Воргоронъёс визнанэн чорыг кутылӥзы. Мукетъёсыз, машина донгаса, кужымзэс эскеризы. Кылбур-кырӟан гожтӥсьёс дорын но пӧсь вал — соос асьсэды сцена вылын возьматӥзы. Можгаос таӵе конкурсазы нырысьсэ ӧтизы МЧС-ын ужасьёсты. Соос ортчытӥзы «Тыл кысӥсь дружина» ӵошатскон.

Котькинлэсь шаплы но задор луизы пазялъёс. 2-тӥ интые потӥзы тылойёс. 3-тӥ интыез басьтӥзы вуж каксиос.

Каракулино

Кам шур кузя уязы

Ёросысь арлыдоослэн огазеяськонзы дораз ӧтчаз бускельёссэс — Сарапул ёросысь арлыдоосты.

Песянай-песятайёс Кам шур кузя катерен ворттылыны мылкыд каризы. Озьы соос 3 час ӵоже ву вылын кырӟазы-веразы, улэм-вылэмзы но ужъёссы сярысь кенешизы, азьланьын кусыпъёссэс эшшо но юнгес карозы шуыса, кылзэс сётӥзы — табере ӵемгес ог-огзы доры куное ветлозы.

Дэри

Гуръёссылы 30 ар тырме

Изгуртысь «Марӟан гуръёс» ансамбльлы туэ 30 ар тырме. Кивалтэ соин аспӧртэмлыко воргорон Александр Четкарёв.

Александр Егорович егит дырысеныз вашкала сям-йылолъёсты, удмуртлыкез утён бордын лулысь-сюлмысь ужа. Ансамбле ветлӥсьёс дӥськутсы пыр но удмуртлыкез возьматыны тыршо. Александр Егорович угось ачиз ик куиське, вуриське но керттӥське.

Коллектив кырӟаны-вераны быгатэмзэ возьматыны вуылӥз ини Нижний Новгородэ, кык пол Санкт-Петербурге но Эстоние. Та вакытэ соос Марий Элэ  дасясько. Асьмеос но котьку куноосты пумитаны яратӥськом, шуо изгурт кенакъёс.

Воткинск

Ул, ошмес, ул

Вотка ёросысь Светлое гуртын Вячеслав Холмогоров кичӧлтэм улсын «Ул, ошмес, ул но жильырты» проект улонэ пыӵа.

Вячеслав Александрович нылпиосын ужаны быгатэ, каникул кутскем бере ик со бадӟым классъёсын дышетскись нылъёсты но пиосты котыраз люказ. Нырысь ик басьтӥськизы ульчаосты чылкытатон борды. Та нуналъёсы соос Колхозной урамез быдэсак сузяса потӥзы. Пиос пограм писпуосты коразы но утялтӥзы, гурт пумысь ошмесэз чылкытатӥзы, ӟусъёс лэсьтћзы, жуг-жагез бичазы. Нош нылъёс  сяська мерттӥзы. Пиналъёслэсь тыршемзэс адӟыса, мӧйыос но палэнэ ӧз кыле, асьсэлэсь ульчаоссэс чылкытатыны потазы.

Яр

Быдэс ӝыт серекъязы

«Юбилейный» культура дворецын КВН ортчиз. Ужрадэ зал тыр калык люкаськиз.

Егитъёс сцена вылын маскаръяськизы, такмакъёс кырӟазы, серемес кылбуръёс лыдӟизы, пӧртэм шудонъёс радъязы. Огкылын вераса, КВН-эз учкыны лыктэмъёс ӝытбыт серекъязы, пӧртэм юан-веранъёслы валэктон утчазы.

Ува

Кудӥз город кужмогес

7-тӥ-9-тӥ пӧсьтолэзе Ува каргуртысь стадионын ортче Россиысь боксэн ӵошатсконъя бадӟым турнир.

Отчы пырисько пиналъёс но быдэ вуэмъёс. Асьме спортсменъёс сяна, турнире лыктэмын 8 улосвылъёсысь — Пермьысь, Татарстанысь, Самараысь, Оренбургысь, Саратовысь, Кировысь, Башкортостанысь, Свердловск улосысь — џошатскисьёс.

Тужгес тунсыкоез — 8-тӥ пӧсьтолэзе 8 часын ӝыт Екатеринбургысь но Ижысь боксёръёс куспын вожвылъяськон ортчоз. Тодмо луоз, кудӥз город кужмогес.

— Азьло таӵе ӵошатсконъёсты Россиысь пӧртэм городъёс куспын ӵем ортчытъяськом вал, — вера боксёр Григорий  Григорьев. — Собере со огдырлы чалмылӥз. Али выльысь сое улӟытэ Удмуртиысь Боксъя федерациен кивалтӥсь Олег Тимофеев.

Дасяз Любовь Тихонова

Удмурт Дунне
By Удмурт Дунне 8 июля, 2016 13:23