Устоез гырись улэ Удмуртиын

Удмурт Дунне
By Удмурт Дунне 1 июля, 2016 11:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Тюмень улосвылын ортчиз Россиысь гырисьёс пӧлын 5-тӥез чемпионат. Таӵе вожвылъяськонын бӧрсьысь кыкетӥ арзэ Вавож ёросысь «Удмуртия» хозяйствоысь Вадим Зарецких вормиз. Кык пол устоез гырись луыны нокинлы ӧз кылдыны на.

Вавож ёросысь «Удмуртия» хозяйствоысь В. Зарецких Россиысь гырисьёс пќлын 2-тћзэ чемпион луиз.

Вавож ёросысь «Удмуртия» хозяйствоысь В. Зарецких Россиысь гырисьёс пӧлын 2-тӥзэ чемпион луиз.

Нюръяськонэ пыриськизы 29 улосвылъёсысысь 33 механизаторъёс. Нырысьсэ воргоронъёс радын кужымзэ мертаз нылкышно — Башкириысь гурт удысъя университетысь Алия Якупова. Озьы ик ӵошатсконэ пыриськизы Эстониысь но Великобританиысь гырисьёс. Быгатонлыкъёссэс эскериз дуннеысь судьяослэн калыккуспо коллегизы, соосын кивалтӥз Европаысь гыронъя федерацилэн валтӥсь секретарез Март Баккер.

— Кылем арын 4-тӥ чемпионатысь вормись  луыса бертэме бере верасез сюриз:  случайно гинэ, пе, тыныд удалтӥз. Соин ик туэ калыклы но, аслым но возьматэме потэ вал: мон быгатӥсько. Тюмень улосвылэ вуыса, валай: туэ нюръяськон кылем арын сярысь эшшо но секытгес луоз. Уго ваньзы ар ӵоже рос-прос гырыны дышетскиллям. Эшшо ке лыктыкумы музъем воксё нӧд вал. Шуак пӧсь кариськемен, со люко куасьмиз. Нош конкурсын одно санэ басьто вольыт гырыны быгатэмез. Тужгес зол нюръяськоно луиз Рязаньысь Андрей Шален, со ас вакытаз  вормылӥз ни вал. Но со 2-тӥ интые кылиз. Мыным чемпионлэсь нимзэ сётӥзы но, ас пельёсылы ӧй оскы. Чемпионатлы нимысьтыз дасяськыны ӧз кылды уго. Собере чемпионатын нимысьтыз спортивной герыос кутӥсько, нош соос мынам ӧвӧл, сое басьтыны трактор дунлэсь 2 поллы тросгес коньдон кулэ. Сентябре Англиын ортчыны кулэ дуннеысь гырисьёслэн чемпионатсы. Россилэсь данзэ утьыны мыным оскемын. Отчы дасяськон понна геры утчаломы, шуизы. Англиын 20 устоосыз пӧлы ке но шедёно. Таӵе ужпум пуктӥз Россиысь гырисьёслэн огазеяськонэнызы кивалтӥсь Роман Иванов. Кунгож сьӧрын уго туж зол гыро, соин ик таосын вожвылъяськыны  секыт луоз.

Англиын сяна, Вадим Зарецких вуоно арын Швейцариын ортчоно дуннневыл чемпионатын но Россилэсь данзэ утёно луоз.

Чемпион луэмез сярысь Вадим Зарецких нырысь ик кузпалызлы телефон пыр ивортӥз. Удмурт нылкышно кылъёс ӧз шедьты — шумпотэменыз синвуаськиз. Табере Вадимлэн телефонэз уг кысылы: кин гинэ уг ӟечкыла сое, колхоз радио пыр но вормемзэ веразы. Удмуртилэн Тӧроез Александр Соловьев ӟечкылан телеграмма ыстӥз. Отын пусъемын: «Вормонды сярысь иворез бадӟым шумпотонэн пумитай. Миым ӵошатсконын чемпион луэмдэс туэ эшшо огпол юнматӥды, нош ик устоез гырись луиды. Шумпотымон, Вавожысь нянь будэтӥсьёс пӧлысь потэм мурт кунмылэсь данзэ дуннеын утёз шуыса. Азьланяз но выль вормонъёс сӥзисько!»

Вадим Зарецкихлы вормемез понна «Патриот» УАЗ-лэсь усьтонъёссэ сётӥзы. Зэм, машинаез азбараз ӧз вуы на. Но таӵе кузьымлы пиосмурт дурыстэм шумпотэмын. Асьме кадь сюресъёс вылын ворттылыны туж умой, эшшо ке чорыганы ветлыны яратӥсько, шуэ. Чемпионатын 2-тӥ инты басьтэм муртлы, Рязаньысь Андрей
Шальлы, 110 сюрс манет сётӥзы, 3-тӥ инты понна Татарстанысь Ирек Галиев басьтӥз 70 сюрс манет.

Елена Сараматова

Туспуктӥз Иван Чупров

Удмурт Дунне
By Удмурт Дунне 1 июля, 2016 11:20 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<