Тӧр шорын: Чалмыт дуннеез сайкатӥсь Светлана Беспятых

Удмурт Дунне
By Удмурт Дунне Июль 18, 2016 10:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
С. Беспятых.

С. Беспятых.

Светлана Беспятых ужа Ижысь механикая заводысь сурдопереводъя валтӥсь инструктор луыса.  Пусъемын ВЛКСМ-лэн ЦК-езлэн, Удмурт Правительстволэн, Кун Кенешлэн, Удмурт Элькунлэн Данъян грамотаосынызы.

Мурт улонэн улон

Туэ май толэзе Светлана Беспятых арлыдызъя пенсие потӥз, но шутэтскон сярысь малпанэз но ӧвӧл. Уз но лэзе. Кема аръёс ӵоже кылӥсьтэмъёсын ужаса, со чалмыт дуннее югыт пыртӥсь тылси выллем луиз. Ужан нуналэз быриз-а, ӧз-а, юрттэтлы кулэяськисьёс уй но, нунал но солы вазисько.

— Уйин кӧлон куспын телефонам СМС вуэ, кинлы ке секыт луэм,  ӝог юрттэт сётӥсь машинаез, пе, келяно доразы. Умме усьыса вуисько гинэ, нош ик СМС вуэ: «Тау, «скорой» вуылӥз!» Тӥни озьы но луылэ, — серекъя Светлана Борисовна.

Куд-огез паймыса юало, кызьы, пе, тае семьяяд чидало. Чидало, шуэ. Чидам гинэ ӧвӧл, юртто но. Кузпалыз Евгений Михайлов, «Удмуртия» телерадиокомпаниын удмурт передачаосты дасян бордын ужам журналист, серекъя, тон, пе, 80 арескад но  ужедлэсь уд мозмы. Кылӥсьтэмъёс Евгений Николаевичез но асьсэ адямиен лыдъяло. Мар ке нуоно, ваёно, кыӵе ке мукет юрттэт кулэ — со ноку пумит уз луы. Вырос кылэз но кӧня ке дышетӥз ни. Пӧлазы весь бергамысьтыз кылӥсьтэмъёс куддыр соин ас сяменызы вераськыны кутско, вунэто, воргорон соосты уг вала шуыса.  Удмурт кун университетысь Педагогикая, психологияя но социальной технологиосъя институтын дефектологе дышетскись Настя нылзы но бордысьтызы уг кыльылы, пӧртэм ужрадъёсы пыриськылэ. Кылем арын со сурдопереводъя курсъёсты йылпумъяз.

Нылыныз, кузпалэныз но ӵыжы-выжыосыныз.

Нылыныз, кузпалэныз но ӵыжы-выжыосыныз.

Светлана Беспятыхлы кылӥсьтэмъёс вазисько школаын дышетскись нылпиоссылы юрттон понна но. Светлана Борисовналэн быдэс семьяез я сочинение гожтыны, я задача лэсьтыны юрттэ, эшшо мукет мар ке кулэ. Ярам, туала вакытэ мобильной телефонъёс но Интернет вань.

Механикая заводысь пӧртэм цехъёсын та вакытэ 120 кылӥсьтэмъёс ужало, юрттэтлы кулэясько на 70 ветеранъёс. Светлана Борисовна соослэн улонэнызы улэ. Вань секретъёссэс мадё, шуэ. Анай-атайёс но нылпиос куспын валамтэос кылдо ке,  соосыз но, таосыз но сюлэмъёссэс сурдопереводчиклы усьто.

Шыпыт яратон

Светланалэн анай-атаез кыксы но куинь-ньыль аресказы, менингитэн висьыса, пельтэм кылизы. Алнаш ёросысь Кузьыли гуртын вордӥськем удмурт нылаш Анисия Рекалова дышетскиз кылӥсьтэмъёслэн Ижысь школа-интернатазы. Война кутскем бере 10 аресъем нылаш, малэсь ке кышкаса, нырысетӥ шедем поездэ пуксьыса, олокытчы кошкиз. Елабугаысен сое кырмизы, кема юалляськыны выризы, нылаш картая гинэ возьматыны быгатӥз кытысь луэмзэ. Озьы Аняез гуртаз келязы. Кӧттыро луод шуыса, анаез кӧня сюлвориз нылзэ выльысь Иже мыныны,  нылаш чутрак пумит луиз. Колхозын ужаз, вылаз нюлэскысь пу ворттӥз. Анисия Егоровналэн 1941-тӥ-1947-тӥ аръёсы гурт удысын ужамез пусъемын медален. Война бере дышетскыны умой-умой ӧз кылды ни арлыдыз бадӟымен, вань улытозяз «Ижмашын» тыршиз. Азьмынӥсь комсомолка спортэн эшъяськиз, эктӥз, выросъёс пыр спектакльёс возьматонэ пыриськылӥз.

Светланалэн атаез Борис Платонович но «Ижмашын» ужаз. Школа-интернатын дышетскыкузы, вуоно кузпалъёс ог-огзэс ӧз ик синйылтэ, ма, соку соос пичиесь но вал. Нош заводын ужакузы, Борис Якимов чырмыт сямо Анялы синмаськиз, весь сьӧраз ветлӥз. Ачиз но со азьмынӥсьёс радын вал, спортэн эшъяськиз. Тужгес но бордаз кыскиз футбол, заводысь командаенызы ӵош пыриськылӥз республикаямы но Россиын ортчылӥсь ӵошатсконъёсы.

Борислы синмаськисьёс трос вал, нош Аня ӧз ик адӟылы кадь сое, анаез шуиз уго, городысь ӟуч пиос шоры эн учкылы, гуртысь удмурт пиен улондэ герӟа. Борислэн анаез картаен тунаське вал (война вакытэ со доры туж трос калык ветлэм). Одӥг пол но, кык пол но тунам пиезлы, картаос Аня шоры возьмато, сое ик кышно вай, пе. Борислэсь пегӟыса, Анисия Челябинске кошкыны малпа ни вал, но пияш амал шедьтӥз сое бордаз думыны — паспортсэ ватӥз. Озьы нылаш ӟуч пилы бызиз.

2008-тӥ арын Якимов кузпалъёс зарни сюанзэс пусйизы, со аре ик венчаться кариськизы.

—  Кылӥсьтэмъёслэн пиналъёссы асьсэ понна будо, соос котырын анай-атайёссы уг бергало, — шуэ Светлана Беспятых. — Мон но тани нылы пумысен отчы но татчы мынӥсько, юалляськисько. Асэным ӵошатыса, со теплицаын сямен будэ. Нош мон ачим анай-атаелы юрттоно луылӥ, монтэк соослэн улонзы трослы секыт йӧтысал. Али Настямы песянай-песятаезлы юрттӥське ни.

Комсомолка.

Комсомолка.

Тодод — мукетызлы юрттод

Улон сюресэз понна Светлана Борисовна котьку тау каре мумиз-бубизлы. Нош будон вакытэз солэн капчи ӧй вал. Кылӥсьтэм семьяын нылпиоссы вань ке, али соослы висъяське «ӝуатскись няня» — пинал бӧрдыку, со югдыны ӧдъя. Озьы ик мукет техника сёто — телефон, телевизор, вибрациен будильник, ӧс усьтӥськемез возьматӥсь сигнализатор, араз 40 час сурдопереводчик юрттӥськыны кулэ. Светланалэн  анай-атаезлэн номыр со ӧй вал.

— Математикаен задачаме куддыр лэсьтэме уг луы но бӧрдӥсько, — тодаз вае со. — Нокинлэсь юаны, огшоры телефонъёсын но со вакытэ секыт вал. Папае артэ пуке но монэн ӵош бӧрдэ. Ӧз, пе, удалты тыныд анай-атаен, кыкнамы ик пельтэмесь, юрттыны ум быгатӥське.

Школае собраниосы но нокинлы ветлыны вал. Анаезлэн сузэрез кык-куинь пол пукиз ик классысьтызы пиналъёслэн анай-атайёссы пӧлын, отӥяз дыр ӧз шедьты ни. Мар ке ивортоно ке, классэн кивалтӥсьсы Света сьӧры запискаос ысъяз. 7-тӥ классын дышетскыкуз, солы аслыз оскизы ни собраниосын пукыны — дышетскиз нылаш умой, сямын но ӟеч. Верамзэс гожтэ но  анай-атаезлы сётэ. Ӵуказеяз эшъёсыз юасько ни, кинэ тышкаськизы, мар сярысь вераськизы. Классысьтызы одӥгез пияш туж лякыттэм вылэм. Артэ уло шуыса, дышетӥсьёс анай-атаезлы запискаос Света пыр сётъязы. Гожтэмзэс доразы медаз вутты шуыса, пияш 3 манет но ӵектылӥз ныллы,  киное но ӧтьылӥз. Но Света дышетӥсьёслэсь кылзӥськоно кожалляз. Берло со пияш  Совето Союзлэн конькиен бызьылонъя сборнояз шедем.

Якимов кузпалъёс сюлмаськизы нылзылы пӧртэм быгатонлыкъёс пыӵатыны. Асьсэос но спортэн эшъясько вал бере, Света но бере ӧз кыльы. «Зенит» стадионэ капчи атлетикая но конькиен бызьылонъя секциосы ветлӥз. Туж потэ вал шудэмез пианиноен. Анай-атаез уг кыло бере, 10 аресъем нылзылэсь крезьгурез валамзэ эскерон понна филармоние нуллӥзы. Отын ужаз анаезлэн двоюродной братэзлэн, удмурт писательлэн, критиклэн Анатолий Уваровлэн, нырысетӥ кузпалыз. Кылзэмез бере тётя Фираез шуиз, нылдылэн слухез вань, басьтэлэ пианино. Озьы Света сюрес лёгиз крезьгуръя школае. Нош гужемзэ кыӵе гинэ улосъёсын но городъёсын тодматскыны ӧз вуылэ Якимов кузпалъёс нылынызы, зарезь дурын шутэтскылӥзы. Ваньмыз со сюлме но визьме кылемын.

Пионер

Пионер

10-тӥ классэз йылпумъяса, Светлана интыяськиз Ижысь 48                                                номеро  лэсьтӥськон трестысь комсомоллэн комитетаз. Нош анаезлэн туж потэ вал нылызлы вылӥ образование сётэмез. Медаз куареты шуыса, нылмурт Удмурт кун университетысь историяя факультетэ документъёссэ сётӥз, нош ачиз, дышетскемез потымтэен, нырысетӥ экзамензэ ик куашкатӥз. Но Анисия Егоровнаез озьы гинэ уд пӧя вылэм. Китӥз кутыса, нылзэ университетэ валтӥз, заочно амалэн, пе, дышетскод. Вань экзаменъёсы сьӧраз ветлэм. Нырысетӥяз экзаменын тунгон пасетӥ учкыса улэм, нылыз пегӟыны уг малпа шуыса адӟемез бере гинэ дораз бертэм. Озьы ужан сяменыз Светлана йылпумъяз университетэз. Берло ачиз ик туж шумпотӥз вылӥ образование басьтэмезлы. Кылӥсьтэмъёслы котыр ласянь юрттэт сётон понна трос тодэм кулэ, шуэ. Али но со тодон-валанзэ будэтыны тырше — трос лыдӟиське, Интернетын бугыръяське, законъёсын тодматске.

— Адямилэн улонэз тон бордысь потэ бере, сотэк уг луы, — шуэ сурдопереводчик.  — Берло дыре  законъёс туж ӵем вошъясько. Кулэезъя юрттэт сётон понна социальной ужасьёс соосты тодыны кулэ. Калыклы юрттэт сётонъя центръёсын нимаз курсъёс мед радъясалзы вылэм инвалидъёсын ужасьёслы, тросэз куронъёс соос доры ми пыр вуо уго. Нош пӧртэм компенсациос соослы ӵем дыръя сётӥсько, асьсэос вазиськыку гинэ. Адями со сярысь уг тоды ке? Ярам, али кылӥсьтэмъёс ог-огенызы кусып возьыны быгато Интернет пыр. Озьы алигес тодӥмы, атайзы Быдӟым ожын быремын яке сӧсырмыса бертэмез бере кулэмын ке, пиналысен инвалидъёслы 2012-тӥ арысен толэзьлы быдэ ватсаса коньдонэн юрттэт луыны кулэ.

Шуге-леке сюремъёслы тросгес юрттэт сётон понна ик кылем арын коммунистъёслэн радазы пыриз.

Вырос кыл — начар

Комсомол дуннее выйыса, Светлана Беспятых ӧз ик малпалля, кылӥсьтэмъёсын ужалоз шуыса.  Вераськон кылзэс валамысь сое  кема кураны выризы инвалидъёсын ужаны. Собере соглаш луиз механикая заводлэн «Парусник» общежитияз воспитательын ужаны — отын одӥгаз этажын кылӥсьтэмъёс улӥзы. 5 ар ортчыса, выжтӥзы заводысь кадръёсъя отделэ берыктӥсе. 30 арлэсь ятыр Светлана Борисовна кылӥсьтэмъёслы юрттэ. Та дыр куспын йылпумъяз Москваысь но Санкт-Петербургысь сурдопереводчикъёсты дасясь курсъёсты. Ог-огзылэсь туж висъясько, пе, выросэн вераськон амалъёсынызы. Кылын вераськонын сямен ик, улосъёслэн асьсэлэн диалектъёссы вань. Но выросэн вераськон Совето Союзысь  азьвыл кунъёс понна ваньзылэн одӥг кадь.

Кылӥсьтэмъёслэн куремзыя но Удмурт Правительство юрттэмъя 1994-тӥ арысен Удмурт телевидениын иворъёс сурдопереводэн мынылӥзы. Берло «Дежурный репортёр» передача но берыктыса потылӥз. Учкисьёс доры шаерысьтымы иворъёсты  вуттылӥз Светлана Беспятых. Юрттэтлы вазиськыса, инвалидъёс телевидениын ужась огшоры берыктӥсьлы гожъяны кутскизы.

Иворъёсты сяна, сурдопереводчиклы берыкъяно луэ пӧртэм лекциосты но.  Соку ини, вырос кыллэн луонлыкъёсыз пичиесь шуыса, туж шӧдӥське. Малпаськыны дыр ӧвӧл, кылзӥсь доры вуттыны кулэ верамлэсь пуштроссэ. Талы но нимысьтыз быгатэм кулэ.

— Вырос кыл туж начар, отын трос огшоры валатонъёсыз, — шуэ Беспятых. — «Чебер» кыллы ик пӧртэм валатон сётыны луэ, нош пельтэмъёслы сое ваньзэ одӥг выросэн возьматӥськод. Соин ик художественной литератураез соослы секыт валаны. Чеберлыко дуннезэс узырмытон понна кылӥсьтэмъёслэн школаязы дышетскисьёсты тросгес эшъяськытоно книгаен. Пиналъёс туж ӧжыт лыдӟисько, со бордысь ик потэ янгышен гожъяськон но. Ярам, берло дыре сотовой телефонъёс кылдӥзы, кылӥсьтэмъёслы со нырысетӥ юрттӥсь луиз, грамотазы но таин валче будэ. СМС гожтыкузы, янгышъёссылэсь возьдасько.

 

вв

«Удмуртия» ГТРК-ын.

С. Беспятыхлэн ужан опытэз бадӟым. Комсомол но дышетӥз калыкен огъя кыл шедьтыны. Воспитательын ужакуз, егит пиос но нылъёс пӧлын пӧртэм конкурсъёс, спорт ӵошатсконъёс ортчытъяз, экскурсиосы ветлӥзы. Заводэ выжыса но, адямиосты задор мылкыдыныз пӧртэм ужрадъёсы ӝутка. Кылӥсьтэмъёсын ӵош ачиз но выросэн кырӟанъёс быдэсъя.  2011-тӥ арын, шаерысьтымы кылӥсьтэмъёслэн огазеяськонзылы 75 ар тырмонэз Удмурт театрын пусйыку, симфонической оркестр шудэм улсын Надежда Уткинаен ӵош «Ой, сюлмы, сюлэмы» кырӟанэз быдэстэмзы вань люкаськемъёслэсь мылкыдзэс бугыртӥз. Вераськисьтэм но кылӥсьтэм анаез вӧзын будыса, Светлана Борисовна удмуртэз тодытэк кылиз.  Шуэ, пельтэмъёслэн семьяязы нунылы анай йӧлын пыӵа выросэн вераськон, со вордскем кыл выллем ик.

Ӟеч кылэз пуны но вала

Светлана Беспятыхлэн семьяяз пунызы гинэ но вань курон-косонъёсты вала. Визьмо синъёсыныз шоре учкыса, тани-тани мар ке вералоз кадь. Евгений Николаевич серекъяса шуэ, выжыез пумысен юало ке, пе, аргентинской овчарка шуисько. Соосыз паймыса учко пичи мугоро пуны шоры.

— Настя пичи дыръяз весь куре вал пуны, — маде нылкышно. — Шуисько, асьмеос пуныез дунын ум басьтэ, шуге-леке усемзэ утём. Газетысь ялонэз адӟи. Кучапиез ӟеч киосы сётом, пе. Папамылы вератэк, нылыным кулэ адресъя мынӥм. Муминызы ӵош милемды куать кучапиос пумитазы, собере самой пичиез палэнтӥськиз. Настя шуэ, ойдо созэ асьмелы каром, учкемез туж визьмо.

Озьы тӥни 10 ар ӵоже Вица нимо пуны доразы кузёяське ини. Ваньзы сое нуныез сямен ярато. Нош Светлана Борисовна понна та куинетӥез Вица нимо пуны. Нырысетӥзэ вайизы Москваысь. Светалы соку 10 арес вал. «Детский мир» магазин дорын вузаськись песянайлэсь басьтӥзы. Анаез алыны выре, ойдо, пе, мунё басьтом. Нош нылаш синмаськиз выжытэм тӧдьы кучапилы. Пунызы 13 ар шумпоттӥз кузёоссэ. Кыкетӥзэ ӵыжы-выжыоссы сётӥзы, таиз 10 ар улӥз. Шуг-секытэн артэ вамышъяськод ке, сюлме пыӵа ньыль пыдо эшъёсты яратон мылкыд но.

Гочатӥсь куара

Пичи Пурга ёросысь Баграш-Бигра гуртысь потэм журналистэн Евгений Михайловен Светлана Беспятых тодматскиз, телевидениын сурдоперевод лэсьтыкуз. Михайлов соку кыкетӥ кышноеныз люкиськемын вал. Киосыныз туж быгатыса вераськись егит нылкышно воргоронлэсь йырзэ берыктӥз. Кема гожеръяз, пе, котырам, серекъя Светлана Борисовна. Нылкышноосты синмаськытыны быгатӥсь воргорон  Светланаез картэз дорысь нуыны пӧрмытӥз ик.

Светлана Беспятыхлы 33 арес вал ни. 13 ар кузпалэн улыса, пиналзы ӧз вордӥськы. Картэз огвакытэ дась ни вал нылпи юртысь пиналэз басьтыны, собере нош пумит луиз. Соин но нылкышноез семьяез сокем ӧз возьы ни. Евгений Михайловен ӵош кариськемзы бере нылзы вордӥськиз. Нош кузпалъяськизы 13 ар ӵош улэмзы бере гинэ, 2011-тӥ арын. Светланалэн ӵыжы-выжыосыз пыкылэм каризы, весь-а, пе, сьӧлыкын улоды. Беспятых шуэ, анай-атаймы сямен ик, оло, венчаться но кариськом ай.

Светлана но Евгений ог-огзэс туж дунъяло. Ужзэс уг люко, соиз тынад, таиз мынам шуыса. Светлана Борисовналэн анай-атаезлэсь выжем сад-бакчаязы но тросгес тырше Евгений Николаевич: мерттӥськоз, бакча сиён будэтоз-утялтоз, емыш бичалоз. Кышноезлы уриськон но корка котырез утялтон кыле на. Ма, ужезлэсь ваньмон дырыз но трос уг луылы уго. Беромыса вуэ ке, картэз сое ческыт пӧрамен пумита ни. Берло дыре воргорон сылалтэмъёс но ачиз лэсьтэ. Мынамлэсь ческытгес пӧрме, шуэ нылкышно.

Егит дыръяз Светлана Борисовна яратэ вал фотографиен вырыны, 20 арес тырмонэзлы анай-атаез «Зенит» фотоаппарат кузьмазы. Табере нылзы соин туспуктэмъёс лэсьтэ. Суредаськыны но Настязы туж яратэ, квартираязы но, сад-бакчаязы но ужъёсыз ошылэмын. Йылпумъяз Ижысь 9 номеро художественной школаез. Нылыз шоры учкыса, анайлэн но мылкыдыз выльысь бугыртӥське. Трос аръёс ӵоже сюлэмаз каръяськыса улэ ини пианиноен шудон мылкыдыз. Шуэ, куке но одно ик басьто пианино. Чалмыт вераськем бере кылзэм потэ, пе, крезьгур куараез.

Удмурт Дунне
By Удмурт Дунне Июль 18, 2016 10:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<