Шур вамен выж быремен, Яр ёросысь Меметгуртын улон дугдӥз

Удмурт Дунне
By Удмурт Дунне 13 июля, 2016 11:30
природа

Яр палъёс.

Дуннелэсь люкемъёс 

Мар со дуннелэсь люкиськыса улон, адӟим, Яр ёросысь Меметгурт пала вуыса. Сюрес куашкамен но шур вамен выж ӧвӧлэн тылпу кысӥсьёслэн гинэ но татчы пыремзы уг луы. Таин сэрен одӥг аре 4 юртъер пень луытозь сутскиз.

 Кионъёсын артэ

Меметгуртын ваньмыз-ӧвӧлэз 22 корка сылэ. Но таос пӧлысь 10 юртъерын сяна улӥсез ӧвӧл ни — уноез калыклы матэгес улыны выжизы. Кылемъёсызлы — 27 адямилы — кошкыны нокытчы. Собере, тросэз пересьмон гумыразы вуэмын ни. 2 семья гинэ  егит. Таослэн ик 4 пиналъёссы ог 4 иськемлы палэнэ интыяськем гурт поселенилэн центраз — Вортчала — школае ветло. Соос Лекма шур вамен потало тӥяськем выж вылтӥ. Шур дорозь сюрес огпалтӥз но тракторен донгымтэ. Велосипедэн гинэ но ортчыны кышкыт — пинал выйымон мур колеяос. Выж котырысь ярдуръёсты гуртоос асьсэ кужымен, дорысьтызы кирпич нуллыса, юнматӥзы вал. Но со куашкамын ни. Нош выж вылэ султыны ик уд дӥсьты — трос гинэ кутэ на коръёсты,  тани-тани ваньмыз ву кузя кошкоз кадь.

шур

Ольга Ившина: 21 ар улӥсько ни Меметын. Каль юн но юн жалясько татчы быземе пумысен

— 21 ар улӥсько ни Меметын. Каль юн но юн жалясько татчы быземе пумысен, — шуэ удмурт нылкышно Ольга Ившина. —  Совхозмы юн дыръя выжез возись вал ай. Хозяйство быриз но, выж, меметъёслы сяна, кулэ ӧйлась ни. Ог 15 арзэ ма карыны вочак паймиськомы. Ми сутскыны но шедим. Соку, нылпиосты кутыса, Вортчала ке но кошконо вал. Мужике шуиз: татын вордӥськи бере, Меметэ ик корка ӝутом. Арболитлэсь пуктӥм, вочак уломы кожамы, лэся. Выжен сэрен шугъяськонэз уд адӟы — ачим тупато, оскытӥз мужике. Техникамы вань уго. Гуртоос но дэмен юрттӥськизы коръёслэсь выж ӝутыны. Выж нырысь ӟеч вал. Со вылтӥ техникаен но валлё потаны луылӥз. Бератаз лябыт кылиз. Секытлэсь шальтраз но, ву но сисьтӥз. Асьме кужымен гинэ сое лэсьтыны ум быгатӥське ни. Ярам, уяны быгатӥськом, нош пиналъёс усизы ке? Соосты школае келясь-пумитась ӧвӧл. Гурт поселениен кивалтӥсьмы доры вуӵыртыны ӵем пырасько. Но Зинира Вершинина, коньдон ӧвӧл, шуэ. Кинлэн каль коньдонэз вань? Районлэн со выжез, мед лэсьтозы, шуэмзы потэ.

Сюресэз толалтэ но рос-прос сузясь уг шедьы. Озьы меметъёс, кускозязы лымы коласа, уже но школае ветло. Тём пеймыт ӵашшаетӥ ветлӥськомы, шуо, нош отын кионъёс, гондыръёс уло. Меметгуртэз ассэ но быдэсак нюлэс ньылэ ни. Артысь бусыоссэ уго утялтӥсь ӧвӧл. Азьвыл тапалан улӥсьёслы лесничество эстӥськон но пуктӥськон вылысь сик висъя вал. Котырысь ӵашша частник кие выжемен, кыкетӥ арзэ ни гуртоос отысь но татысь кылем-мылем пу утчало.

инкуазь

Нош выж вылэ султыны ик уд дӥсьты — трос гинэ кутэ на коръёсты, тани-тани ваньмыз ву кузя кошкоз кадь.

 Шур вамен — ваннаен

— «Пожарка» гинэ но дорамы пырыны уг быгаты! — вераськонамы итӥське мукетыз нылкышно. — Тылпу кысӥсьёс шур дуре ик кылизы, 4 корка ӝуаз! Котыр ӵашшаетӥ мед мыноз вылэм — 7 иськем гинэ. Но вуэн тыро «пожарка» отӥ мыны уг быгаты. «Скорой» но ӵашшаетӥ уг пыры. Ёрос центрысь эмъясьёсты ӧтиськомы, но машинаенызы выж дорозь но васькемзы уг луы. Гурезь йылын сыло. Висисьёсмес толалтэ «скорой» дорозь ваннаен вайиськом, гужем, шобретэ биняса, ки выламы ӝутыса, поттӥськомы.

— Йӧл басьтӥсь машина гинэ но гурезь йылэ дугдэ, — синвуаське Ольга Ившина. — Пельпумъёсмы вылын ведраосын йӧлмес поттӥськом. Нош ми йӧл коньдон вылын улӥськомы ук. Толэзяз 2 искал 12 сюрс манет тыр сюдэ. Уждунэ 6 сюрс манет, школаын завхозын ужаса. Мукет уж гуртын ӧвӧл.

Йӧлзэс поттыны немаин шуыса, уноез гуртоос скалзэс но вандӥзы ни. Али Меметын 4 скал сяна ӧвӧл. Автолавка но доразы уг ветлы. Егитъёсызгес арлыдо калыклы асьсэ пельпумъёссы вылын сиён-юон вутто. Меметгурт палан мукет нокыӵе гурт ӧвӧл.

— Дуннелэсь люкиськемъёс шуиськомы асьмеды. Отӥяз Юкаменск ёрос кутске ни. Шайвылмы но Юкаменск ёросысь Ежово гуртын, — шуэ Ольга Ившина. — Мар понна выт тыриськомы меда?

зинира вершинина

Зинира Вершинина Яр ёрос администрацие выжзы пумысен огпол гинэ ӧз вазиськылы ни.

Ас вакытаз вераськылӥзы тапала школа автобус лэзён пумысен. Соин валче, выжез но сюресэз тупатозы шуыса, оскытъязы. Но вераськон вераськонэн кылиз. Зинира Вершинина Яр ёрос администрацие выжзы пумысен огпол гинэ ӧз вазиськылы ни.  Огезлы сыӵе вазиськонэзлы ёрос администрацилэн кивалтӥсезлэн нырысетӥ воштӥсез Александр Старцев туэ 27-тӥ мае валэктӥз: «Яр ёрослэн Сюрес фондаз 2016-тӥ арын 11 миллион 230 сюрс манет вуыны кулэ. Но 1-тӥ майлы 26 процентэз сяна вуэмын ӧвӧл. Таӵе югдур шур вамен выжез лэсьтыны луонлык уг сёты. Та дыре эскериськомы, Лекма шур вамен плита тырыны луонлыкез.»

Меметгуртэ вуылэммы бере ӵуказеяз ик выжез чакланы вуылӥзы ёросысь кивалтӥсьёс, проект лэсьтӥсьёс. Александр Старцев верамъя, выжлы проект туэ лэсьтӥськоз. Выжез ӝутыны ог 100 миллион манет кулэ. Вуоно арын, оло, выж но кылдоз.

Елена Сараматова

Туспуктӥз В. Беломорских

Удмурт Дунне
By Удмурт Дунне 13 июля, 2016 11:30