Шаерысьтымы ог 70 процентэз техника вужмемын

Удмурт Дунне
By Удмурт Дунне 4 июля, 2016 10:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Выльдӥськон мынэ дыг  

Бусылэн нуналаз Пичи Пургалась Яган-Докьяе кин кыӵе мылкыдын вуиз. Одӥгъёсыз лыктӥзы ог-огенызы адӟиськыны, азьланяз ужанзэс чакланы, мукетъёсыз — вылӥ кивалтӥсьёслы сюлмаськытӥсь юанъёссэс сётыны, куинетӥосыз — туала куронъёслы тупась техника басьтонъя огкыл гожтыны.

NIK_8897 фото Карипов Э

Гурт удысын ужасьёсты сӥлы каризы Удмуртилэн Тӧроез но Брангуртысь песянайёс.

 Саклык — асьме заводъёслы

Кизён ӟеч мед ортчоз шуыса, котькуд литр йӧл понна, котькуд гектар вылын элитной кидыс будэтэм понна гуртоослы 1 миллиард 84 миллион манет тыр субсидия дыраз вуиз вал. Тужгес вазь кизёнзэс йылпумъязы Алнаш, Можга но Кизнер ёросъёс. Но кизён вакыт возьматӥз: хозяйствоосын ог 70 процентэз техника вуж. Соин сэрен кизён но кема кыстӥське: я зоро, я кӧс улэмен, музъем уродме, сое ваньмыз уг пӧрмыто гырыны-волятыны. Ӵапак таин сэрен Бусылэн нуналаз бадӟым саклык висъяськиз техникалы но туала технологиослы. Урожай люканы, пудо сиён дасяны быгатӥськомы, но табере ӝоглык но ӟечлык сярысь сюлмаськоно. Туннэ шаерамы дасямын ни 202 сюрс тонна сенаж (чакламлэсь 39 процент), 51 сюрс тонна турын (25 процент), 19 сюрс тонна силос (13 процент). Гуртоос верамъя, арысь аре бусы ӧжытгес но ӧжытгес турын сётэ.

— Алнаш, Можга, Вавож но Сарапул ёросъёс быгатыса куто туала технологиосты. Таос ваньзэ сямен бусыоссэс гырытэк соку ик кизё. Озьы дырзэс но кулэсто, топливолы но уждун тыронлы уксёзэс шыръяло. Одӥг механизатор кӧня ке ужез лэсьтыны быгатэ. Со сяна, музъемзэс но уродмонлэсь утё, — шуиз гурт удысъя но сиён-юонъя министр Александр Прохоров. — Мукет ёросъёсын автопарксэс выльдон каллен мынэ. 2013-тӥ арысен со 3-5 процентлы гинэ выльдӥськиз. Туннэ гаражъёсын 6 сюрслэсь трос техника лыдъяське. Со пӧлысь ог 85 процентэз Россиын поттэмын. Шаерамы ужась предприятиос но быгатонлыкъёсынызы паймыто. Кылсярысь, Балезиноысь но Шарканысь РТП-ос потто трос ужез огдыре быдэстыны быгатӥсь культиваторъёс. Глазовысь «Реммаш» завод лэсьтэ гырытэк соку ик кизись сеялка.

«Ростсельмаш» но «Брянсксельмаш» огазеяськонъёсын Удмуртия валче ужа, озьы гуртоос дунтэмгес дунын трактор-комбайн басьтыны быгато. Удмуртилэн Тӧроез Александр Соловьев верамъя, гуртоослы азьланяз но техника басьтыны юрттэт вуоз, та пумысен нимысьтыз программа кутӥськоз. Бадӟым саклык висъяськоз шаерысьтымы предприятиослы.

— Техника поттонэн вырись асьме заводъёслы азинскыны луонлык сётоно, — шуиз Александр Соловьев. — Балезино, Шаркан, Глазов палъёсысь предприятиосысь техника басьтӥсьёслы субсидиос висъяськозы. Соку завод но азинтӥськоз, гуртоослы но пайдаез луоз.  Но вань техникалы огкадь субсидия висъяны уг луы. Со сяна, заводъёс азе курон пуктомы, быдэс Россиысь гуртоос доры сюрес мед лёгозы шуыса.

 Гуртоос витё юрттэт

Туннэ асьме дорын поттэм техника но туж быгатыса лэсьтэмын ни, одно ик кунгож сьӧры учкылонэз воксё ӧвӧл. Зэм, куд-огез сыномем-сисьмем тракторзэ но воксё куашкатозяз ужатэ, выльзэ басьтыны вормытэк.  Но тазьы запчастьлы уксёзэ гинэ кисьта, эшшо ке урожай люканы уг пӧрмыты. Кылсярысь, та вакытэ 68 процентэз сяна комбайнъёс уборкалы дасесь ӧвӧл. Тысь шертон но куасьтон комплексъёс 71 процентлы дасесь.

Уноосыз хозяйствоосын кивалтӥсьёс Бусы нуналэ ӵапак выль техникаен тодматскыны вуэмын вал. Татчы уго ог 40 пумо техника вуттэмын, куд-огез мар карыны быгатэмзэ калыклы бусыын ик возьматӥз. Но туннэ субсидия басьтыны шуг луиз.

— Комбайн но трактор басьтыны субсидия висъяське, но сое но басьтэммы уг луы, документъёсты янгышен гожтэмын, шуо министерствоын, — вера Кез ёросысь «Степанёнки» хозяйствоен кивалтӥсь Фёдор Першин. — Но документэз выль сямен но лэсьтыны луэ ук. Малы та борды кугӟанэз? Озьы ик ӝожтӥсько Балезино, Можга, Алнаш палъёс. Субсидия — хозяйстволы бадӟым юрттэт. Кылсярысь, 1 трактор 6 миллион манет сылэ ке, ог 2 миллионэз берыктӥське. Таин мукет чыры-пыры техника басьтыны луысал на.

Кун Кенешысь Гурт удысъя, музъем кусыпъёсъя, инкуазь узырлыкъёсъя но инкуазез утёнъя ялан ужась комиссиен кивалтӥсь Владимир Варламов верамъя, субсидия висъян понна ог 80 миллион манет кулэ. Туннэ 54,5 миллион манет тыр юрттэт сётымон вань. Ар пумозь гуртоос дорозь вуыны кулэ 1 миллиард манет котыр, шуэ В. Варламов. Бадӟым саклык висъяськоз фермаос ӝутонлы, ӟеч выжыысь пудо, техника басьтонлы.

Бусыын, техника сяна, картошка но ю-нянь будэтонъя азьмынӥсь технологиос но кидысъёс возьматэмын вал. Туэ куазь умой ӧвӧл, но гектарысьтыз 30-40 центнер басьтыны турттӥсьёс вань. Вотка ёросысь «Пихтовка» хозяйствоысь Георгий Крылов верамъя, Бусылэн нуналыз ӵапак ог-огедлы визь-кенешен юрттыны тупа: мар лэсьтоно на хозяйствоын, кызьы умойгес радъяны ужез.

Елена Сараматова

Туспуктӥз Э. Карипов

 

 

 

 

 

Удмурт Дунне
By Удмурт Дунне 4 июля, 2016 10:00 Updated