Полковник Михаил Гаврилов: Котьмалэн йӧныз шедёз

Удмурт Дунне
By Удмурт Дунне Июль 13, 2016 11:21
_DSC0598

Полковник Михаил Гаврилов

Полковник Михаил Гаврилов ас вакытаз быдэс странамес котыртӥз, шуыны луоз. Удмурт воргорон, взводлэн командирез бордысен кутскыса, дивизилэн штабеныз кивалтӥз, ветлэмын Афганистан ожмаськонэ. Кышкасьтэм луэмез понна пусъемын Мужество орденэн. 2002-тӥ арын вордскем палъёсаз бертӥз, шаерамы кылдытӥз Утчанъя-утёнъя служба.

Кык анай

— Быдэ вуи Эгра ёросысь Пирнэзь гуртын, — веранзэ мытӥз Михаил Геннадьевич. — Гуртысьтымы 3 классъем школаез йылпумъяса, артысь Чутыре дышетскыны ветлӥмы. Дышетски огшоры: эшъёсылэсь бере но ӧй кыльылы, ӧй но висъяськылы. Пичиысен ик дыши гурт ужез быдэсъяны, юртъер котырын берганы.

Семья сярысь ке верано, мынам со тугаськем бугор выллем. Перевощиковъёслэн семьяязы мон нырысетӥ пинал вал. Буби сярысь трос вераны уг тодӥськы: мыным 8 толэзь дыръя кулэм. Ӵыжы-выжыосмы верамъя, со экскаваторен ужам. 3 арес дыръям муми кыкетӥзэ бызиз — Алнаш ёросысь Удмурт Гондыр гуртэ. Кыдёкын шуыса-а меда, пересьёс огназы кылё-а шуыса, мон Пирнэзь гуртэ ик кылиськем, бабушен-дедуше вӧзын будэмын. Анна Афанасьевна но Афанасий Егорович Перевощиковъёс мамаме но папаме воштӥзы. Мама сярысь но уродзэ вераны уг быгатӥськы, семьяеныз гуртамы куное вуылӥз, монэ яратӥз, нуныяз. Озьы тӥни, монэ будэтонэ трос адями пыриськиз, ваньзы быгатэмзыя сюлэм шунытсэс сётӥзы.

Ортчем аръёсме тодам вайисько ке, ваньмыз калык рад вал: узыр но, куанер но ӧм улэ. Куд-ог эшъёсы мынэсьтым но урод улӥзы, мон номырлы ӧй ӝожтӥськылы. Семьяын монэ нуныяса будэтӥзы, кулэ интыяз куаретӥзы но. Пичигес дыръям одӥгезлы гинэ паймисько вал: малы адямиослэн одӥг мамазы, нош мынам — кык. Визьмаськеме бере но бабушме «мама» шуэмысь ӧй дугды.

Монэ будэтонын бадӟым пытьы кельтӥз на прадедмы. Со милям 92 аресозь улӥз, ас вакытаз кулаке поттылӥллям, соин, лэся, ялан курлалляз советской властез, ӟуремез али но пель сьӧрам кылӥське. Шуг-секытъёслы сётскисьтэм мурт зэмлык понна лапак нюръяськиз. Соин но, лэся, мыным ялан вералляз военной луон сярысь, нош мамаосы солы чутрак пумит вал. 1-тӥ классэ мыныкум, прадедмы кулӥз, нош 4-тӥ классэ выжон азьын — тятямы (дедмы). Юртъер котырын берганы но монэ пыд вылам ӝутыны бабушелы огназлысекыт луоз шуыса, лэся, мамамы ас семьяеныз (сюратаен но Юра выныным) Пирнэзе бертӥз. Соос нимаз юртын улӥзы, нош мон — бабушеным. Жаляса верано, 2007-тӥ арын мамае улонысь кошкиз, нош Юра выны мынам сюрестӥм вамыштӥз, югдурез утён удысын ужаса, дырызлэсь вазь пенсие потэмын ни.

ккк

Школаын дышетскон вакыт.

Одӥг ар кыстӥськиз 22 ар

— Чутыр школаез йылпумъяса, Тбилисиысь вылӥ артиллерийской командной училищее дышетскыны пыри. Кожай вал, дышетски ке, вордскем палъёсам берто. Но одӥг кошкемен, 22 арзэ палэнын ортчытӥ.

Военнойёсты кытчы ысто, отчы ик мынӥськод. Нокытын но 5 арлэсь кема ӧз возьылэ. Училище бере службаме ортчытӥ Германиын. Ми азе чурыт куронъёс пуктэмын вал: кышнояськем муртъёс 5 ар служить каризы, егит пиос — 3 ар. Германиын мыным кемагес улыны кылдӥз, угось училищеез йылпумъян аре кузпалъяськи ни вал. Кунгож сьӧрын лейтенант звание сётӥзы. Германиын служить карон яраз, угось отчы ыстылӥзы устоосыз пӧлысь устооссэ гинэ солдатъёсты.

5 ар ортчыса, Оренбурге келязы. Татын капитанозь будӥ. Жаляса верано, военной удысын басьтэм бадӟым вормонъёсме мамае (бабуше) адӟытэк кылиз. Со ялан доре бертэмме возьмаз, нош мон ялан пӧртэм шаеръёсын улӥ. Эшшо 5 ар ортчыса, Чайковский городэ ыстӥзы. Таиз ини Эгра ёросэным чылкак артэ потӥз. Озьы ке но вордскем палъёсам бертылыны арлы одӥг пол сяна ӧз кылдылы. Ужан сяменым ик вылӥ тодон-валан басьтон сярысь малпаськыны кутски. Чайковский городын 1 ар служить карыса, Санкт-Петербургысь военно-артиллерийской академие дышетскыны пыри. Сое горд дипломен йылпумъяй но, монэ Хабаровске ыстӥзы, отӥяз ужай на Приморский крайын. 1995-тӥ арын ӝыны арлы Афганистанэ ыстылӥзы. Отын мон дивизионлэн командирез вал.

Эшъёслы, выль интылы дышыса гинэ вуттӥськод кадь — нош ик мукет интые ысто. Калыкен огкыл шедьтыны ӧй шугъяськылы ке, секыт вал ӟеч эшъёсын люкиськыны. Табере быдэс Россиын эшъёсы пазьгиськемын. Мукетызлы но шумпотӥсько: пичи гуртысь удмурт воргорон, скал кыскисьлэн пиез, полковникозь будӥз, артиллерийской бригадалэн командирез луиз. Таӵе вылӥе ӝутскыны ваньмызлы уг кылды. Военной удысэз быръемысьтым, куд-ог эшъёсы паймизы, пӧлазы серем карыны вырисьёс но вал, быдэс улондэ, пе, формаен ветлоно луод. Нош мон пичи но уг жаляськы, мыным со котыр ласянь кыданы юрттӥз. Выльысь профессия бырйыны косысалзы ке, военнойлэн сюрестӥз ик вамыштысал.

Выль удыс

ккк

Службаез ортчиз Приморской крайын но.

— Военной дӥсь нуллэмысь дугдэме бере вордскем палъёсам бертӥ. 38 аресысен пенсионер лыдъяськисько. Таза воргорон дораз токма пукоз шат? Уж утчано кариськи. Удмуртиысь Югдурез утёнъя министерствоын ужась калыкез тачак, военкоматын, пе, 10 арлы черод кылдэмын. Озьы сюрес вуттӥз МЧС-э.

Военной луыса ужатозям, куд-ог частьёсты пытсано яке кулэстоно луылӥз. Документъёсын вырон но бадӟым хозяйствоен кивалтон котькытын одӥг выллем: шуныт, тыл сётоно, калыкез сюдоно, ужаны луонлыкъёс кылдытоно… Соин ик Удмурт Республикалэсь Утчанъя-утёнъя службазэ кылдытонын мон понна одӥг пӧртэмлыкез вал — дӥськут. Военнойёслэн вань курон-косонэз форма нуллӥсь солдатъёс быдэсъяло ке, таяз — огшоры калык. Документъёсын вырон ужъёсты вератэк, службаез кылдытон вӧй вылтӥ кадь ортчиз.

Утчанъя-утёнъя службаен 2002-тӥ-2008-тӥ аръёсы кивалтӥ, та вие кивалтӥсьлэн воштӥсез луисько. 14 ар ӵоже ужатозям, пӧртэм выль профессиослы дыши. Милям структураямы 94 спасатель ужа, нош кин со спасатель, тодӥськоды-а? Быдэстоно ужзэ одӥг кылын вераны ик шуг, со — водитель, альпинист, водолаз, десантник, электрик, газосварщик, стропальщик, такелажник, кинолог. Одӥг кылын вераса, шуг-секытэ шедем муртлы нырысетӥ юрттэт сётӥсь. Адямилэсь кин луэмзэ уд учкиськы: коть кивалтӥсь, коть йыртэмась — дыраз юрттоно. Спасательёс гуртысь нылкышноос кадь, соос уго гурт котырын бергало, нылпи будэто, киужен выро, кулэ интыяз воргорон ужез но быдэсто.

Ӟеч лэсьтыны мылкыд карись адямиос быриллямтэ на. Дорамы уже куриськисьёс лачак, но спасатель луыны удалтэ тужгес шудоосызлы гинэ. Отчы куто десантникъёслэн выллем юн тазалыко адямиосты гинэ. Милям службаямы 3 арлы одӥг пол аттестация ортче. Та вакытэ утчанъя-утёнъя но газо-спасательной ужъёсты быдэсъяськомы, со 8 пӧртэм лыдъяське. Ижын сяна, службалэн ёзъёсыз интыяськемын Глазов, Вотка, Сарапул городъёсын, Каракулино черкогуртын но Дэри ёросысь Гольян черкогуртын. Мукет сямен вераса, бадӟым шуръёс котыре. Нимысьтыз отрядъёс кылдытыны чакламын федерал сюресъёс вылын но. Матысь дыре милям ёзмы усьтӥськоз Можга городын.

Ваньмон дыръя.

Ваньмон дыръя.

Юрттӥськон

— Спасательёс доры пӧртэм муген вазисько, — веранзэ азьланьтэ Михаил Гаврилов. — Кинлэн ке коркаяз я машинаяз пыремез уг луы, усьтонмес кельтӥмы, шуо. Пӧлазы пӧяськисьёс но шедьыло. Соин ик адямиослэсь нырысь ик документъёссэс эскериськомы, соос ӧвӧл ке, бускельёссылэсь, участковойлэсь юалляськиськомы, собере гинэ квартираез усьтон борды басьтӥськиськомы. Юмоке шедён учыръёсмы но кылдыло. Кылсярысь, берло дыре гуртэтӥ гинэ ӧвӧл, город ульчаостӥ но кыр пӧйшуръёс калго. Соослы юрттыны тыршиськод, нош соос я лекаськыны, я ӵыжаськыны кутско, ужасьёсмес вӧсь каро. Пытсаськем ӧсъёсты усьтыны ӧтьыкузы, спасательёслы вунэто пуныоссы сярысь ивортыны.

Ӵем дыръя шуръёс вылын ужано луэ. Паймыто йӧ вылын чорыганы яратӥсьёс: асьсэды но уг дунъяло, ӵыжы-выжыоссэс но уг жаляло. Амалзы ке луысал, куд-огез, оло, машинаысенызы ик чорыгасалзы. Берло дыре мувӧй поттӥсьёс но инкуазьлы бадӟым изъян ваё — шуре кисьтӥськем бервылзэс утялтоно луэ.

Арлэн котькыӵе вакытэз ас сяменыз висъяське: гужем пыласькисьёс выё, сӥзьыл губиясьёс йыромо. Паймыто дорысьтызы кошкемъёс. Куд-ог дыръя адямиез арня ӵоже утчаськод, нош со туганэз дорын куноя. Люкиськем анай-атайёс но нылпизэс ӵемысь утчало. Огаз семьяын керетон пурӟе ке, пиналзы, нокинлы вератэк, мукетаз пегӟе.

Мынам малпамея, азьвыл аръёсы ӧжытгес адямиос сике йыромылӥзы. Туала вакытэ кӧттырмостэм сям ворме кадь, адямиос ветлымтэ интыосты утчало, тросгес губи яке узы-боры октэмзы потэ. Сике пыриськоды ке, бӧрсяды кыӵе ке пус яке пытьы кельтэ. Соку сюресты котьку берлань вуттоз.

Утчанъя-утёнъя службаын ужасьёсмы пыриськизы Вотка ёросысь Степаново черкогурт котыре депутатъёсын усем вертолётэз но Татарстанын выем «Булгария» теплоходэз ӝутонэ, Балезиноын натрийлэн хлоридэз кисьтӥськем но Пичи Пурга ёросысь Пугачёво каргуртын пуштылэм бервылъёсыз утялтонэ. Мыным оскемын пуштытъян ужъёсты быдэсъян. Арлы быдэ Сьӧлта, Эгра, Балезино, Кез, Дэбес ёросъёсысь шуръёс вылын тулыс тудвулы ӧръяськыны юрттӥськомы. Со сяна, милемды ӧтё куашкан калэ вуэм заводъёсты сэрттонэ. Кылсярысь, спасательёсмы пуштытъязы Красногорск ёросысь Валамазысь пияла поттон но Воткаысь машиностроительной заводъёсысь куд-ог цехъёсты.

Ӝожмыт лыдпусъёс…

— 14 ар ужатозямы, та удысын куд-ог лыдпусъёсты умоятыны кылдӥз. 2002-тӥ-2004-тӥ аръёсы шаерысьтымы шуръёс вылын 250 пала адямиос выйылӥзы, али та лыдпус 80-озь кулэсмиз. Калык пӧлын дэмен валэктон уж нуэммылэн пайдаез шќдћське шуыса, шумпотоно. Но монэ мукетыз сюлмаськытэ — юонлэн бервылъёсыз. Тупаса улон вакытэ арлы быдэ Россиын 50 сюрс пала адямиос, вуэ выйыса, 30 сюрс палаез, сюресъёс вылын шуккиськон учыре шедьыса, быро. Со пӧлысь 85 процентэз —   шӧмаськем муртъёслэн янгышенызы сэрен. Афганистанын 10 ар куспын тушмон пулялэсь 14 сюрс пала ожгарчиосмы быризы, нош туала вакытэ? Йырси ик пештырске.

Юись анай-атайёсын сэрен кӧня пиналъёс вуэ выё! Тодам лыктэ ог кык ар талэсь азьло Якшур-Бӧдья ёросын луэм учыр. Егит семья шур дурын шутэтскыны малпам, сьӧразы кутӥллям 2 аресъем пиналзэс. Сокем трос юиллям, доразы нылпизытэк бертэмзэс но шӧдӥллямтэ. Пиналэз быдэс гуртэн, спасательёсын утчазы, пинал, вуэ усьыса, бырем.

Мӧзмон

— Гуртын котьку удмурт сямен вераськылӥмы. Чутыр школаын дышетскыкум гинэ, ӟуч кылэз ӟечгес тодыны кутски. Удмурт шаерлэн палэназ 22 ар улыса но, анай кылме ӧй вунэты. Отпуске бертылыкум, город ульчаосысь удмуртъёслэсь вераськемзэс туж шер кылылӥ. Тросэз удмурт луэмзылэсь керпотылӥзы. Умой, берло дыре удмуртъёс сэзесьгес луизы, соослэсь куаразэс кылылыны луэ.

Куд-ог дыръя паймыто кивалтон удысын ужасьёс. Огвакытэ ӵаш поттӥзы депутатъёс, удмурт кылэз тодӥсьёслы, пе, уждунзэс будэтозы — серем со. Кыӵе шаерын улӥськод, кылэз, отын улӥсь калыкез гажаны кулэ, дыр.

Туж данъяськисько Удмурт шаерен: калыкмы тупаса улэ, сикъёсмы но шуръёсмы чебересь, музъеммы уг зурка, кышкыт учыръёс уг луыло, шуыны луоз. Таӵе шулдыр шаерез утчаса уд шедьты. Ас вакытаз монэ ужаны ӧтьылӥзы Москва, Санкт-Петербург городъёсы, нош мон Удмурт шаерме номырин ӧй вошты. Татын мынам доре!

Кузпалы Ирина Александровна но вордскемезъя Ижысь луэ. Тодматскимы гуртысен, солэн анай-атаез милям гуртысьтымы. Нырысь аръёссэ гожтэт пыр кусып возимы, нош училищеез йылпумъякум, сюан ортчытӥмы. Со но монэным ӵош 22 ар ӵоже пӧртэм городъёстӥ ветлӥз. Программистэ дышетскемын ке но, пӧртэм ужъёсты быдэсъяно луылӥз. Будэ 15 аресъем Александра нылмы. Мынэсьтым сюресме бырйыны малпаз: кыкетӥ арзэ Уфаысь кадетъёслэн корпусазы дышетске.

Ваньмон сярысь ке верано, та вакытэ Дэри черкогуртын юрт пуктӥсько. Азям пуктэм ужпумъёсме котьку быдэстыны тыршисько. Мытэм ужме одӥг пол гинэ аналтӥ, шуыны луоз. Покчи классъёсы ветлыкум, арган кысканы дышетски, нотаосты но тодӥсько ни вал кадь, но арганчи мынэсьтым ӧз пӧрмы. Ачим шулдыръяськыны яратӥсько ке но.

Адямилэн улоназ пӧртэм шуг-секытъёс пумиськыло, мынам но соос ичи ӧй вал. Но котькыӵе секыт учырысь потон амал луыны кулэ, ӧжытак малпаськоно гинэ. Ӵапак таӵе оскон мыным улыны юрттэ.

Валентина Емельянова

Удмурт Дунне
By Удмурт Дунне Июль 13, 2016 11:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<