Тыл, шукы но… выем полыс

Удмурт Дунне
By Удмурт Дунне 20 июля, 2016 14:47
табнь

Куспазы вожвылъяськизы семьяос.

«Быг-быг» фестивальлэн 4-тӥ нуналыз ортчиз Шаркан черкогуртын Тол бабайлэн резиденцияз. Отын радъямын вал егит семьяос вискын «Табань FEST» ӵошатскон но инбам улын позыръяськон.

Тол бабай табанен чик герӟаськемын ӧвӧл ке но, «Быг-быг» фестивальлэсь солэн палэнэ кылемез ӧз поты. Муг но сюриз. 15-тӥ июль — гужемлэн но арлэн шорзы. Малы сое шулдыр но ческыт пумитантэм?!

Озьы 15-тӥ июле Тол бабайлэн коркаез котырысь ӵукнаысен ӝытозь калык ӧз бырылы. Нуназе берозь отын ужазы пӧртэм мастер-классъёс. Ужрадэз радъясьёс лыдэ басьтӥллям пичиосты но, бадӟымъёсты но. Кылсярысь, «Горд табаньын» соос нылпиосты гочатӥзы — табаньлы пӧртэм буёло ыльнянь дасязы. Кыкетӥяз мастер-классын кузёяськизы мемиос — «Анай пыже табань» нимаськиз со. Люкаськемъёс адӟизы, табанез кӧня пумо пыжыны луэ. «Ческыт табаньын» возьматӥзы туала пыжиськемез — йӧлвылэн, джемен, сгущёнкаен зыраса. Та сяна, Шарканысь киужъёсъя юртысь усточиос адӟытӥзы, кызьы вуроно мудрон пӧзь, пӧраськыку одӥг чиньы но медаз сутӥськы шуыса.

Воргоронъёс кышнооссэс пыжен ворттылытӥзы.

Резиденциын эшшо но шулдыр луиз ӝытпал. Кутскиз егит семьяос куспын   «Табань FEST» вожвылъяськон. Кинлэн пыжиськемез тужгес ческыт пӧрмоз?

— Конкурсэ пыриськыны мылкыд кариз вал шаерысьтымы 9 семья, — вера ӵошатсконэз нуисьёс пӧлысь огез Анна Пислегина. — Но вуиз 6-ез гинэ: Шарканысь сяна, Можга, Сьӧлта но Эгра ёросъёсысь.

Нырысь-валысь котькуд семья асэныз тодматӥз. Тани соос — турын дасянлэсь, бакча ужъёслэсь мозмытскыны быгатэмъёс. Ваньзы удмурт дӥсен. Сьӧразы вайиллям, капчи мылкыдзэс сяна, ас котэм шќмзэс но. Татын сое нылкышноос пызен пуж-пуж суралтӥзы. Суразы, кымессы вылэ вупульыос кылдытозь. Кызьы сотэк? Табанед макем буй-буй пӧрмоз, дунъясьёс сокем буй-буй баллъёс сётозы.

Ыльнянь ӝутӥськытозь, воргоронъёс кужымзэс мертазы. Тол бабайлэн коркаез дорын куаш! вазиз — пиосъёс, ог-огзэс сутыны турттыса кадь, пу пильылӥзы. Собере соосты тымет дуре ӧтизы. Ваньзы малпазы: пӧсям мугоръёссэc, дыр, гылтыны. Ӧвӧл вылэм… Кышнооссэс пыжен ворттылытыны. Зэм, соку ини воргоронъёс жалесь адскизы — пу пильылыса, коскаллям, лэся. Тужгес но сюлэм пыжиз Сьӧлта ёросысь Эшметьгуртысь Хлебов кузпалъёс понна. Тыметлэн шораз ик пичи шормуӵ сылэ. Отчыозь ог 50 метр. 5 семьяос со дорозь но берен ог 4 минут куспын полысазы ке, Хлебовъёслы 6 минут но ӧз окмы. Оло семья кузё кушетскиз, оло тымет ӧчкариз — полыссы вуэ зымиз…

Калык ӧз бырылы.

— Хлебовмылэсь йырзэ вуныл берыктыны малпа, луоз. Ойдолэ сое, юн-юн чабыса, улляломы! — люкаськемъёслы вазиське Анна Пислегина.

Кужмо кичабонъёс юрттӥзы, лэся — кузпалъёс ярдуре вуизы. Ярам, мукетаз ӵошатсконын Хлебовъёслы удалтӥз. Оло, та рад фамилизы юрттӥз — ыльняньзы макем ӝутӥськем, ява!

Тол бабайлэн корка котыраз, дыльды вияса, сылэм уг луы ини. Нюлэс зынэн полэстӥськыса, табань зын котырак вӧлскиз. Дунъясьёс 6 командалэсь пӧрамъёссэ веръязы. Нырысетӥ инты басьтӥзы Эгра ёросысь Кабачигуртысь кузпалъёс — Александр Шкляев но Светлана Лекомцева. Кыкетӥ луизы Сьӧлта ёросысь Эшметьгуртысь Михаил но Светлана Хлебовъёс. Куинетӥ интыез люкизы 2 семьяос: Шаркан ёросысь Евгений но Валентина Едыгаровъёс, Константин но Татьяна Воронцовъёс.

Йылпумъянъёсты верамзы бӧрсьы Светлана Лекомцева паймиз: ужрадэ  лыктыкумы, малпаны ик кышкамы, пе, вормон сярысь. Кышномурт ужа Кабачигуртысь нылпи садын воспитатель луыса. Александр тырше мувӧй поттӥсьёс дӥньын.

— Оло, вералоды, — юасько, — кызьы такем ческыт табань пӧрады?

Кышномурт капчияк серектӥз: ыльняням номыр мудронзэ ӧй поны — сюлэм шунытме гинэ ке шат…

Вормисьёсты ӟечкылазы егит удмурт артистъёс: Николай Анисимов, Алёна Тимерханова, Иван Котельников, «Эктоника» группа… Люкаськемъёсты абдратӥзы на лазер сиосын, шукы пӧлын эктонъёсын,   тылэн шудонъёсын!

— Инбам улын эктонъёсты Тол бабайлэн резиденциеныз ӵош 2-тӥзэ радъяськомы ини, — вераз «Эктоникаысь» егит усточи, ужрадъёсты нуись Пётр Пушкин. — Нырысьсэ ортчытэммы бере валамы: котырамы тросгес егитъёсты кысконо. Озьыен, позыръяськонъёсмес синъёсты палёмытӥсь кароно. Соин туэ кылдӥзы шукы но, лазер сиос но, тылъёс но.

Ольга Корепанова

Туспуктӥз Стас Иванов

Удмурт Дунне
By Удмурт Дунне 20 июля, 2016 14:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<