Пичи Пурга ёросысь Кулай гурт: Улынгурт нимзэ воштӥз

Удмурт Дунне
By Удмурт Дунне 6 июля, 2016 10:18
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Но калык ӟеч сямо но ужась кылиз

Пичи Пурга ёросысь Кулай гурт Норья муниципал кылдытэтэ пыре. Норьялэсь со 3  иськеме интыяськемын. Нош райцентрозь кусыпсы пичи ик ӧвӧл — 27 иськем пала.

кулай

Заречной ульча.

 Ним суран

Кулай сярысь вакчияк вераны кури Норья муниципал кылдытэтлэсь йырзэ Николай Зайцевез. Николай Георгиевич ачиз но та гуртын ик улэ. Бадӟым, чебер юртэз Кулай  шорын ик сылэ. Н. Зайцев егит дыръяз Афганистанын ожмаськемын, Горд знамя орденэн но трос медальёсын пусъемын.

— Милям гуртмы туж шулдыр интые пуксемын. Самой кузез ураммы Заречной шуыса нимаське. Гуртлэн старостаез луэ Николай Панишев. Гуртамы 80 корка, 253 улӥсез. Гуртын ӝыныезлэсь тросэз нулло Мираев, Кондратьев, Иванов но Байбеков фамилиосты. Покчи классъем школамы вань. Нылпиосты дышетэ Ольга Мираева. Клубмы та вакытэ сутскемын. Висисьёс эмъяськыны Норья черкогуртэ ветло. Асфальт сюрес лэсьтыкузы, муниципал кылдытэтъёслэсь но, калыклэсь но ӧз юалляське, гуртъёслэсь нимъёссэс суразы. Милесьтым Улынгуртмес Кулай шуыса гожтӥллям. Вӧзамы Кобла гурт вал, сое Вишур каризы. Ляльшурез Сизяшур нимазы. Сыӵе воштӥськонъёс ми палан гинэ ӧвӧл, дыр, быдэс Удмуртиын.

кулай

Лавка.

 Йӧл но газет

Гуртэ пырем бере кӧня ке мыныса, паллян киын магазин шеде. Со азьын лачак калыкез. Ӵапак туннэ, пе, Норьяысь почтальонка пенсия сётъяны лыктоз, сое возьмаськом. Эшшо магазин азе йӧлзэс сдать карисьёс мар ке мында люкаськиллям на, ваньмыз тыро ведраосын сыло.

— Куазь ӝокытэн йӧл чаляк чырса, — шуэ Римма Иванова. — Тани ӵукна дырысен кӧня фляга йӧл арам луиз ини. Кытчы пырод? Сое берен гуртамы нуиськом но кин мар каре: кузятэм лэсьтэ, пудозэ люкта, аръян шуккыса, вӧй поттэ… Кулэ ке, мон тӥледлы кузятэм лэсьтыса сьӧрады келяло. Ведраосын юнме йӧлы чырсаса улэ. Огнам йырам кык скал вордӥсько. Колхозын ветеринар луыса ужай. Али шутэтскыны потӥ ини. Егит дырысеным скалэн улон кельше — мыным солэн йӧлыз но, вӧйыз но сомында кулэ ӧвӧл. Огшоры кельше но тӥни. Турын бон трос ик бичано луэ, эн гинэ аналскы. Мон та гуртэ Иваново-Самарскысь бызи. 1987-тӥ арын татчы лыктӥ вал. Табере Кулаез уд ни тодма, туж чебересь коркаос пуктылэмын. Кузпалы егитысен улонысь кошкиз. Оген улыны но хозяйствоез нуыны секыт шуыса, алигес дорам эш пыртӥ ай. Уг но юы, уг но кыскы со, Инмарлы тау, син медаз усьы, ог-огенымы тупаса улӥськом. Нуназе юрт котырын бергаськом, ӝыт вуэ ке, «Удмурт дуннеез» лыдӟыны пуксиськом. Мон сое арлы быдэ басьтӥсько, шумпотыса лыдӟисько. Нош гурт сярысь умой вераны быгатоз Вера Арзамасова. Со доры мынэ. Татын вордскем но улэм адями ваньзэ пыр-поч валэктоз.

Кулайын пуж-пуж ик йӧл кыско.

Кулайын пуж-пуж ик йӧл
кыско.

Куно ӧвӧл ни

Магазинлэсь палэнын сылӥсь чебер юртъерлэн азбараз пырыкум ик, шоро-куспо арлыдъем воргорон (ассэ Вера Андреевналэн Иван пиез шуиз) чабкиськиз: «удмурт дуннеос» мар татӥ ветло? О-о, ми, пе, газеттэс быдэс семьяенымы вожмаськыса сямен лыдӟиськом, тусбуйёстэс но ваньдылэсь тодмаськом. Вера Андреевна бакчаяз турынзэ октэ-калтэ вылэм.

Р. Иванова «Удмурт дуннеез» лыдњыны яратэ.

Р. Иванова «Удмурт дуннеез» лыдњыны яратэ.

— Вашкалаос та гуртэз Улынгурт шуо вал, — веранзэ кутске нылкышно. — Собере олокинлэн оломаиз луиз, Кулай шуыны кутскизы. Шурмылэн но ноку но нимыз ӧй вал, гурт нимъёсты гожъяса ветлыкузы, олокытысь Уйвай шуыса гожтӥзы. Азьло шур гинэ огшоры шуиськом вал. Гурт котырысь возь но бусы нимъёсты юалляськыса но гожъяса, Аля ветлылӥз (вераськон мынэ Алевтина Айманова сярысь. Со «Ӟечбур!» газетын корреспондент луыса ужаз, висеменыз сэрен улонысь вазь кошкиз — авт.). Газетын но материалъёссэ печатлалляз. Табере со сямен нокин но уг интересоваськы ни кадь. Мон гуртысьтым нокытчы ӧй кошкылы, 79 ар татын улӥсько ини. Пот нянь сиыса будэм ёзъёсы чисто кулыса быризы ини. Пичи дырысеным олокыӵе но ужез ужай, весь колхозын тырши: скал но кыски, кунян но сюдӥ. Кузпалыным 3 пинал вордӥм. Со табере ми вӧзын ӧвӧл ни. Нылпиосты сьӧре но мар нуллыса, ужаськиз. Уксё но ӧз сётъялэ, трудоденен ужатылӥзы. Мон Иван пиелэн семьяеныз улӥсько. Кенэ Вавож ёросын вордскемын. Зоотехнике дышетскем муртэ ужаны татчы келяллям. Колхоз быремен валче нылпи садын сиён пӧрась луыса ужа. Семья вань бере, кызьы ке но сое сюдоно ук. Иван но Ленин нимо колхозын шофёр луыса ужа вал. Табере Иже охранае ужаны ветлэ. 4 пиналъёссы будо.

кулай

В. Арзамасова турын берыктэ.

Паймод, ява, та улонлы, чисто гуртэз быдто ини. Ярам, куд-огез быгато на лэсьтӥськыны, чебер юртъеръёс пуктыло. Колхоз быремен, калык воксё ужлы ёрмемын. Азьло аръёсын ӵошатыса, адями табере туж зол воштӥськиз. Бӧлякез но мае тодӥсь ӧвӧл ни, астэ ачид тод но пук гуртад, куно но ӧвӧл ни. Вашкалаос, секыт ке но вал ужзы, туж шулдыр улӥзы. Милям Гаймошурнюкмы вань. Вазен кышноос, пырак отын ик сураськыса, вина пӧзьтылӥллям. Мосейнюкын но даурто вал, дыр. Одӥгзэ ураммес Тамакульча шуиськом. Со интыын одӥг пиосмурт тамак вузаса улэ вылэм. Норья муниципал кылдытэтмы 2004-тӥ арын гинэ ай кылдэмын. Куке-соку ми Нылга сельсоветэ пырылӥмы.

— Норья тӥлесьтыд кыдёкын ик ӧвӧл. Отысь монастыре ветлӥськоды-а?

— Инмарлы оскисьёс милям трос. Вашкала дырысен Норья вылын (котырын) улӥсьёс вӧсяськыны Пычасысь черке лушкем ветло вылэм. Ай соку Норьяын монастырь вылымтэ на. Ой, табере со кыӵе лэсьтэмын! Кинэз гинэ отчы уг вуылы ни. Пӧртэм районъёсысь но вӧсяськыны лыкто, пиналъёссэс пылато, кузпалъёс венчаськыло. Чисто милям гуртмы пыр отчы мыно.

Гуртоос данъяськыса верало данэ потэм адямиоссы сярысь. Алевтина Айманова (Байбекова) сяна, татысь потэмын Александр Овчинников. Егит дыръяз со «Советской Удмуртия» газетын ужамын. Николай Быков Кечол школа-интернатэн кема аръёс ӵоже кивалтэм.

Любовь Тихонова

 

Удмурт Дунне
By Удмурт Дунне 6 июля, 2016 10:18