Санкциослэсь кышкан быриз

Удмурт Дунне
By Удмурт Дунне 26 июля, 2016 11:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
родионов

Россиысь Промышленностья но вуз каронъя министерствоысь улосъёсысь промышленностез азинтон политикая департаментэн кивалтӥсьлэн воштӥсез Олег Радионов.

Шуг-секытъёс юнмато

1760-тӥ арын Иж шур вылын пуктӥзы корт ӵыжатонъя но лэсьтонъя завод. Та кутскон сётӥз шаерысьтымы промышленностьлы. Кыӵе азинтӥське али та удыс? Марлы саклык висъя федерал центр? Та но мукетыз пумысен вера Россиысь Промышленностья но вуз каронъя министерствоысь улосъёсысь промышленностез азинтон политикая департаментэн кивалтӥсьлэн воштӥсез Олег Радионов.

— Олег Викторович, 2 ар талэсь азьло Россилы пумит санкциос кутэмен сэрен кунмы выль сямен улыны дышетске. Али промышленность кыӵе азинске?

— Санкциос шӧдӥськытэк ӧз кыле. 2 ар эгесын кадь улӥськомы ке но, промышленность пумен юнма. Нырысь-валысь куд-ог предприятиослэн кивалтӥсьёссы куалектӥзы ик, кызьы табере ужаломы шуыса.   Асьме дорын потӥсь куд-ог вузъёслы дуннеысь рыноке сюрес пытсаськемын,  туж зол ӝутӥськизы кунгож сьӧрын потӥсь тӥрлыклы дунъёс. Валаны уг луы вал на, мар луоз азьланяз, мае возьмано. Но али тросэз  кивалтӥсьёс вазисько Россиысь Промышленностья но вуз каронъя министерствое: санкциос кемагес мед кыстӥськозы вал. Выль сямен улыны дышизы уго. Выль сямен ужаны программаос лэсьто, кунгож сьӧрысь вузэз Россие ӧжытгес ваён, кулэ луись арбериосты асьме дорын поттон понна сюлмасько, со бордын гижысь-пиньысь ужало. Тросэз рынокын инты но шедьтӥзы ни. Асьме дорын потӥсь вузэз асьме калык но уногес басьтыны кутскиз. Со дыре ик Евросоюз Россиен эшъяськемысь ӧз дугды. Азьмынӥсь кунъёсысь предприятиосын вожвылъяськон секытэн сётӥське ик, модернизацилы ик кӧня кужым но уксё кулэ. Но асьме предприятиос мылкыдзэс уг куашкато.

— Кыӵе удысъёс тужгес бадӟым ыштонъёс адӟо?

—  Станокъёс лэсьтон, радиоэлектронной тӥрлык поттон. Азьвыл уго унозэ кунгож сьӧрысь вуттӥськомы вал. Ваньзэ тае Россиын поттыны кутскыны шуак уг луы. Со понна туала техника, бадӟым коньдон кулэ. Но выльдӥськон борды кутскимы.

— Россиысь Гурт удысъя министерство али бадӟым юрттэт висъя пудо вордонлы но фермаос пуктонлы. Промышленностья но вуз каронъя министерство кыӵе ӧръёсты ӝутыны медэ?

— Министерство тужгес секыт югдуре сюрем удысъёсты ӝутыны тырше. Со 20 ӧр. Таин валче кылдытэмын ведомствоос куспын ужась 20 группа. Котькуд секторын ужа импортозамещениен герӟаськем программа. Кылсярысь, азинтыны кулэ радиотехника, авиация, судостроение, машина поттон, мувӧй, газ кыскон, химиен, нюлэсэн герӟаськем, удысъёсты. Министерство тодосчиосын, экспертъёсын, предприятиосын  кенешиз, эскериз, кинлы мар уг тырмы рос-прос ужан понна. Чакламы, кыӵе вуз Россиын потэ 30 процентлы ичигес. Учкимы, кин быгатоз со вузъёсты эшшо но уногес лэсьтыны. Ӵапак со вузъёслэсь но предприятиослэсь лыдзэс ӝутон борды ик басьтӥськимы. Али вормонъёссы адӟисько ни. Кылем арен ӵошатоно ке, зол азинтӥськыны быгатӥзы, кылсярысь, фармацевтика, химия удысъёс.

промышленность карипов

Ижысь механикая завод пыре дуннеысь пыӵал поттӥсь 5 бадњым предприятиос пӧлы. Татын лэсьто на электроинструмент, эмъяськон тӥрлык, мувӧй поттон оборудование.

— Мукет улосъёсын ӵошатыса, кыӵе адӟиське Удмурт шаер?

— Удмуртия огсыр азинтӥське. Ог 40-50 процентсэ ӵыжатэм кортъёсты но сплавъёсты лэсьто Удмуртиын. Со сяна, авиациын кутӥськись арбериос пӧлысь улосвыл поттэ 20 процентсэ. Скважинаосты но насосъёсты ужатонъя тӥрлык пӧлысь — 15 процентсэ. Беспилотной системаосын кутӥськись арбериос пӧлысь — 30 процентсэ. 40 процентэз конденсаторъёс, 73 процентэз граждан ож тӥрлык, 90 процентэз боевой ож тӥрлык потэ Удмуртиын.  Предприятиослы шутэтскыны маза воксё ӧвӧл — заказъёссы бадӟымесь, уката ик — военной промышленностьын тыршисьёслэн. Тужгес трос заказъёсты быдэсто 8 предприятиын. Тросэзлы федерал центрысь юрттэт вуэ. Соин ик азьланяз азинтӥськозы шуыса, али ик адӟиське.

Шаерын промышленностез азинтыны трос пӧртэм программаос но вань. Соосты улонэ пыӵатыны федерал центр дась. Со понна Удмуртия уксё висъяз ке, федерал бюджетысь но коньдон сётӥськоз. Кылсярысь, май толэзе нимысьтыз конкурс радъямын вал. Отчы пыриськиз 20 улосвыл. Таос пӧлысь быръемын 3-ез: Крым, Ставрополь край но Удмуртия. Валтӥсь курон вал: выль ужан интыос кылдытон, инвесторъёсты кыскон, проектъёслэсь ӟечлыксэс будэтон. Выльдӥськонъя проектэн Удмуртия 3-тӥ инты басьтӥз. Но сое быдэстон понна 30 процентсэ коньдонэз висъяны кулэ улос, 70 процентсэ — федерал центр. Туэ 3 улослы 190 миллион манет кошкиз ни, сентябре 640 миллион манет вуыны кулэ на. Вуоно арын 3,5 миллиард манет, отӥяз 7 миллиард манет висъяны чакламын. Малы соку ик бадӟым коньдон висъямын ӧвӧл? Таӵе проектъёс ӧй вал на бере, чакланы кулэ, макем умой пӧрмоз уж, кыӵе пайдаез луоз. Огез тодмо: Удмуртие вуиз ни 55 миллион манет. Выльдӥськонъёс чакламын Ижысь механикая заводын, «Калашников» концернын, мувӧй но газ кысконъя оборудование поттӥсь «Техновек» заводын, Глазовысь мебель лэсьтонъя фабрикаын.

— Кытын Удмуртилэн ляб палыз?

— Улос ачиз быгатэ бырйыны, кыӵе инвестиционной проектэз азинтоз, кыӵе программалы уксё кулэ. Милям департаментмы индустриальной паркъёс кылдытъян сярысь программа бордын ужаны малпа. Солы 4 миллиард 300 миллион манетлэсь трос уксё висъяськоз. Удмуртилэн та удысын но вормыны луонлыкъёсыз вань. Туннэ 13 улос быръемын ни. Удмуртия соос пӧлын ӧвӧл на. Ачим но визь-кенешен юрттыны выро, мед гинэ конкурсэ пыриськозы. Ас вакытаз Удмуртиысь промышленностья но вуз каронъя министр луыса ужай бере, югдурез тодӥсько. Предприятиослэн кивалтӥсьёсынызы ялан пумиськылӥсько, маин быгатӥсько, юрттӥсько. Удмуртилы шаплыгес кариськоно кластер кылдытъянын. Одӥг удысын бергась кӧня ке предприятиосты огазеяса, одӥг технологиез уже кутыса, одӥг герӟетын тыршыса, вормонъёс басьтыны луонлык бадӟымгес уго. Со бордын азинтӥськон но барыш поттон. Ас вакытаз машина поттонъя кластер кылдытӥмы вал, со ӟеч вамыш вал шуыса, улон возьматӥз ни. Министерство ӵапак тазьы кластерен ужанэз умоен лыдъя. Соин ик предприятиослэсь кусыпъёссэс юнматон, кооперация кылдытон бордын тыршоно. Соку санкциос но кышкыт уз луэ.

Елена Сараматова

Туспуктӥз Э. Карипов

Удмурт Дунне
By Удмурт Дунне 26 июля, 2016 11:50 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<