Сямез воштоно!

Удмурт Дунне
By Удмурт Дунне Июль 15, 2016 08:35
кенеш

Удмуртъёс кивалтон удысын ӧвӧл шуыса, нокинэ янгыш кароно ӧвӧл, асьмемыз сяна. Сямез воштоно.

Кивалтон ёзъёсын удмуртъёс шер-тур адӟисько. Биньгозыез валтыны асьмеос ум быгатӥське яке уг сёто?

 Синэз кынён

Улон-вылонэз азинтон понна одно ик будэтоно кивоштӥсьёсты. Тае ас вакытаз умой валало вал 1917-тӥ арын асьсэ киязы властез кырмем большевикъёс.

— Вакчи дыр куспын выль кадръёсты но специалистъёсты дасян понна большевикъёс вылысьтыз вылаз усьяны кутскизы университетъёс, академиос, училищеос, — вера Историяя, кылъя но литературая Удмурт институтлэн директорез, история наукаосъя доктор Алексей Загребин. — Озьы югдытӥсьмы Трокай Борисов 1920-тӥ арын Вотской автономной областез кылдытон азьын Елабугаын усьтӥз дышетӥсьёсты дасянъя удмурт курсъёс. Автономиез кылдытон понна туала улонлы дасесь, грамотаез валась специалистъёс кулэ луозы шуыса, курсъёсты выжтӥз Можгала. Совето вакытэ пӧртэм удысысь специлистъёсты дасянлы бадӟым саклык висъяськылӥз. Экономикаез ӝутон, улон-вылонэз азинтон понна кун луонлык сётэ вал гуртысь адямиослы образование басьтыны. Национальной кадръёс асьсэ улосвылзэс азинтон вылысь доразы бертылӥзы. Туннэ ЕГЭ-ын трос балл люканы быгатӥськод ке, котькыӵе дано вузэ сюрес усьтэмын. Но со дыре ик егитъёслэн гуртазы берытскемзы уг поты. Соин ик таосты вордскем палъёсазы юнматон понна амалъёс утчано.

— Шаерамы 302 муниципал кылдытэт. Рос-прос специалистъёслэн тырмымтэзы зол шӧдӥське, — шуэ Кун Кенешысь Кунэз радъянъя но интыысь аскивалтонъя ялан ужась комиссиен кивалтӥсь Наталья Кузнецова. — Куд-огез воксё уг малпасько, мар бордын ужано, кызьы улон-вылонэз умоятоно. Гуртъёсын кыӵе ке сюлмаськытӥсь ужпум кылдыку но, синзэс кынё. Гурт поселениосын 40 процентэз специалистъёс отчёт гожъяса гинэ пуко.

Н. Кузнецова верамъя, огпол но эскеремын ӧвӧл, гурт поселениосын кивалтӥсьёс пӧлысь кӧняез удмуртъёс. Но сӥзьыл быръёнъёс бере лыдъян ортчытозы. Со понна «Удмурт Кенеш» огазеяськон удмуртъёслэн ӧтчамзы азьын ёросъёсын юалляськон ортчытӥз. Соку шараяськиз: удмурт кивалтӥсьёс Балезино, Вотка, Глазов, Грак, Дэри, Сюмси, Ува но Шаркан палан ӧжыт, татын удмурт гуртъёс трос ке но. 16 ёрос йыр ассэ удмурт шуиз. Ёрос Кенешъёсысь депутатъёс пӧлын удмуртъёс тужгес трос Алнашын — 94,4 процентэз, Пичи Пургалан — 80, Дэбесын — 83, Сьӧлталан — 70 процентэз. Сарапулын но Камбаркаын одӥг но ӧвӧл. Ёросъёсысь управлениосын но отделъёсын кивалтӥсьёс пӧлын Алнашын но Кезын 100 процентэз удмуртъёс, Пичи Пургалан но Можгалан — 77 но 67 процентэз. Сарапулын, Вавожын, Гракын, Камбаркаын, Каракулиноын удмуртъёс ӧвӧл. 247 хозяйствоен 142 удмурт кивалтэ.

 Пыд пуктон

Ёросэн кивалтӥсьмы удмурт луысал ке, кин тодэ, оло, удмурт школаосты утись луысал, шуо яръёс. Кылем арын татысь Озёрка но Никольск лад-лад удмурт гуртъёсысь школаосты пытсазы. Та тросэзлэн сюлэмаз йӧтӥз. Ёрос йыр Тамара Уткина верамъя, берло аръёсы районын кулӥсьёслэн лыдзы вордӥськемъёслэсь уногес вал, али гинэ ичигес. Озьы ке но 2020-тӥ арын эшшо огзэ школазэс пытсаны чаклало.

— Школаосты ворсамен ӟуч школаосы выжыса, нылпиос соку ик куштӥськизы удмурт кылэз дышетонлэсь, — вера ёросысь «Удмурт Кенеш» огазеяськонэн кивалтӥсь Валентина Дементьева. — Ёросын сотэк но удмурт кылэз мырдэм возиськомы. Туннэ Вортчалан но Бадӟымгуртын гинэ удмурт кылэз предмет чотын дышето. Азьланяз Вортча но уз пытсаськы меда — калык кулэсме.  Хозяйствоос куашкало, деревняос быро. Кӧня куримы: Озёркае лэсьтэ выж, выж луиз ке, адямиос уз пазьгиське. Кылӥсь ӧй вал. Коть ӟуч, коть бигер, коть удмурт лу, кивалтӥсь вордскем шаерзэ яратыны кулэ. Соку культура но, кыл но азинтӥськозы, гурт но пушъёз.

Зэм, куд-ог ёросъёсын кивалтӥсьсы удмурт ке но ӧвӧл, удмуртлыклы бадӟым саклык висъяське. Кылсярысь, Балезино ёрослэн йырыз Ришат Мухгалимов косэмъя вань школаосын но садъёсын удмурт кыллы дышето. Нош куд-ог дыръя удмурт кадръёс гинэ удмуртлыкез возё. Кылсярысь, Можга педколледжын удмурт кыллы специалистъёсты дасяло, ӵапак директорез Николай Пискунов сюлмаськемен гинэ на, мукет училищеосын лекциос ик ӧвӧл ни.

— Мон Верховной Советлэн Тӧроез дыръя 200 депутат пӧлысь 42-ез удмурт вал. Али 90 депутат пӧлысь 11-ез удмурт, — шуэ дано удмурт воргорон Валентин Тубылов. —  Ноку ужпум пуктэмын ӧй вал: тамында удмурт, тамында бигер луыны кулэ. Но удмурт кадръёсты ӝутыны туж секыт вал. Соку министръёсты  Верховной Совет юнматъяз. Уг вунэты ни: калыкез дышетонъя но наукая министр утчаськомы.  4-5 удмурт кандидат шедьтӥмы, нош депутатъёс пыд пукто. Асьме выжы калыкмылы удмуртъёс тодмо, но мукет выжы калыкъёс соос сярысь, ужамзы сярысь уг тодо. Ушъяськыны асьмеос ум яратћське уго. Депутатъёс пӧлысь удмуртъёс но востэм пукизы. Нош ёросэз азинтӥсь тодмо удмуртъёс асьсэос пумит кариськылӥзы министр луыны. Кылсярысь, ӵектӥськомы вал Алнаш ёрос администрациен кивалтӥсьлэсь воштӥсьсэ Нина Образцоваез — ӧз мыны. Озьы быдэс ар министртэк улӥмы, но удмуртсэ ӧм шедьтэ.

Удмуртъёс кивалтон удысын ӧвӧл шуыса, нокинэ янгыш кароно ӧвӧл, асьмемыз сяна. Сямез воштоно. Быгатэмез возьматыны дышетсконо. Туала вакытэ востэм ӧвӧл луоно ни. Туннэ шумпоттэ соиз: огвакытэ ёрос кивалтӥсьёс пӧлысь 2-3-ез сяна удмурт ӧй вал ни, али — ӝыныезлэсь трос, — шуэ В. Тубылов.

Елена Сараматова

 

Удмурт Дунне
By Удмурт Дунне Июль 15, 2016 08:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<