Тыбырыз уг висьы коӵышлэн гинэ

Удмурт Дунне
By Удмурт Дунне Июль 19, 2016 12:15
OLYMPUS DIGITAL CAMERA

Гужем гуртоослы секыт йӧтэ: пудо сиён дасяно, бакчаын копаськоно…

Калыкын веран вань: тыбырыз уг висьы коӵышлэн гинэ. Зэмзэ но, тыбырыз, кускыз висемлы ӝожтӥське туж тросэз. Но туж ӧжытэз соку ик вазиське эмъясьёс доры.  Малпа: ортчоз. Жаляса верано, котьку озьы уг луы — та сярысь кенешиськом Ижысь 7 номеро город больницаысь профилактикая ёзэн кивалтӥсен, вылӥ категориен эмъясен Ольга Бяковаен.

— Ольга Викторовна, куд-огезлэн висе но висе тыбырыз, эмъясь доры вазиськыны дыр озьы ик уг шедьты. Мар верасалды таӵеослы?

— Висён кык-куинь нунал куспын уг ортчы ке, одно вазиськоно специалистъёс дӥне. Угось солэн мугъёсыз туж пӧртэмесь луыны быгатозы.

Одӥг учыр, куке тӥ асьтэос но валаськоды, мугорды ужам бере жадемын шуыса. Гужем, кылсярысь, гуртоослы секыт йӧтэ: пудо сиён дасяно, бакчаын выроно. Соин ик соос, тыбырзы, куссы висе шуыса, ӝожтӥсько. Угось секыт ӝуткаку, мугорысь сӥльбыгытъёс огкадь уг ужало: одӥгъёсыз шутэтско,  нош мукетъёсыз золтӥсько, вань секытэз ас вылазы басьто. Соин ик соос висё — отчы люкаське молочной кислота, со сутэм кадь вӧсь каре.

Паймонэз ӧвӧл, ялан руль сьӧрын, компьютер сьӧрын пукисьёслэн но тыбырзы висе шуыса. Угось пукыку мугор возиське кӧня ке гинэ сӥльбыгытъёс вылын — соос озьы ик золтӥсько, вӧсь луыны кутско. Тӥни малы таӵеослы ӵемгес султылыны кулэ, пуконо ке — гань-гань, мур креслоын, тыбырез пыкъяны мед луоз.

Нырысетӥяз но, кыкетӥ-яз но учыре тыбыр висён шутэтскем бере ортчыны кулэ. Но таӵе учыръёсы соку ик выдон-пуксён инты утчано ӧвӧл, нырысь мугорез посоно, физкультура лэсьтоно. Нялтас вераса, нуналлы быдэ ӝыны часэн ке но физкультура лэсьтӥськод ке, сюлэм, сэръёс соку ик ӟечгес ужаны кутско, мылкыд капчи луэ, мултэс килограммъёс сылмо…

— Но тросэзлэн верамез потэ: кыӵе физкультура, сотэк но тэк ум пукиське — ялан пыд вылын, ялан маке ужаськом.

— Уж но физкультура — туж пӧртэмесь. Кызьы верам ни, ужаку золтӥсько одӥг пумоосыз гинэ сӥльбыгытъёс. Эшшо ке секыт ӝуткано, йыруллань улоно ке, ӵемысь ӝутӥське на вирзӥбет.

Нош физкультура лэсьтыку, мугор ганяк кариське, шутэтске.  Огкадь ужало вань сӥльбыгытъёс. Шуом, тӥ убоос вылэ ву кисьтады. Ведра кутыса, жадизы-золтӥськизы чиньыосысьтыды, тыбырысьтыды сӥльбыгытъёс, мукетъёсыз — ӧжытгес яке чик но ӧз. Соин ик, жадемды мед ортчоз шуыса, нырысь киосты выртоно, собере суйпоскесъёсты, суйёсты, чыртыез… Ваньзэ тае гань-гань, дыртытэк лэсьтоно, лыос шатыр карытозь, йыр поромытозь, выронэз ӧвӧл. Мӧйыослы уг дэмлало ни, кылсярысь, мугорез музозь някыръяны, йырез котыр бергатыны. Нылпиослы со урод ӧвӧл.

Эшшо тодоно: секыт ӝутыку, кусэз гинэ някыртоно ӧвӧл — сюрлыез вӧсь  карыны кема ӧвӧл, соин ик нырысь лаптӥськоно, пыдесъёсты куасалтыса.

— Куд-огез висёнзэ пыд вылаз ортчытэ, вӧсь луэмез зӥбломытӥсь  эмъюмъёс юыса.

— Висёнэз буйгатӥсь эмъюмъёслы сокем ик оскиськыны уг яра: йӧнатӥськем интые, уродгес карыны кема ӧвӧл. Соосты юоно, эсэпсэ туж валаса, троссэ — 5-7 нунал. Мултэс луиз ке, яд выллем ик, мугорез погыртозы. Нош асьмеос ваньмы йылпумъямын ӧвӧл медучилищеез но, медакадемиез но — кытысь тодом ай, мае, кӧня юоно. Собере, котькудӥз мугор — аспӧртэм. Одӥгезлы одӥг эмъюм тупа, мукетызлы — мукет.

Мазьёс — сыӵе ик эмъюмъёс. Соос но мугоре пыӵало, вире шедё, пото мус пыр, кылемез сюре на пекляосы но. Соин ик соосын озьы ик туж чакласькыса зыраськоно, уката но мус, пекля висёнъёс вань ке.

Тодоно на, кудӥз мазь шунтэ, кудӥз воспаленилы пумит луэ. Верам ни: тыбыр, кус пӧртэм мугъёсын сэрен висьыны быгатэ. Кылсярысь, ӝушын яра кылдэм дыръя. Шунтӥсь мазен зыраськид ке, со яра усьтӥськыны быгатоз. Тыбыр висьыку, озьы ик уг яра веникен кокаськыны, уката ик уд тодӥське ке, малы со кужекъя.

Мугор — туж тунсыко маке. Кудӥз ке ёзви лябгес ужа, нош шӧдӥське со чылкак мукет интыын. Шуиськом ук, паллян чиньы висе ке, одно эскероно сюлэмез. Кус, тыбыр висьыны озьы ик быгато сюлъёс, пекляос, ӝуш но мукет ёзвиос лябӟем дыръя. Остеохондроз кырмиське ке, озьы ик тыбыр, кус вӧсь луэ. Таиз висён герӟаськемын веществоослэн воштӥськонзы сураськемен. Арлыд люкаськемъя, со ваньмызлэн сямен шӧдӥське ни. Кус висьыны быгатоз, сюрлыын воштӥськонъёс вань ке но мукет.

— Озьыен, тыбыр, кус висён кык-куинь нунал ӵоже зарядка но лэсьтыса уг ортчы ке, вазиськоно больницае. Нош кыӵе специалист доры?

— Умойгес луоз терапевтлы ик возьматӥськыса. Со мед чаклалоз, кыӵе муген меда тӥ шуге-леке вуэмын. Собере ини келялоз невролог, хирург яке мукетыз сюбег специалист доры.

 

Кызьы утиськоно кырыжтӥськонлэсь?

— Ужын трос пуконо луиськоды ке, ӵемгес султылэ,  мугордэс посэ;

— кема сылоно луэ ке, борддор борды пыкъяське;

— секыт ӝутыкуды, кык ки вылады ик огкадь мед луоз со, сумка интые котомка умойгес луоз;

— выж вылысь секыт арбериез ӝутыкуды, пыдъёстэс куасалтэ;

— вамышъякуды тыбырдэс шонер возьыны тырше;

— ӝужыт миндэр вылын эн кӧлалэ.

 

Элина Кумачёва

Туспуктӥз А. Горбунов

Удмурт Дунне
By Удмурт Дунне Июль 19, 2016 12:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<